Пет нови апликации за патувања што заштедуваат пари и време

Долго пред појавата на апликацијата ЧетГПТ (ChatGPT) моравте да посетите туристичка агенција за да ја осмислите и резервирате вашата идеална рута. Сепак, реалноста е дека повеќето патници летово нема да разговараат со туристички агенти лице в лице, па дури ни онлајн. Наместо тоа, алатките со генеративна вештачка интелигенција сè повеќе ќе играат улога во помагањето околу одлуката каде да се патува. Истражување од 2024 година на глобалната консултантска фирма ОВ (Oliver Wyman LLC) покажа дека над 41 процент од патниците од САД и Канада неодамна ја користеле оваа нова технологија за инспирација и креирање патувања, што е пораст од 30 проценти во однос на претходната година. Една туристичка агенција ја прифаќа таа неминовност, користејќи вештачка интелигенција за да ви помогне вашите емоции да ги претворите во доживувања.

Дигиталниот асистент ќе избере плажа според вашите параметри и, соодветно, дестинација Фото: Depositphotos

Ако најновите алатки за планирање патувања можат да служат како показател, тогаш тој процент сигурно ќе расте. Огромното унапредување на јазичните модели со вештачка интелигенција брзо се приспособува на начинот на кој ги истражуваме нашите одмори. Земете го за пример Џем (Gem), виртуелен туристички агент поддржан од „Гугл“, или „Мајндтрип“ (Mindtrip), колаборативна алатка што ви помага да планирате патувања со пријатели – втората дури користи слики од Инстаграм (Instagram) како инспирација. Други алатки со вештачка интелигенција им помагаат на патниците да ги најдат најдобрите цени за хотели и авионски билети.

Секако, моделите со вештачка интелигенција сè уште не можат да се мерат со моќта на човечките туристички советници, кои имаат чувство за дестинациите и можат прецизно да ги разберат вашите желби, но значително напреднаа. Еве ги најновите алатки што ги тестиравме пред летната сезона и што најмногу ни користеше.

Од 2023 година, „Гугл“ постепено ги проширува можностите на Џеминај (Gemini), својот асистент со вештачка интелигенција. Бесплатен со гугл-профил, Џеминај сега ви овозможува да креирате персонализиран Џем за вашите патувања – всушност дигитален „консиерж“ што ги помни вашите преференции, без разлика дали сте љубител на модерна уметност, авантури надвор од туристичките патеки или локална кујна. За разлика од пребарувањето на Гугл, кое се истакнува во давање статични информации, Џеминај е дизајниран за отворено „разговорно размислување“, дури и кога почнувате со нејасна идеја, користејќи ги податоците од личниот профил што сте му ги дале.

Џеминај, се разбира, се поврзува со вашиот Џимејл (Gmail), Гугл драјв (Google Drive), мапи, летови, хотели, па дури и Јутјуб. Тоа значи дека вашите потврди за резервации и извори на инспирација можат да постојат во еден екосистем и да се споделуваат со еден клик.

Google Gemini ми препорача да го посетам археолошкото наоѓалиште на Маите во Сан Игнасио за време на моето патување во Белизе Фото: Depositphotos

Откако го поставив мојот Џем и ги внесов моите конкретни патни преференции – природа наместо музеи, бутик-хотели наместо големи брендови и без премногу туристички атракции – побарав да ми испланира долга, четиридневна викенд-тура од Вашингтон до Белизе, дестинација што добро ја познавам. Дополнителни параметри: динамичната локална гастросцена и активности на отворено специфични за таа земја.

Џеминај предложи престој во планинскиот град Сан Игнасио, со еднодневен излет на островот Кај Калкер. Итинерарот се базираше главно на мајански локалитети и уникатни сместувања во џунглата, кои беа подалеку отколку што би сакала, со напомена дека можам да изберам бутик-хотел поблиску до градот. Исто така, не ја зеде предвид оддалеченоста кога го вметна излетот на островот во истиот ден кога беше мојот повратен лет од Белизе.

Кога појаснив дека повеќе ме интересираат планинарење и нуркање, Џеминај ме пренасочи кон селото Хопкинс наместо Сан Игнасио. Со пристап до гребенот и културолошки искуства што ги нуди локалната автохтона заедница Гарифуна, ова беше многу подобра опција. Повтореното барање даде целосно различно (но еднакво веродостојно) упатство, што е потсетник дека овие модели не произведуваат секогаш идентични резултати.

Кога станав уште попрецизна, барајќи „искуства водени од заедницата“ во Хопкинс, Сан Игнасио и Кај Калкер, наидов на ограничување: културолошките тури во помалите градови на Белизе често постојат неформално, рече мојот ВИ-асистент – се пренесуваат усно или преку локални мрежи, а не преку интернет. Потоа ми даде специфични термини за пребарување и ми препорача да се распрашам додека сум таму.

Алатките за вештачка интелигенција, исто така, даваат препораки за активности на отворено што се уникатни за конкретна земја Фото: Depositphotos

За разлика од универзалните четботови, Мајндтрип е направен специјално за планирање патувања, комбинирајќи генеративна вештачка интелигенција со содржини верифицирани од реален тим соработници, со визуелен интерфејс што прикажува мапи, рецензии и слики на еден екран. На почетокот алатката бара основни лични информации и патни преференции, на пример дали сте ранобудник или ноќна птица, што помага во попрецизно дефинирање на препораките, кои се извлекуваат од пребарување и од библиотека со околу 25.000 рачно одбрани водичи за дестинации. Потоа можете да разговарате со дигиталниот асистент за понатамошно прецизирање на опциите. Користете едноставно мени од левата страна за да додавате места од интерес и да го промените нивниот редослед што се наоѓа од десната страна, со едноставно влечење. Можете дури и да поканите роднини или пријатели да се приклучат, за да го дизајнирате патувањето заедно.

