Како климатската криза засекогаш ќе го промени пазарот на луксузот?

Невозможно е да се игнорираат ефектите од климатските промени, кои сè повеќе се рефлектираат и врз пазарот на луксузот. Потрошувачите стануваат сè погласни во барањата за транспарентност кога станува збор за одржливоста и етичноста на луксузните брендови, па и оваа индустрија е во потрага по иновативни алатки со кои долгорочно би се намалило штетното влијание на околината. 

„Сите компании, вклучувајќи ги и луксузните брендови, ќе ги трпат промените од климатската криза. Нагласувам криза, зашто ова веќе не е климатска промена, особено гледајќи ги податоците што ги имаме на нашата апликација“, вели Горјан Јовановски, креатор на најголемата платформа за климатски податоци во светот „Ерткер аи“ (EarthCare.ai).

Горјан Јовановски Bloomberg Businessweek Adria

Јовановски за „Блумберг Адрија“ објаснува како климатските промени конкретно влијаат на луксузните брендови, но и на кој начин ќе ја редифинираат нивната работа во иднина. 

„Бројот на пожари, поплави, суши, бури и други природни непогоди се зголемува секоја година, а тоа влијае врз синџирот на набавки на секоја фирма. Сите суровини и основни производи што ги користат овие луксузни брендови може да се најдат под опасност од нарушување и прекин поради вакви нестабилни климатски фактори. Помалку суровини значат помалку производство, помалку продажба, односно помалку профит“, нагласува тој.

Јовановски вели дека климатската криза може да има два ефекта врз пазарот на луксузот. Со намалувањето на производството, цената на тоа што ќе се произведува може да се зголеми дополнително ако побарувачката на пазарот остане иста. Од друга страна, пак, тој смета дека луксузните брендови што ќе се осврнат на зелени производствени процеси и набавка на материјали, а ќе можат истото тоа да го докажат, ќе станат многу побарани од новата генерација, која дури сега почнува да располага со капитал. 

Bloomberg

„Тие ќе бидат двигателите на луксузната индустрија, а бидејќи се растени во свет што се стреми да биде зелен, ретко ќе поддржат бренд што не ги следи истите вредности“, прогнозира овој млад претприемач, кој „Блумберг Адрија“ го избра во топ 50 највлијателни луѓе во регионот во 2023 година. 

Јовановски е соосновач на „Ерткер аи“, платформа што овозможува подостапен, централизиран пристап до климатските податоци и неопходните информации за животната средина на светско ниво. Апликацијата засега обезбедува податоци за енергетскиот, банкарскиот и консултантскиот сектор, но во иднина би можела да понуди и важни информации кога станува збор за модната индустрија како еден од најголемите загадувачи. Оваа платформа дозволува секој, од индивидуалец до компанија, да види каков импакт има и ќе има климатската криза врз која било локација во светот. 

„Дали тоа е локација на фабрика, канцеларија, доставувач на суровини или критичен член од синџирот на доставување, ние ги имаме податоците за сите временски непогоди, и историски и идни. Од пожари до поплави, од земјотреси до бури, од суши до студени бранови. Токму поради екстремниот лесен пристап кон овие комплицирани податоци, овозможуваме индустриите да бидат поорганизирани, ефикасни и да го намалат својот импакт кон животната средина со својата ефикасна работа“, појаснува тој.

Зборувајќи за подобро управување со ризиците од климатските промени, тој вели дека важен сојузник во борбата за зачувување на планетата е и вештачката интелигенција, која е фундаментален дел од алгоритмите за предвидување непогоди во „Ерткер аи“.

„Во работата на наоѓање решенија кон нашата клима мора да се моделира светот и да се види како тој реагира во различни сценарија. Тоа бара процесирање на огромно количество податоци, нешто што луѓето немаат доволно часа во денот да го направат. Тоа што човек би го правел со години, ВИ може да го направи во секунди“, завршува Јовановски. 

Во моментов нема коментари за веста. Биди прв да коментира...

Остави коментар