Нов раст на минималната плата, во услови на ниска продуктивност во работењето на компаниите, носи инфлаторни ризици, вели во интервју за „Блумберг Адрија“ претседателката на Организацијата на работодавци, Владанка Трајкоска, коментирајќи ги најавите дека во 2024 година минималецот ќе биде 22.500 денари.
„Минималната плата како една законска одредба е предмет за дискусија и секогаш кога зборуваме за неа сме многу чувствителни, но мора да сме свесни дека многу фактори влијаат врз определувањето на минималната плата во една држава. Она што секогаш го зборуваме, можеби сме веќе досадни, е дека треба сите да работиме на продуктивноста за да имаме поголема минимална плата, бидејќи таа не паѓа од небо. Сепак со зголемување на минималната плата може да предизвикаме други последици, односно да предизвикаме инфлација и раст на цените, бидејќи зголемувањето на платата, а неработењето на продуктивноста се одразува на крајниот корисник. Треба да бидеме многу внимателни со зголемувањето на минималната плата да не предизвикаме дополнителни последици врз економијата, која многу ни е кревка. Она што сакам да го споменам е дека многу повеќе треба да се размислува за еден концепт на вреднување на трудот на вработените, многу повеќе да се работи на сивата економија, бидејќи сите знаеме дека нема пари во буџетот и дека сето тоа треба ние заеднички да го сработиме“, вели Трајкоска.
Bloomberg Adria
Таа потенцира дека дополнителен предизвик е што 2024-та е изборна година. Трајкоска посочува дека е клучно да се работи на зголемување на конкурентноста на компаниите, намалување на сивата економија и барање решение за дефицитот од кадар.
„Никој работодавец не сака да скрати од својата добивка или не сака да работи во загуба за да подели плата и сето тоа да биде на негов товар. Тоа е неблагодарно да се каже, меѓутоа во економијата тоа е многу позитивна карактеристика, значи треба да работиме на конкурентноста и продуктивноста на компаниите и само така може да зборуваме за повисока плата. Ние во овој период многу повеќе треба да се осврнеме на недостигот од работна сила и едуциран кадар, тоа е проблемот на оваа економија. А, она што сите го зборуваме за минималната плата, таа е една категорија што во одреден момент требаше да предизвика поттик кај компаниите, а денес веќе сите разговараме за продуктивни работници, зборуваме за интегриран пристап кон зголемувањето на платата. Она што сакам да го напоменам, а не треба да го заборавиме, е дека во март, кога ќе зборуваме за зголемувањето на минималната плата, ќе бидеме во предизборен период, кога ќе се случуваат многу големи и неочекувани отстапки во буџетирањето и во работењето на компаниите“, вели претседателката на Организацијата на работодавци.
Bloomberg Adria
Трајкоска ги посочува и инфлаторните ризици од растот на платите и во јавниот сектор, на кои предупреди и Меѓународниот монетарен фонд.
„Таа категорија е многу чувствителна, знаеме дека буџетот на државата не се полни онака како што очекуваме, што значи дека ќе доведе до дополнителни задолжувања доколку не внимаваме со растот на платите во јавниот сектор. Владата и синдикатите треба да бидат внимателни во договорите и тоа треба да се одвива правопропорционално со можностите на буџетот“, вели Трајкоска.
.webp){kind=icon}
Во моментов нема коментари за веста. Биди прв да коментира...