Има време стабилните монети да станат како парите, велат од Мастеркард

И покрај целата врева околу стабилните монети, тие се далеку од тоа да станат одржлива алатка за секојдневно плаќање, според главниот директор за производи на „Мастеркард“ (Mastercard Inc.), Јорн Ламберт.

„Иако технологијата што ги напојува стабилните монети ветува многу - голема брзина, достапност 24/7, ниски трошоци, програмабилност, непроменливост - само овие атрибути не се доволни за да се претвори стабилната монета во алатка за плаќање“, рече Ламберт во понеделник на брифинг со аналитичари. „Исто толку важни, или уште повеќе, се и други атрибути како што се беспрекорно и предвидливо корисничко искуство, дофат и широка дистрибуција до потрошувачите.“

„Мастеркард“ се позиционира како мост помеѓу дигиталните средства и традиционалниот финансиски систем. Ламберт вели дека компанијата може да ја обезбеди инфраструктурата потребна за да ги направи стабилните монети употребливи во голем обем со позајмување мрежни атрибути како што се глобално прифаќање од трговци, безбедносни заштитни мерки и усогласеност со регулативите.

Стратегијата се создавала со години. „Мастеркард“ и  „Виза“ (Visa Inc.) имаат иницијативи за стабилни монети кои датираат од најмалку 2021 година. Неодамна, „Мастеркард“ соработуваше со издавачот на стабилни монети „Паксос“ (Paxos Trust Company LLC) за да им помогне на институциите да „исковаат“ стабилна монета позната како USDG. Исто така, поддржува стабилни монети, вклучувајќи го FIUSD на „Физери“ (Fiserv), PYUSD на „ПејПал“ (PayPal) и USDC на „Сркл“ (Circle), напори што сугерираат дека компаниите за картички гледаат долгорочна можност да станат добавувачи на инфраструктура за стабилни монети.

Ламберт истакна дека денес, околу 90 отсто од обемот на стабилни монети е поврзан со крипто тргување, бидејќи инвеститорите ги користат токените врзани за долар за купување и продажба на дигитални средства. Додека компании како „Шопифај“ (Shopify Inc.) и „Коинбејс“ (Coinbase Global Inc.) презедоа чекори за да ги направат стабилните монети достапни за секојдневни потрошувачки плаќања, Ламберт рече дека пречките како што се прифаќањето од страна на потрошувачите и дополнителните тешкотии при онлајн плаќањето ќе бидат проблеми за решавање во блиска иднина.

Недостасува она што треба да биде дополнителна вредност на потрошувачите за редовни плаќања од корисник на трговец „ѝ така, стабилните монети всушност не прават ништо во оваа равенка“, рече Ламберт. „Ние го сметаме тоа за своевидна припејд картичка. Имате одредено салдо во паричникот, а потоа треба да го користите кај одредени трговци.“

Стабилните монети се претставени како начин за заобиколување на мрежите на картички - и надоместоците поврзани со нив - преку овозможување плаќања од потрошувач до трговец. Картичните мрежи го преформулираат тој наратив, претставувајќи се себеси како партнери кои можат да ја зголемат корисноста на стабилните монети со интегрирање на валутите во нивните мрежи.

„На крајот на краиштата, конверзијата во стабилна монета и излезот од неа секогаш ќе биде таму, во фиат валути, бидејќи тоа се употребливите валути во моментов“, рече Раџ Сешадри, главен директор за комерцијални плаќања во „Мастеркард“. „Трошокот на стабилните монети е само трошокот на стабилните монети, тоа не е цената на стандардните плаќања од еден на друг крај, каде што има разни трошоци, девизен курс, усогласеност со регулативите, порамнување итн.“

Разговорите околу стабилните монет само стануваат сè погласни како што напредува законодавството за нив во САД. Претстојната регулаторна рамка привлече нови учесници во секторот за дигитални средства и ги охрабри финансиските институции да го разгледаат своето место во индустријата во развој. Стана повисок приоритет бидејќи финансиските институции го разгледуваат ризикот средствата да се чуваат како салда на стабилни монети наместо како банкарски депозити.

„Секоја финансиска институција во светот се прашува: „Леле, што треба да правиме тука? Дали треба да нудиме стабилни монети? Дали треба да нудиме депозитни токени? Каква е соодветноста на производот на пазарот?“, рече Ламберт. „Многу издавачи го разгледуваат ова едноставно за да се осигурат дека ги чуваат своите депозити.“

Покрај финансиските институции, владите и централните банки ширум светот размислуваат како да поттикнат иновации во своите домашни екосистеми за да избегнат доларизација на нивните економии. „Ќе видиме дека таа мултипликација ќе се појави со текот на времето“, рече Ламберт.

Во моментов нема коментари за веста. Биди прв да коментира...

Остави коментар