„Голем дел од она што се случува во генеративната вештачка интелигенција е многу текстуално“, вели Мишел Деногеан, маркетинг-директорка на Мајндтрип. Резултатите од Мајндтрип се прикажуваат на поделен екран – нумерирана листа се појавува лево, со задебелен текст покрај препорачаните места и активности, додека десно се појавува мапа во боја со сите тие локации. Неговата вредност станува уште појасна кога ќе поставите конкретно прашање. Кога барав искуства поврзани со локални заедници во Хопкинс, Сан Игнасио и Кај Калкер, Мајндрип го надмина Џеминај на Гугл.

Скриени понуди веднаш се истражуваат и се вклопуваат во маршрутите од страна на дигиталните асистенти Фото: Depositphotos

Во Хопкинс го прикажа центарот за тапани „Лебеха“, популарно место за часови по тапани „гарифуна“. Исто така го препорача екокултурниот и исцелувачки институт „Палменто Гроув Гарифуна“, каде што на претходно патување научив да приготвувам худут – рибја чорба на база од кокос, која се служи со пире од банани.

Во Сан Игнасио го препорача „Аџав чоколејт“, каде што можете сами да направите чоколадо и да научите за историјата на какаото во Белизе, како и да го посетите саботниот зелен пазар во градот. Сметав дека неговите резултати се попрецизни од некои конкуренти – успеа да означи дека некои ресторани спомнати во статиите што ги читав што се трајно затворени, благодарение на својата „војска“ за проверка на факти што редовно ги ажурира листите.

Ова е едноставно и корисно. Ако веќе сте запознаени со следењето на цените за авионски летови преку Гугл, ќе ви се допадне тоа што од март можете истото тоа да го правите и за хотели. Посетете ја Гугл-страницата за пребарување хотели, внесете дестинација и датуми и вклучете ја опцијата „следење на цените на хотелите“.

„Кајак“ (Kayak) нуди слична алатка за следење на цените на хотелите. Почнете пребарување за одредено место и ќе ја пронајдете опцијата да добивате известувања кога ќе се променат цените, на врвот од страницата со резултати.

Дали некогаш сте зачувале рил на Инстаграм со надеж дека ќе го повторите во патување или ќе пробате некоја активност што сте ја виделе? Новата алатка Трип мечинг (Trip Matching) од Експидија (Expedia Group Inc.) има токму таква цел. Отворете го видеото (reel), кликнете на копчето за споделување и испратете го директно до @expedia во апликацијата на Инстаграм. Потоа отворете ја својата директна порака со Експидија и за неколку минути ќе добиете предлог базиран на содржината од видеото што сте го споделиле.

Ако сакате да ја почувствувате магијата на Маракеш, асистентот за вештачка интелигенција ќе ви препорача посета на пазарот за зачини Фото: Depositphotos

Јас го тестирав овој процес со едно видео што го направив за време на моето патување во Мароко во 2023 година, кое едноставно прикажува настап на двајца гитаристи во луксузен семеен бутик-хотел во Маракеш. Експидија генерираше краток опис на хотелот, најдобро време за посета и листа на најважни активности што треба да се направат во тој регион, со линкови до тие активности, како и скриени места и четиридневен планер „за да ја доживеете магијата на Маракеш без брзање“.

Недостаток: не беа вклучени конкретни туристички провајдери или директни линкови до хотелот, така што тој дополнителен дел од истражувањето треба сами да го направите. Предлозите беа насочени кон културни активности, вклучувајќи истражување на Медина, спа-третман во амам и часови по готвење мароканска кујна, но беа предложени и „скриени бисери“ како Тајната градина (Jardin Secret), помалку посетена алтернатива за градината Мажорел (Jardin Majorelle).

Кога понатаму истражував и барав конкретни провајдери преку кои можам да резервирам, ми беше кажано да контактирам директно со изведувачите – Ла мезон Араб за часови по готвење, „Лес Бенс де Маракеш“ и „Спа ројал Мансур“ – или да отидам на Експидија. Тоа ја прави оваа алатка повеќе како забавно почетно место отколку сеопфатно решение.

Шармот на Индија по ниски цени - Going ми заштеди пари на летот до Њу Делхи Фото: Depositphotos

Ова не е вештачка интелигенција, но дефинитивно вреди да се преземе ако внимателно ги следите цените на авионските билети – како што прават многу луѓе летово. Бесплатната верзија на апликацијата Гоинг (Going) ќе ви испраќа известувања кога ќе се појават поволни понуди за домашни летови, а исто така ќе ви овозможи да следите конкретни рути за одредени датуми. Премиум претплатата од 4,08 долари месечно додава известувања за меѓународни понуди, вклучувајќи и „грешки во цените“ што понекогаш се појавуваат со екстремно високи попусти, додека членството „елит“ (Elite) од 16,58 долари месечно додава понуди за карти во бизнис и прва класа. Уште една нова функција, „Гоинг вит поинтс“ (Going With Points) ви помага да најдете и резервирате летови со бонус поени и милји.

Откако се пријавив за пробниот период на премиум членството минатата недела, апликацијата ми испрати понуда за „грешка во цената“ од 453 долари за повратен лет во економска класа до Њу Делхи – повратен лет од Сан Франциско со „Ер Индија“ (Air India), со едно преседнување, резервиран преку „Гугл флајтс“ (Google Flights) – плус повратен лет од 265 долари до Костарика, за кој добив препорака за резервација во рок од два дена.

Не сте на апликацијата? Пријавете се на веб-страницата на Гоинг и ќе почнете да добивате вакви известувања и преку е-пошта.

Во моментов нема коментари за веста. Биди прв да коментира...

Остави коментар