Луксузната мода во светот се враќа на голема врата, но нашиот регион и натаму нема економска стабилност за тоа да стане некој приоритет, вели Ивана Кнез сопственичка и главна дизјнерка на „Lovecats Drama“.
„Сметам дека сè уште владее принципот на брза и наменска мода кај нас. Наменската мода доминира и веројатно е еден од главните загадувачи на околината“, посочува Кнез.
Се работи на тоа да се воведе екомода, но сепак капиталистичкиот начин на конзумеризам наметнува воопшто да не се внимава на последиците коишто консумеризмот ги носи.
„Не знам во кого треба да се впери прст, но сметам дека сепак конзумеризмот е клучен“, нагласува Кнез.
Таа смета дека во светот повеќе е актуелизирана едукацијата за моден дизајн, додека во Македонија сето тоа е маргинализирано и е повеќе на ниво на хоби отколку на вистинско образование и едукација.
„Имам завршено академија во Белград и имам академско образование, но како што гледам во денешено време модата сè повеќе се сведува на инфлуенсерство, на забава. Сето тоа придонесува да се оди во погрешен правец на модниот дизајн“, вели Кнез.
Ивана Кнез (ТВ гостување)
Bloomberg Adria
Има многу пречки кои сè уште ќе мора да се совладаат. Кнез смета дека образованието треба да ја подигне свеста, дека не треба да девалвира вредноста на оваа професија.
„Сепак носиме многу убавини во светот ако се презентираме на вистински начин. А кај нас постои некој правец на тенденциозна наменска мода која доминира во моментов. Се дотеруваме од прослава на прослава, а секојдневно не се внимава за тоа што се облекува. Најмногу сметам дека тоа е поттикнато од моменталната економска ситуација во Македонија, но и од тоа како политичарите и Владата се однесуваат кон културата“, вели Кнез.
Таа додава дека модата и костимот се дел од културата и треба им се посвети внимание и време, како и финансии и инвестиции за истите да растат и да се развиваат.
„Ако во еден момент Штип можеше да биде најсилен град во Југославија сега е веројатно некаде на последно место. Значи простор има, само треба да се работи на тоа“, нагласува Кнез.
Таа изрази надеж дека Министерството за култура ќе вложи малку повеќе време, внимание и финансии кон подобрување на развојот на модата и костимот, бидејќи костимот е доста маргинализран кај нас и за извесни проекти кои ја промовираат модата и потребата за квалитет.
„Можеби трендот којшто треба да се наметне е тренд на бавен конзумеризам каде што ќе се фокусираме на парчиња коишто ќе ги носиме многу подолг временски период, ќе имаат висок квалитет и одржливост, временски ќе бидат одржливи, отколку онаа 'облечи и фрли' гардероба“, вели Кнез.
.webp){kind=icon}
Во моментов нема коментари за веста. Биди прв да коментира...