Зошто „Тетер“ ја напушта Европа? - Стабилните монети сè повеќе се прифатени во САД

Американските банки - Банка на Америка (Bank of America), „Ситигруп“ (Citigroup), „ЏП Морган Чејс“ (JPMorgan Chase) и „Велс Фарго“ (Wells Fargo) - се во преговори за заедничко издавање таканаречени стабилни монети. Ваквата идеја подобро би ги заштитила од конкуренцијата што има корист од попријателска регулаторна средина во САД, објави „Волстрит журнал“.

Конгресот на САД моментално е во процес на усвојување на законите Џиниус акт (Genius Act) и Стејбл акт (Stable Act), кои ќе помогнат во промовирањето за широко усвојување на криптовалутите и нивните производи.

„Има смисла банките да соработуваат за производи што би можеле директно да се натпреваруваат со нивните услуги за плаќање и депозитите. Исто така, има смисла да соработуваат едни со други за индивидуално да се заштитат од ризикот од оштетување на репутацијата ако монетите што ги издаваат се користат за финансирање криминал или тероризам“, пишува колумнистот на „Блумберг“, Пол Џ. Дејвис.

„Тетер“ поседува 60 проценти од глобалниот пазар на стабилни монети

Стабилните монети може да се покажат како корисна форма за меѓународни плаќања во иднина, како и место за складирање пари надвор од банките. Нивната главна функција денес е да дејствуваат како отскочна штица за префрлање пари во и од други видови криптовалути. Стабилните монети треба да ја задржат својата вредност во долари и да бидат поддржани од средства слични на готовина, како што се државни записи, акции на фондови на пазарот на капитал или банкарски депозити, објаснува Дејвис.

Околу 60 проценти од глобалниот пазар на стабилни монети е во сопственост на „Тетер“ (Tether), кој ја издава стабилната монета USDT, поддржана од доларот. „Тетер“ е со седиште во Ел Салвадор и е вмешан во неколку правни спора со американската администрација. Доколку Конгресот го усвои новиот закон, неговото работење во САД ќе биде многу повеќе правно регулирано.

Издавачите на стабилни монети станаа многу профитабилни, пишува „Блумберг“, бидејќи ја апсорбираат каматата на резервите што ги користеле за да ги обезбедат своите стабилни монети наместо да им ги исплаќаат на корисниците. Резервите се главно во форма на американски државни обврзници.

Банките сакаат дел од профитот

Законодавството, кое се пробива низ Конгресот на САД, предлага забрана за каматни плаќања за стабилни монети, со што ќе се заштити профитот на постојните играчи. Забраната за камата е поддржана и од банките за да се спречи монетите да се натпреваруваат со фондовите на пазарот на капитал за финансирање, пишува „Блумберг“. Со издавање сопствена стабилна монета, банките би зеле дел од профитот што моментално го генерираат издавачите на стабилни монети.

 

 

Стабилните монети овозможуваат трансфер на долари (или други валути) преку блокчејн наместо преку традиционални финансиски институции. Тие првенствено се користат за трансфер на средства во криптовалути, но се и практична алтернатива на готовина за криминалци и влади под санкции.

МИКА го забранува „Тетер“ во Европа

Во меѓувреме, европскиот крипторегулатор МИКА (MiCA - Markets in Crypto-Assets Regulation) ја забрани најпопуларната стабилна монета USDT на европскиот пазар. Паоло Ардоино, извршен директор на „Тетер“, објави дека компанијата нема да добие лиценца според прописите на МИКА, што би овозможило тргување со USDT во ЕУ.

„Лиценцата МИКА е многу опасна кога станува збор за стабилни монети, а мислам дека е уште поопасна за малите и средните банки во Европа“, изјави извршниот директор на „Тетер“ за „Коинтлеграф“ (Cointelegraph) на конференција во Дубаи. Тој додаде дека банките во регионот би можеле да пропаднат во следните неколку години поради барањата на МИКА.

„Одлучив да не аплицирам за лиценца МИКА бидејќи морам да заштитам повеќе од 400 милиони корисници што ги имаме низ целиот свет. Тие немаат толку среќа како Европејците. Ја сакам Европа, но мислам дека Европската централна банка, за жал, е повеќе заинтересирана за спроведување на дигиталното евро како начин за контрола на луѓето и контрола на тоа како ги трошат своите пари“, рече Паоло Ардоино.

Како што објавивме претходно, криптоберзите во Европа мораа да ги отстранат стабилните монети што не се во согласност со прописите на МИКА. Стабилната монета USDC (и EURC, која го следи еврото) од американската компанија „Сркл“ (Circle) има лиценца МИКА. Според „Блумберг“, „Сркл“ има околу 25 проценти удел на глобалниот пазар на стабилни монети.

Во моментов нема коментари за веста. Биди прв да коментира...

Остави коментар