.webp){kind=icon}
Далеку сме од родова рамноправност во економијата, потребни се мерки за економско зајакнување на жените и поголем пристап до финансии и проекти за поддршка на бизнисите предводени од жени, вели во интервју за „Блумберг Адрија“ Ана Ристевска, претседателка на Советот за претприемаштво во Битола.
„Како и сите бизниси, и бизнисите предводени од жени се соочуваат со голем број предизвици во однос на економската ситуација. Прво е неинформираноста, односно како да се дојде до одредени финансии, а потоа и малиот број финансии што се даваат за поддршка на бизнисите. Токму преку Советот за женско претприемаштво повеќе ќе ги информираме бизнисите, не само предводени од жени туку и сите бизниси, како полесно да дојдат до финансии, како полесно да се информираат за сите проекти што даваат одредени средства за да се поттикнат бизнисите. Потоа, да го напоменам вмрежувањето што треба да го имаат бизнисите за да напредуваат. Освен вмрежувањето и информираноста, тука треба да се поттикнат голем број проекти што ќе ги вклучат жените или бизнисите да учествуваат во нив и да даваат некакви резултати на локално и национално ниво. Исто така би споменала дека треба да дејствуваме постепено, не може да очекуваме дека преку Советот ние наеднаш ќе добиеме некои подобри резултати. Сметам дека со мали чекори може да придонесеме и да мотивираме повеќе жени да отворат бизниси, но се разбира да бидат и на лидерски позиции“, вели Ристевска.
Блумберг Адрија
Една од целите на Советот ќе биде преку обуки и мерки за поддршка да поттикнат развој и зголемување на бројот на жени претприемачи. Целта е да се лобира и кај локалната и централната власт за издвојување повеќе средства за развој на женското претприемаштво.
„Пред сè, сметам дека треба да преземеме добри практики од развиените земји како тие го поддржуваат женското претприемаштво и тие практики да ги примениме. Можеби тука треба да се почне со соодветни обуки, обуки за дигитална писменост, обуки поврзани со менаџмент и управување, обуки поврзани со раководење со финансии итн. Со сето тоа жените ќе добијат многу поголемо знаење за потоа да можат да го применат во своите бизниси. Потоа ќе поттикнеме и ќе побараме од Општина Битола, со поддршка и од Националната агенција за поддршка на женското претприемаштво, да добиеме одредени средства што може да им се дадат на бизнисите предводени од жени. Тие средства може да бидат во вид на опрема, субвенционирање плати и на нови вработување итн. Сето тоа може да придонесе кон економско зајакнување на бизнисите предводени од жени и се разбира дека повеќе ќе се охрабрат жените во најразлични области да влезат во светот на бизнисот и да отвораат фирми“, вели претседателката на Советот за женско претприемаштво.
Блумберг Адрија
На прашањето дали во Македонија може да се зборува за реална родова рамноправност или сè уште постои стигма, особено за поставувањето жени на лидерски позиции, Ристевска вели дека, за жал, далеку сме од европскиот просек кога станува збор за жени бизнисмени.
„Не можеме да зборуваме за некаква рамноправност. Еве, на пример, јас сум дел до ИТК-секторот и можам да кажам дека сите изминати години многу потешко одеше таа рамноправност, но по одредено време работно искуство, со резултати и добро портфолио, нашата професионалност и капацитет ги докажуваме. Но, се разбира, на почетокот има скептицизам и недоверба во жените лидери. Тоа може да се промени преку настапувања и презентирање на успешните жени за да се избориме за родова еднаквост и создавање клима за жените да бидат на лидерски позиции. Токму и со вакви чекори, како Националната платформа за женско претприемаштво и Советот што го формираме, може да се променат реалната слика и состојба во женското претприемаштво“, вели Ристевска.
