Со растот на цените на становите, сè повеќе се намалува просечната квадратура на објектите. „Предизвикот на дизајнерите, пак, е како во 50 квадрати да вклопат сè што им е потребно на клиентите“, вели во интервју за „Блумберг Адрија“ Ивана Лазаровска, коосновачка на „Ентериери Лазаровски“ и дизајнерка за внатрешно уредување.
„Во изминатиов период на големо се наметна трендот на сè помали станови, па главната задача е како да направиме едно концептуално идејно решение за таква квадратура, на некој начин да вклопиме 100 квадрати во 50 квадрати. Како да се опремат тие 50 квадрати за да имате сè што ви е потребно. Да се задоволи и потребата од складирање, можам да кажам ние Балканците сме доста склони кон тоа да имаме што е можно поголем простор за складирање. Целта е да ги максимизираме функционалноста и просторот со ограничената квадратура“, вели Лазаровска.
Bloomberg Adria
Таа посочува дека инфлацијата влијаеше и на овој сектор, но побарувачка има и од граѓани и од компании што инвестираат во уредување на деловните простории.
„Цената на 3Д-проектирањето за внатрешно уредување зависи од повеќе фактори - вкупната квадратура што би се проектирала, колку е специфичен просторот, комплексноста, која е намената итн. Во однос на растот на цените, повеќе би кажала, да, има раст на цените и на овие услуги, меѓутоа сепак цената зависи и од тоа што сè вклучува таа понуда, повеќе би кажала дека квалитетот на услугата повеќе ја диктира цената. Цените на мебелот рипнаа многу, што некако направи притисок на клиентите да бараат покреативни решенија, како да го постигнеме тоа што сме го замислиле со ресурсите што ги имаме“, вели таа.
Од аспект, пак, на трендовите за внатрешно уредување што се актуелни во моментов, Лазаровска ги посочува природните материјали.
„Трендови има, ние не би сакале фокусот да го ставаме на трендовите, туку повеќе да го потенцираме стилот. Да се оди кон подолготраен концепт што ќе ни биде убав, удобен и инспиративен подолг временски период. Трендовите се обидуваме да ги вметнеме само во детали, во мал дел каде што само со помош на тие трендови ќе го збогатиме нашиот стил, затоа што верувам и поборник сум кон тоа да не се следат слепо трендовите, туку сепак кога се прави концепт, пристап кон дизајнирање на еден дом, тој дом треба да биде приказна и инспирација на самиот клиент што ќе живеат таму. Трендовите сè повеќе одат кон приближување на природните материјали, приближување на природата и внесување во ентериерот, како што се карпите, кои доста често се застапени во ентериерот и даваат навистина една убава софистицирана нота“, вели таа.