Како треба да изгледаат џентлмените денес?

Облечен е во добро скроен елегантен костум, со бела кошула и класична вратоврска, со уредно обликувана коса и со негувана брада. Ваков опис ни даде ЧетГПТ за фотографијата на која ни прикажа како го замислува модерниот џентлмен денес. 

Џентлменството не е само прашање на облекување и однесување туку и начин на живот, но овој пат сакавме да се фокусираме исклучиво на визуелниот дел, па побаравме уште неколку практични совети за дотерување засновани на вештачката интелигенција. 

„Џентлмените не треба постојано да се формално облечени, освен кога настанот го наметнува тоа и во тој случај добро усогласениот костум е задолжителен“, ни одговори популарниот четбот кога го прашавме за совршен машки изглед. 

Уште поконкретен беше со предлозите за паметниот лежерен стил, па ни напиша дека никогаш нема да погрешиме со панталони чино и темни фармерки, во комбинација со кошула со раскопчана јака или со лесно спортско палто. За обувките, пак, ни нагласи секогаш да бидат минималистички. Мора да се висококвалитетни патики или полирани чевли, во зависност од пригодата. 

ЧетГПТ ни откри и кои модни додатоци се најсоодветни за џентлмените денес и за само неколку секунди ни ја понуди следната листа: добар часовник, суптилен накит, добро одбрани очила за сонце и стилизирана чанта или паричник за комплетирање на изгледот.

Советите што ни ги даде попопуларната апликација, која овозможува комуникација на природен човечки јазик, не се разликуваат многу од оние што ни ги дадоа експертите и претприемачите што со своите бизниси директно му се обраќаат на денешниот современ маж. 

Македонскиот моден дизајнер и професор Никола Ефтимов прво хронолошки ни го објасни изгледот на денешниот џентлмен. Тој ни кажа дека изгледот е резултат на историскиот развој на машката облека, особено во последните два века, кога се стабилизирале одредени типови облека, модни додатоци, бои и материјали. Тој посочува дека со променетиот животен стил во последните децении се зголемила понудата од аспект на облека и модни додатоци, но и употребата на нови материјали како резултат на технолошкиот развој. 

Никола Ефтимов, моден дизајнер и професор Фото: Горјан Николенко

„Денешниот џентлмен води динамичен живот, а изгледите треба да го следат во различни пригоди. Покрај одмерениот стил, игривиот неодендизам на елегантните мажи што гравитираат околу ’Пити уомо’ (Pitti Uomo) во Фиренца е доказ за можната свежина и креативност во овој сегмент на модната понуда“, раскажува Ефтимов за „Блумберг Адрија“. 

Топ 3 совети за совршен избор

Го прашавме кои есенцијални парчиња треба секој маж да ги има во својот плакар, каков деловен накит може да одигра клучна улога во изразувањето елеганција и професионализам, но и кои обувки овозможуваат удобност и самодоверба во текот на целиот ден. Тој ни ги даде следните три совети: 

- Без разлика на типовите кроеви на сакото, панталоните и евентуално елекот, кои исто така би требало да бидат приспособени на градбата на телото, изборот на материјалот е од пресудно значење. Од неговиот квалитет, боја или тип на ткаење, заедно со квалитетот на изведбата, зависи и изгледот на костумот, приспособеноста на телесната градба и соодветноста за одредена пригода. Сè уште се релативно стабилни кодексите на облекување, па тие го диктираат изборот на костумот според пригодата. Квалитетно сошиените костуми по мера знаат многу да раскажат за софистицираноста на еден џентлмен. Смокингот би требало да биде дел од гардеробата на секој елегантен маж.

- Според личниот карактер, професијата и пригодата, деловниот накит и пошироко модните додатоци даваат можност за заокружување на изгледот. Постои накит што според својот дизајн би можел да покрие различни пригоди во текот на денот и ноќта. Во тој случај најчесто станува збор за неутрални решенија, но одредени типови украсни копчиња за манжетни, декоративни значки и игли, клипови за вратоврски или прстени, сепак, се резервирани за специјални пригоди. 

- Најдобрите италијански производители на чевли, без разлика дали станува збор за производи во серија или рачно изработени обувки по мера, еднакво водат сметка за визуелниот/дизајнерски аспект и удобноста на чевлите. Во овој случај станува збор за повеќевековна традиција на изработка обувки и кожени производи воопшто, во симбиоза со анатомски студии на стапалата, кои се рецепт за изработка на удобни чевли. Во последните децении, поради промената на животниот стил и сè погласните пропоненти на одржливата и ненасилна мода, на пазарот се присутни чевли изработени според традиционалните технолошки процеси со нови материјали. Добар пример за тој тренд се класичните вегански чевли на „Солари Милано“ (Solari Milano). При изборот на обувките треба да се внимава на пригодата и типот облека со кои се комбинираат, а за нивниот долг употребен век и убав изглед се неопходни постојана грижа и третирање на обувките. На пазарите се присутни и куќните обувки, честопати изработени од фино кадифе и други материјали и украсени со везови. 

Signori

Клучни препораки 

Ефтимов потсетува дека во гардеробата на секој џентлмен треба да постојат различни костуми, сакоа и панталони што ја даваат основата на изгледот. Неутралните решенија овозможуваат поголеми можности за градење различни комбинации и индивидуализирање на изгледот. Белите кошули и кошулите со дискретни бои и дезени изработени од квалитетни памучни ткаенини се, исто така, базични парчиња облека во елегантното машко облекување. 

Тој објаснува дека модните додатоци и чевлите со висок квалитет на материјалите и изведбата се од пресудно значење за дефинирање на изгледот. Голема улога играат украсните шамичиња, шаловите, марамите, различните типови вратоврски, капите и шапките, ракавиците, коланите, трегерите, чантите и очилата, а за некои од дневните и порелаксирани пригоди, чорапите со поигриви дизајни знаат да направат убав акцент. 

Во однос на личниот избор на облеката и додатоците, Ефтимов нагласува дека покрај кодексот на облекување и телесната градба, од исклучителна важност е чувството на пријатност и поврзаност со одредени кроеви, материјали, дезени и дизајн на додатоци. 

„Облеката и искреираниот изглед се израз на личноста, а не наметнат стил на облекување“, завршува тој. 

За тоа како треба да изгледа еден џентлмен денес, „Блумберг Адрија“ претходно разговараше и со Ненад Пантовиќ, еден од сопствениците на македонската компанија „Сињори“ (Signori), која создава уникатни машки костуми по мера и која мошне успешно ја гради својата приказна и надвор од границите. Пантовиќ и неговиот бизнис-партнер тогаш ни ги дадоа следните три препораки:

- Одлучете се за добро поставена облека, која ја дополнува формата на вашето тело.

- Обрнете внимание на деталите, како додатоци и обувки, за да го комплетирате изгледот.

- Одберете класични и безвременски парчиња што го отсликуваат вашиот личен стил.