Додека дебатите околу ефективноста од осумчасовното работно време се разгоруваат на глобално ниво, а се тестираат и ефектите од скратена работна седмица, Македонија се чини е далеку од идејата за скратено работно време.
Според претседателката на Центарот за микро, мали и средни претпријатија при Стопанската комора, Габриела Кулебанова, причина се ниската конкурентност и дефицитот од кадар.
„Ние како држава сме најниско на скалилото на продуктивноста во однос на регионот, а да не зборуваме во однос на ЕУ. Во согласност со истражувањата на ’Евростат’, македонскиот работник придонесува во само 43 проценти во однос на еден вработен споредено со просекот на ЕУ. Секако, кога зборуваме во однос на продуктивноста ги бараме причините и во самите менаџери на компании и самите вработени, меѓутоа кај нас во последните години имаме еден деформиран вредносен систем, кој мора да го исправиме. Луѓето во светот напредуваа со користење на вештачката интелигенција, а ние уште зборуваме за неквалитетните образовни процеси и диспропорцијата меѓу кадарот што го креира образованието и потребите на стопанството“, вели Кулебанова.
Блумберг Адрија ТВ
Кулебанова вели дебатата за скратено работно време или скратена седмица сè уште не е сериозно отворена во земјава, но скептична е дека македонското стопанство би можело да си го дозволи тоа.
„Кај нас сè уште нема таква најава, кога разговараме во рамките на бизнисот во Комората немаме некаков конкретен став и одговор во моментов затоа што треба да ги исправиме клучните работи, бидејќи нивото на животниот стандард, растот и развојот нашето стопанство се далеку од регионот. Прво во балтичките земји Шведска, Данска се воведоа овие скратени работни денови, меѓутоа таму има доста голема продуктивност. Но и таму во одредени пилот-проекти некаде се покажаа позитивни резултати, а некаде не. Гледаме сега во последно време, еве, и Грција прави пилот-проекти, меѓутоа сè уште ниту развиени индустриски економии како Германија го немаат целосно имплементирано тоа. Така што сметам дека ние во моментов сме далеку од таква имплементација“, вели Кулебанова.
Блумберг Адрија ТВ
Таа посочува дека за подобра бизнис-клима и зајакнување на стопанството, на земјава ѝ недостигаат и реформи и резултати во владеењето на правото и борбата со корупцијата, како и воведување ефикасен правен систем без административни бариери што ги кочат компаниите.
„Ние децидно им ги кажавме ’црвените линии’ на сите партии во предизборниот процес. Сега веќе ги завршивме двојните избори, а во моментот апелираме сега и веднаш да се стави фокусот на економските цели во државата, да се фокусираме кон подигнување на економскиот развој и само тоа да биде приоритет на следната влада. Очекувањата се големи бидејќи добија голема поддршка од народот, меѓутоа она кон што треба веднаш да се пристапи е намалување на корупцијата и намалување на бирократските процедури што ги кочат компаниите, особено оние што се во вадење разни дозволи и одобренија… Значи, ние се враќаме кон некои елементарни вредности и бараме комплетен дефокус од дневнополитичките настани и фокус на економскиот развој на државата“, вели претседателката на Центарот за микро, мали и средни претпријатија.
.webp){kind=icon}
