Кина не сака да каска зад САД - разгледува користење на стабилни монети

Кина сè почесто се соочува со повици од економисти и советници да разгледа употреба на стабилни монети (stablecoins) за прекугранични плаќања, додека САД се обидуваат да ја зацврстат доминацијата на доларот преку сè уште новата технологија.

Иако Кина официјално не прифатила стабилни монети – дигитални токени врзани за традиционални валути – и има строга забрана за криптоактивности, неодамнешни изјави од високи претставници на централната банка поттикнаа нови дискусии за нивната потенцијална улога во глобалните плаќања.

Гувернерот на Народната банка на Кина, Пан Гонгшенг, во јуни изјави дека стабилните монети може да ја револуционизираат меѓународната финансиска сцена, особено поради тоа што геополитичките тензии ја покажуваат кревкоста на традиционалните платни системи, кои, како што рече, можат да бидат политизирани и искористени како алатка за санкции.

На ист настан во Шангај, поранешниот гувернер Жоу Сјаочуен рече дека стабилните монети врзани за доларот може да ја олеснат доларизацијата. Други официјални лица од Кина и Хонгконг дискутираа за потенцијалот на стабилни монети врзани за јуанот како дел од долгогодишната стратегија на Кина да ја промовира својата валута на глобално ниво.

Пекинг одамна гледа на криптовалутите како закана за финансиската стабилност и контролата на капиталот. Но економистите сега гледаат можност, делумно поттикната од сѐ појасната поддршка на администрацијата на Доналд Трамп за дигитални токени.

„Морган Стенли“ (Morgan Stanley) предлага Кина да го искористи Хонгконг како експериментална зона за стабилни монети врзани за офшор јуан, кои не би ги прекршувале строгите правила за контрола на капиталот во копнена Кина.

Bloomberg Mercury

 

„Стабилните монети не се нови валути, туку нови канали за дистрибуција на постојните“, вели Робин Синг, главен економист за Кина во „Морган Стенли“. „Клучно е Кина да го прифати трендот на токенизација на државните валути за да ја зачува конкурентноста во дигиталната инфраструктура“.

Само неколку часа пред Пан и другите кинески претставници да зборуваат на форумот на 18 јуни, Сенатот на САД усвои закон за регулирање на стабилните монети – значајна победа за криптоиндустријата и за агендата на претседателот Трамп за дигитални средства.

Министерот за финансии на САД, Скот Бесент, објави на 19 јуни дека стабилните монети можат да ја зајакнат, а не да ја загрозат, доминацијата на доларот. Тој изјави за „Блумберг ТВ“ дека глобалните корисници најверојатно ќе претпочитаат стабилни монети поддржани од САД пред дигиталните валути од централните банки на Европа или Кина, поради поголема доверба во приватниот сектор под американска регулација одошто ризикот од владина контрола каде било на друго место.

 

 

Стабилните монети, најчесто поддржани од традиционални валути и издавани од приватни фирми, добиваат на значење како побрза и поевтина опција за прекугранични плаќања. Повеќето се врзани за доларот и поддржани од американски средства како краткорочни обврзници, со проектирана понуда од 3,7 илјади милијарди долари до 2030 година.

Кинеските економисти сè погласно бараат развој на стабилни монети врзани за јуанот.

„Ако Кина не развие сопствени стабилни монети, ефективно се повлекува од трката за глобална доминација со валута за следната генерација и им ја предава на други“, вели Шен Џиангуанг, главен економист во „Џејди.ком“ (JD.com).

Основачот на „Џејди.ком“, Ричард Лиу, наводно им рекол на вработените дека компанијата ќе аплицира за лиценци за стабилни монети на сите поголеми пазари за да ги намали трошоците за прекугранични плаќања за 90 отсто и времето за порамнување на помалку од 10 секунди.

Хонгконг неодамна воведе сопствена регулаторна рамка за стабилни монети врзани за фиат-валути, со можност за издавање лиценци на оператори. „Џејди.ком“ и „Ент груп“ (Ant Group) се меѓу првите технолошки гиганти што ќе аплицираат.

Исто така, компанијата „Жеџијанг Чајна комодотис“ (Zhejiang China Commodities City Group), која управува со најголемиот пазар на стоки на големо во светот, објави дека исто така ќе бара лиценца.

Офшор стабилните монети врзани за јуанот би ѝ помогнале на Кина да го искористи глобалното незадоволство од доларската доминација, особено по неговата употреба како алатка за притисок врз Русија по инвазијата на Украина.

Иако делот на јуанот во глобалните плаќања е скромен, неговото користење во кинеската трговија достигна над 30 отсто во февруари – највисоко во последната деценија.

Bloomberg Mercury

 

Зголемениот интерес за стабилни валути доаѓа во време кога кинеската дигитална валута e-CNY се бори да добие популарност и дома и во странство. Посебната иницијатива за прекугранични плаќања, mBridge, се соочува со неизвесна иднина откако главниот учесник, Банката за меѓународни порамнувања, се повлече поради загриженост дека би можела да се користи за заобиколување на санкциите.

Гувернерот Пан најави основање меѓународен центар за е-CNY во Шангај, како знак дека Кина сè уште ја гледа дигиталната валута како средство за трговија.

Според Ли Јанг, претседател на Државниот институт за финансии и развој и поранешен советник на НБК, Кина треба да следи „двоен пристап“ за глобализација на јуанот. Тоа би значело продолжување со традиционални методи (како валутни свопови и CIPS-системот) и паралелно користење на финансиските институции во Хонгконг за промоција на стабилни монети врзани за јуанот.

 

Во моментов, стабилните монети најмногу се користат за криптотргување, не за бизнис-плаќања, а регулаторите допрва треба да ги решат ризиците како измами и перење пари.

Конечната глобална позиција на една валута, сепак, зависи од економската моќ и кредибилитетот на државата, не само од новиот технолошки канал, според Лиу Сјаочун од Шангајскиот финансиски институт.

Без пошироки економски реформи, кинеските стабилни монети можат да се соочат со ограничувања.

„Стабилни монети врзани за јуанот, издадени во Хонгконг, тешко дека ќе постигнат успех без обединување на девизниот пазар“, вели Есвар Прасад од универзитетот „Корнел“. „Но тие можат да ја поттикнат Кина кон поголема либерализација и пазарно ориентирани реформи“.