ЕЦБ најверојатно ќе ги намали каматите на седницата во април, додека Народната банка на Македонија би почнала со намалување од јуни, вели во интервју за „Блумберг Адрија“, Бојан Цветановски – претседател на „АЦИ Македонија“.
Според него потегот на ЕЦБ и ФЕД на последните седници беше очекуван дека нема да ги променат каматите. Но, за следните чекори и двете банки ќе почекаат потврда дека инфлацијата е во стабилна надолна патека.
Според него, ризици за инфлацијата сè уште носат цените на енергенсите поради геополитичките случувања.
„Моментално примарен ризик кон овој надолен тренд на инфлацијата, односно да имаме неочеувано свртување нагоре е цената на енергенсите на меѓународните пазари. Ние знаеме дека имаме две поголеми жаришта во светот, деновиве е актуелен и конфликтот околу Газа, прво имавме ескалација по што цената на растат започна да расте, сега има преговори за примирје и цената на нафтата се стабилизираше. Тука има примарен ризик доколку дојде до разгорување на конфликтот во Газа може да има значајни консеквенции на цената на нафтата. Цената на нафтата е околу 80 долари за барел, доколку има разгорување на конфликтот може повторно да дојде над 100 долари за барел и да предизвика нови инфлаторни притисоци“, вели претседателот на АЦИ Македонија.
Цветановски го отвора и прашањето – што после намалување на каматните стапки и менаџирањето со вишокот монетарна маса во финансиските системи, инјектиран како последица на претходната долгогодишна политика на ниски камати.
„Намалувањето ќе се случи, гледаме и ЕЦБ и Фед нешто подоцна ќе ги намалат каматите, со тоа што не треба да очекуваме некое драстично намалување, би можело да се очекува циклусот на намалување да биде од 100 до 150 базни поени и кај двете банки, (континуирано да одат по 25 базни поени до вкупно 150 базни поени), но важно ќе биде по намалување на каматните стапки како ќе се контролира онаа монетарна маса, оние монетарни агрегати кои останаа во опсег во еврозоната и во САД како резултат на политиката на монетарен стимул кој во изминатите десетина години, со исклучок на последниве две години, двете централни банки го спроведуваа. И Фед и ЕЦБ спроведуваа политики на ултраниски каматни стапки, откуп на хартии од вредност и обврзници пред време со што инјектираа значителна монетарна маса во финансиските системи на двете економии. Таа маса не е повлечена туку замрзната, постои ризик во ситуација на ниски каматни стапки повторно да влезе во опсег и да ја поттикне побарувачката над потенцијалот за производство“, вели Цветановски.