Даночната политика игра голема улога за развој на ИТ-индустријата, вели во интервју за „Блумберг Адрија“ Аријана Коскарова, основачка на „Креатив хаб“ (Creative Hub).
„Секогаш правам паралела со Флорида, каде што е нашата локација, во Мајами, бидејќи таму нема државен данок на доход. Тоа не е случај со Калифорнија, каде што има 13 отсто. Ако го земеме за пример Балканот, во Македонија имаше една иницијатива да нема данок на доход за луѓето што работат во ИТ, со цел сето тоа да се стимулира. Меѓутоа мислам дека тоа сè уште не е во функција“, вели Коскарова.
Гледаме дека Џеф Безос и „Амазон“ се селат во Мајами, на Флорида, бидејќи тој смета дека е многу подобро да си во земја каде што немаш данок отколку да плаќаш 13 отсто во Калифорнија.
„Нормално е дека даночната политика ги стимулира ИТ-индустријата и луѓето што работат во неа, како и развојот на софтверите. Така што мислам дека нашите земји во наредните години треба да дадат добар осврт на тоа како би се позиционирале ние за да бидеме поволна земја за развој на ИТ-вештини“, вели Коскарова.
Луѓето сè почесто се одлучуваат за преквалификација. Промената на кариерата често е и поради тоа што луѓето сакаат флексибилна работа.
„Луѓето сакаат кариера што ќе им даде можност да растат. Гледаме дека луѓето избираат кариера не поради поголема плата, туку поради можностите што ги имаат во неа. А нормално е дека ИТ-индустријата, како предводник на сè што е на некој начин дигитална иднина, претставува еден добар предизвик за нив, за да се обидат да изберат кариера дали во дигитален маркетинг, дали програмирање, дали во софтверско тестирање и други области“, вели Коскарова.