.webp){kind=icon}
Македонија заостанува во воведувањето на ЕСГ-стандардите, но процесот ќе мора да се забрза бидејќи тоа го налагаат и светските стандарди, кои неизбежно ќе мора да се следат, вели Климе Попоски, генерален директор на „Винер – Виена иншуренс груп Скопје“.
„Во следниот период, како осигурителни компании, ќе се соочиме со барањата на реосигурителните компании што нудат реосигурителни услуги за покривање поголеми ризици на кои се изложуваат домашните осигурителни компании. Односно ќе се најдеме во ситуација кога во делот на преземањето на големите корпоративни клиенти нема да може да добиеме адекватно реосигурително покритие ако во приемот на осигурувањето и во продажбата на нашите полиси не се почитуваат принципите на ЕСГ. Притоа, истите тие треба да се почитуваат не само од аспект на осигурителната компанија туку и од аспект на корпоративните клиенти. Прашање на време е дали ќе може најголемите загадувачи да најдат соодветно осигурување, како што е на пример РЕК Битола, која е наш најголем загадувач“, вели Попоски.
Блумберг Адрија ТВ
Дигитализацијата е уште еден предизвик за компаниите од осигурителниот бизнис. Според Поповски, во последните две години осигурителните компании во Македонија полека ги препознаваат придобивките од дигитализацијата, бидејќи таа не значи само онлајн продажба на некои услуги туку се користи и при решавање штети.
„Она што е револуционерен исчекор е превенцијата на реализација на ризици. Она што осигурителната индустрија најмногу придонесува во примената на вештачка интелигенција, на машинско учење, е токму во превенцијата и учењето на осигурениците како да се однесуваат во справувањето со ризиците, како да плаќаат пониска премија доколку адекватно ги управуваат своите ризици“, вели Попоски.
Попоски додава дека воведувањето на меѓународните сметководствени стандарди во Македонија претставува револуционерна промена во сметководствениот третман на осигурителните договори и во начинот на кој тие треба да се прикажат во финансиските извештаи.
„Тоа значи поголема транспарентност, пореално прикажување на приходите и расходите и пореално мерење на профитабилноста на секој осигурителен договор. Секоја осигурителна компанија треба да го трансформира целокупно своето сметководство преку аплицирање софистицирани софтверски модели и пред сè со ангажирање стручни лица од сметководствената професија, кои треба да ги совладаат методите и техниките“, вели Попоски.
Поскапување на автоодговорноста
Попоски вели дека во 2023 година поради сите влијанија на инфлаторните движења, кои пред сè го погодија таканареченото моторно осигурување, и во услови кога има регулирана цена на автоодговорноста, а притоа се знае дека автоодговорноста е 50 отсто од целокупниот бизнис, а цените 20 години се непроменети, нема очекувања дека автоодговорноста може да биде генератор на профитабилност.
„Цената не е веќе одржлива и нашите очекувања за 2024 година се дека по изборите очекуваме да имаме партнер во Владата и заедно со Агенцијата за супервизија на осигурување да извршиме ревизија на ценовната политика во автоодговорноста“, вели Попоски.
