.webp){kind=icon}
Во изминатите неколку години на Македонија и недостасува промоција на туризмот а тоа е резултат пред сè на намалување на буџетот на Агенцијата за промоција и поддршка на туризмот, вели Љупчо Јаневски, универзитетски професор во интервју за „Блумберг Адрија“.
Додава дека во 2024 година нема да бидеме толку видливи на туристичката европска мапа, но земјата ќе биде и недоволно конкурентна дури и со земјите на Отворен Балкан коишто веќе се позиционираат многу високо на туристичката светска мапа.
„Во 2023 година Србија го имаше најголемиот раст во бројот на остварени ноќевања во светот, споредбено со 2019 година тој изнесуваше 66 проценти раст а знаеме каде е Албанија како светски европски хит во туристичката индустрија, вели Јаневски. Додава дека, сепак оваа состојба не треба да ни биде „хендикеп“ туку мотив.
Блумберг Адрија ТВ
„Треба да има поголем број на кружни патувања, поголем престој на туристите во нашата дестинација и да овозможиме брзо обновување на инфраструктурата. Во 2025-та година треба да имаме национална кампања за развој на туризмот, што поголема присутност на стратешките пазари“, додава Јаневски.
Јаневски објаснува дека после короната има нова туристичка реалност којашто ги подобрува резултатите во потрошувачката на туристите во самата дестинација и по нејзиниот просечен престој во дестинацијата. Генерално гледано 2024 година ќе донесе раст на туристите, сезона е веќе почната од велигденските празници и се забележува дека има поголем број на туристи во Охрид. Тој смета дека годинава се очекува да имаме раст во туристичкиот сектор, но сепак проценките се дека тоа ќе биде послаб раст во однос на регионот.
„Во 2023 година забележавме 598,5 милиони долари промет и приближно стигнавме до 4,8 проценти од вкупниот број на вработени во туристичко-угостителскиот сектор во нашето држава, вели Јаневски.
Додава дека е важно во преговорите за 2025 година да се обезбедат дополнителни чартер летови.
„Се надевам дека и летовите коишто беа намалени на охридскиот и скопскиот аеродром од Визер, ќе имаат но не толку големо влијание за туристичката сезона 2024, вели Јаневски.
Тој посочува дека последната стратегија којашто е изработена во Македонија за овој сектор е со важење до 2020-2021 година. Стратегија која е изготвена во 2015 година.
„После тоа ние воопшто и немаме туристичка стратегија и се приспособуваме на состојбите со стратегии коишто се оперативи. Се надевам дека 2025-та година ќе ја промовираме новата стратегија. Во истата стратегија треба повеќе да се фокусираме кон создавањето на нови туристички производи овозможување подобри услови на инвеститорите да инвестираат во нови сместувачки капацитети не само во Охрид, не само во главниот град Скопје туку во останатите други градови, вели Јаневски.
Посочува дека е важно се повеќе да зборуваме и да се реализира одржливост на дестинациите и развивање на алтернативните форми на туристичка понуда. „Околу 13 отсто се заштитени еко зони и национални паркови коишто требаме да ги искористиме вистински начин, вели Јаневски. Тој заклучува дека потребата од работната сила ќе биде круцијална во развојот на туристичкиот сектор во Македонија.
