МИКА наспроти тетер: Берзите ги повлекуваат стабилните криптовалути

„Бајненс“ (Binance), најголемата светска централизирана криптоберза, ќе го оневозможи тргувањето со некои стабилни коини за корисниците во Европската унија. Меѓу нив е убедливо најголемата стабилна криптовалута според пазарната капитализација, USDT, издадена од „Тетер“ (Tether) и всушност позната како тетер .

Во појаснувањето објавено оваа недела, „Бајненс“ се повикува на најновите инструкции од европскиот регулатор ЕСМА (ESMA - European Securities and Markets Authority), кој бара од провајдерите да ги отстранат стабилните валути, кои не се во согласност со европската регулатива МИКА (MiCA - Markets in Crypto-Assets Regulation), од нивните понуди до крајот на првиот квартал од оваа година, односно до крајот на март.

„Се очекува националните надлежни органи да обезбедат усогласеност со правилата што е можно поскоро, а најдоцна до крајот на првиот квартал од 2025 година“, напиша ЕСМА. Со ваквиот потег ЕСМА има за цел да обезбеди координирана акција на национално ниво и да избегне потенцијални нарушувања.

Што им носат промените на корисниците?

„Бајненс“ им препорачува на своите клиенти да ги конвертираат стабилните валути кои не се усогласени со МИКА регулативата (USDT, FDUSD, TUSD, USDP, DAI, AEUR, UST, USTC и PAXG) во стабилни кои се во согласност со европските регулативи и ќе останат на понудата на берзата. Тоа се USDC и EURI. Или, друга опција е да ги претвораат во евра.

„Бајненс“ е најголемата криптоберза на светот. Нејзиното потекло е од Шангај, Кина Bloomberg

Оние кои сакаат да чуваат стабилни монети, кои се врзани со вредноста на американскиот долар, ќе може да ги купат или разменат своите средства во USDC, што го издава американската компанија „Сркл“ (Circle). Тие добија дозвола од регулативата на МИКА.

„Бајненс“ ќе го запре спот тргувањето со USDT и други неусогласени стабилни криптовалути на 31 март и ќе ги отстрани од својата понуда за тргување. Исто така, ќе ги откаже нарачките за нивно купување или продажба.

Четири дена порано, на 27 март, „Бајненс“ ќе ги отстрани и трговските парови во сметките кои содржат некоја од стабилните коини кои не се усогласени со МИКА. „Бајненс“ ги повикува своите корисници „што е можно поскоро да ги конвертираат во USDC сите средства и обврски што ги имаат во стабилите криптовалути, кои не се во согласност со МИКА“.

Корисниците кои нема да ја повлечат сопственоста на овие стабилни монети до 31-ви март сè уште ќе можат да ги разменат за стабилните коини USDC и EURI или во евра, дури и по тој датум.

USDT е веќе повлечен од „Икономи“

„Бајненс“ не е единствената крипто берза која повлекува стабилни коини поради МИКА регулативата.

Словенечката крипто берза „Икономи“ (Iconomi) ја отстрани стабилната криптовалута тетер (Theter - USDT) од својата понуда и го оневозможи тргувањето уште минатиот месец, изјави менаџерот на портфолио на „Икономи“, Марко Павловиќ, за „Блумберг Адрија“. Стабилниот коин PAXG исто така се разгледува за бришење од листата, објасни Павловиќ.

„Икономи“ е регистрирана и во Обединетото Кралство и во Холандија. Клиентите кои имаат сметка во ЕУ спаѓаат под МИКА регулатива, додека клиентите од Велика Британија се под локалното законодавство, а не законодавството на ЕУ, објасни Павловиќ.

Најголемата американска криптоберза, „Коинбејс“ (Coinbase), на своите европски клиенти од почетокот на годината повеќе не им нуди тргување со стабилни коини кои не се во согласност со МИКА. USDT, PAX, PYUSD, GUSD, GYEN и DAI беа отстранети од тргување. Одлуката беше објавена уште во октомври.

Почнувајќи од крајот на јануари, USDT и другите стабилни коини кои не се во согласност со МИКА не се нудат ниту од криптоберзите „Битстамп“ (Bitstamp) и „Крипто.ком“ (Crypto.com). „Битстамп“ ја објави својата одлука да го повлече тргувањето со стабилните криптовалути USDT и PYUSD за своите клиенти во јануари оваа година, известува „Коиндеск“ (coindesk.com).

Криптоберзите „Кракен“ (Kraken) и „Криптомат“ (Kriptomat) сè уште нудат тргување во тетер (USDT).

Регулативата МИКА бара да се поседува овластување за во Европа

Регулативата на ЕУ за криптопазарите (МИКА) бара од издавачите на стабилни коини да добијат овластување од институција за електронски пари во една од земјите-членки на ЕУ како би можеле да работат низ блокот од 27 нации.

Бидејќи „Тетер“ сè уште ја нема добиено потребната лиценца од кој било од регулаторите во ЕУ, криптоберзите мора да ја отстранат неговата табилна криптовалута од нивните понуди. Истото важи и за други издавачи кои немаат добиено лиценца според МИКА регулативата.

Земјите воведоа преодни периоди

Иако МИКА е на сила од крајот на минатата година, европските земји воведоа преодни периоди, до кога давателите на услуги мора да добијат лиценци за работа.

Словенија, Италија, Полска, Литванија, Летонија, Финска и Луксембург избраа шестмесечен преоден рок, односно до крајот на јуни 2025 година. Хрватска избра најдолг период, 18 месеци, Австрија 12 месеци, а Унгарија воопшто нема да има преоден рок, покажуваат податоците на конкретните земји.

ЕСМА: Целта е да се заштитат инвеститорите

„МИКА за прв пат носи заедничка регулаторна рамка за давателите на криптосредства. Сакаме да ги заштитиме луѓето кои сакаат да инвестираат и да поседуваат криптосредства. Сакаме да се увериме дека инвеститорите се соодветно заштитени, дека постои правилно функционален пазар со интегритет. Тоа значи дека мора да има минимални барања за компаниите кои сакаат да добијат лиценца за да ги нудат овие услуги“, рече Верена Рос, претседател на Европскиот регулатор за хартии од вредност и пазари (ЕСМА), во интервју за „Блумберг Адрија“.

Во моментов нема коментари за веста. Биди прв да коментира...

Остави коментар