.webp){kind=icon}
„Македонски телеком“ минатата година има нето-добивка нешто поголема од 33,8 милиони евра, што е значителен раст во однос на претходната година, кога изнесуваше 24,4 милиони евра.
„Во 2023 година забележавме извонредни резултати на раст на профитабилноста, кој не се памети во изминатите десетина години. Успехот е дотолку поголем со оглед на фактот што овие резултати ги постигнавме во услови на скромен економски развој во земјата. Скромен економски раст, но исто така и релативно висока инфлација, која и покрај трендот на намалување, остана на доминантно високо ниво“, вели Никола Љушев, главен извршен директор на „Македонски телеком“.
Блумберг Адрија ТВ
Љушев посочува дека „Македонски телеком“ и натаму ја има лидерската позиција на пазарот на електронски комуникации во Македонија.
„Според интерните процени, ’Македонски телеком’ има пазарен удел од околу 50 отсто од сите приходи што се генерираат во телекомуникацискиот пазар, околу 60 отсто од вкупната пазарна профитабилност и исто толкав е уделот од вкупно генерираните парични текови“, вели Љушев.
Тој додава дека во 2023 година, споредено со претходната година, компанијата има извонредно добар развој на оперативната добивка пред камати, оданочување и амортизација.
„ЕБИТДА забележа двоцифрен раст од 10 до 11 проценти, а нето-добивката порасна околу 40 отсто. Главниот двигател на растот на ЕБИТДА во 2023 година доаѓа од растот на директната маргина и е поврзан со растот на суштинските сервисни приходи на ’Македонски телеком’, а во помал дел од заштедите на електрична енергија и другите оперативни расходи“, вели Љушев.
3Г-технологијата оди во историја
Љушев посочува дека компанијата и натаму ќе работи на развој на дигитални технологии.
„Планираме и понатаму да се фокусираме силно на 5Г и негова монетизација, планираме да ја пратиме во историја или во пензионирање 3Г, која функционираше повеќе од 15 години. Во фиксната ќе продолжиме да ја шириме оптичката мрежа, забрзано да ги мигрираме корисниците од бакарни кабли на оптика. Имено, целта е урбаните делови на градот Скопје да ги ослободиме од старите бакарни кабли, а со тоа обезбедиме поквалитетна и подоверливи услуга“, вели Љушев.
Тој додава дека планираат да обезбедат и повисоко ниво во услугите што ги испорачуваат во домот преку нова мултимедијална ТВ-платформа со модерен кориснички интерфејс, но и да се поставуваат нови супермодерни рутери што ќе овозможуваат управување на домашните вајфај-мрежи преку мобилна апликација.
