Новите тарифници во Агенцијата за катастар на недвижности ја разбрануваа јавноста. Сменетата методологија поскапува дел од катастарските услуги, но поскапуваат и услугите на геодетите.
Според Тунџев, методологијата е промената од објективни причини и по опсежни анализи.
„Недвижностите се жива материја и тие и како и електронскиот систем на Агенцијата за катастар ги адаптираме, и ако се појави потреба во иднина истиот да биде адаптиран на новите потреби како на инвеститорите така и на граѓаните, ќе се преиспита целата постапка и ќе се најде соодветна методологија, меѓутоа нема да биде на штета на граѓаните“, вели Тунџев.
Во однос на промените на цените кај катастарските услуги, Тунџев вели дека се однесуваат само на дел од услугите.
„Цените се променети само за првото запишување во јавната книга на недвижности и промената на сопственоста во идните трансакции, вели Борис Тунџев, директор на Агенцијата за катастар на недвижности.
Досега за 1.250 денари се добиваше имотен лист во кој се запишуваа стан, заеднички простории, односно скали и земјиште под зграда. Сега, за секоја од овие недвижности ќе се издава посебен имотен лист кој ќе чини 1.250 денари, и за она што досега се плаќало 1.250, сега ќе се плаќа 3.750 денари. Доколку некој сака да запише и гаражи, ќе треба да додаде дополнителни 1.250 денари.
„Тоа е точна пресметка, и повторно ќе кажам, се однесува само на првата регистрација, по првата регистрација сопственикот на станот може сите тие имотни листи, односно имотниот лист за гаражата, имотниот лист за станот да ги спои во еден имот. А за заедничките простории и за земјиштето, ние предвидуваме, и тоа е предвидено во новото законско решение, дека Агенцијата за катастар на недвижности сето ова ќе го прави по службена должност, односно нема да биде на товар на граѓаните“, вели Тунџев.
Тунџев тврди дека цената за останатите имотни листови останува иста односно 250 денари. Дополнително додава дека се води хајка против Агенцијата за катастар на недвижности
Сменети се три тарифници
„Агенцијата за катастар направи промена на три тарифници. Едниот тарифник се однесува на услугите што ги даваат приватните геодетски компании, а останатите два тарифиника се однесуваат на цените на сервисите кои ги нуди Агенцијата за катастар на недвижности“, објаснува Никола Рибароски, Претседател на Комората за трговски друштва на геодетски работи.
„Нашиот тарифник се менува после 10 години и сметаме дека сега цените се многу пореални од она што беа претходно. Претходно цените немаа никаква економска логика и фирмите работеа со загуба. Но, Агенцијата за катастар на недвижности ја искористи оваа можност, менувајќи го нашиот тарифиник да ги поскапи и сопствените услуги и тоа неосновано и енормно“, вели Рибароски.
Тарифникот за геодетските работи има цени кои ќе бидат зголемени од 30 до 90 отсто, но сега геодетите сметаат дека се тоа реални цени и нема да се одразат на инвеститорите.
„Најголемите инвеститори, во смисла на тие што прават големи станбени згради, новите цени на геодетските услуги нема да им влијаат многу, со оглед на тоа дека во меѓувреме нив им поскапеа, железото, бетонот и многу други работи“, вели Доне Ѓеорѓиев, овластен геодет и управител во „Геотопокат“.
Ѓеоргиев, дополнува дека кај граѓаните кои градат куќи пресметките покажуваат поскапување од 50 евра во однос на геодетскиот елаборат.
„Кога некој граѓанин прави индивидуална куќа со одобрение за градба, ако претходниот елаборат за некоја куќа од 100-120 метри квадратни корисна површина, комплетно со сè ДДВ и со катастарски трошоци изнесуваше негде околу 9.000 денари, сега тоа максимално би стигнало до не повеќе од 12.000 денари“, вели Ѓеоргиев.
Законски измени во процедура
Тунџев, најави законски промени кои ќе бидат во насока на укажувањата на ДКСК која сега гледа коруптивен ризик во Уредбата со која се уредува составот на комисијата во УО на Комората на ТД за геодетски работи. Тунџев, Рибароски и Ѓеорѓиев, зборуваат и за издавањето лиценци, сите детали може поопширно да ги видите во емисијата.