.webp){kind=icon}
Стегањето на обрачот од страна на централните банки го усложни пристапот до финансии за компаниите и ги поскапе кредитите. А во такви околности голем број инвестиции се на стендбај, додека главниот предизвик е да се одржи ликвидноста на компаниите.
„Во време на сè поскапи пари, преминувањето од стандардното финансирање може да биде добра опција“, вели во интервју за „Блумберг Адрија“ извршниот директор „ВФП плус консалтинг“, Мартин Димитриевски.
„Сведоци сме што се случува изминатиов период. Имаме исклучително зголемена каматна стапка на рекордно ниво. Се зголемија референтните стапки и пораснаа каматите во банкарскиот сектор, па секако претприемачите се насочија кон алтернативни извори на финансирање како грантови, кофинансирање и сл. Тоа влијаеше многу, бидејќи сепак традиционалниот начин на кредитирање во банкарството и дел од инвестициите во првиот момент беа одложени, но со сите други можности некои од инвестициите ќе се реализираат“, вели Димитриевски.
Според Димитриевски, грантовите што нудат и дел неповратни средства за компаниите може да бидат ефикасна финансиска инјекција за бизнисите.
Блумберг Адрија
„Најчесто станува збор за извори што значат зголемување капацитети, воведување нов производ, тука секако спаѓаат извозно ориентираните компании, производствените компании, а секако дека тука спаѓаат и агросегментот, зелената економија, туризмот и угостителството... Сите инвестиции што значат зголемување на конкурентноста во овој сегмент, без разлика дали станува збор за градење нови производствени капацитети, проширување, мапирање, обновливи извори на енергија или нов производствен процес, бараат инвестиции од пошироки размери. Многу е полесно кога самите инвестиции во тој дел може да се направат со дел од средства што се целосно неповратни или дел од нив се неповратни, тој процент најчесто се движи од 20 до 75 отсто. Меѓутоа, оправданоста и чекорот да се реши компанијата на таква инвестиција кога знае дека зад себе има можност за дел од средствата, независно од процентот, да бидат субвенционирани, многу полесно ја поттикнуваат побрзо да се одлучи на таков начин на дејствување. Секако и во однос на цената на чинење и сите оние математики што ги прават компаниите, многу влијае на нивните биланси и пресметки“, вели тој.
Димитриевски додава дека во потрагата по алтернативни извори на капитал е клучна и изработка на добра развојна стратегија за финансирање на компаниите.
„Најважно е да ги знаеме големата слика и стратегијата на една компанија. Ако тоа е меѓународниот пазар на пример, треба да се направи истражување за земјите што се цел, дали веќе производот функционира таму, кои се законските норми за тој пазар... Понатаму, важно е да се направи финансиска анализа за тоа што ќе ни биде потребно на пример во делот на опрема, на кој начин може да се дојде до неа, дали може да се искористат одредени субвенции за да се заокружи целокупниот производ. Не треба да го заборавиме и сегментот на комерцијализацијата, како да се пристапи кон маркетингот и кон стратегијата за пласман на производот“, вели Димитриевски.
