-orig.png)
Во својот нов избор на боја на годината, американскиот производител „Бенџамин Мур“ (под чадорот на „Беркшир Хатавеј“) ѝ остана верен на виолетовата, како една од двете доминантни бои во совршената мешавина за 2025 година.
Комбинацијата за 2024 година содржи тонови на виолетова и сина и е наречена „блу нова 825“, а бојата на годината за 2025 е мешавина од виолетова (поточно боја на слива) и кафена. Нејзиното име е „синемон слејт“ (Cinnamon Slate).
Надалеку познатата компанија од Бруклин (Њујорк), основана во далечната 1883 година, со децении е посветена на уредувањето на домот, дизајнот на ентериер, боите и архитектурата, поради што со текот на времето развила дури 3.500 нијанси.
Кога ќе ја видите бојата за следната година, јасно е колку е предизвик да се опише. Всушност, сите избрани бои на „Бенџамин Мур“ се такви: многу необични, често досадни и недефинирани, односно тешки за објаснување. Од друга страна, тоа не значи дека не се популарни меѓу дизајнерите на ентериер и клиентите со префинет вкус што сакаат нешто иновативно во својот дом - можеби дури и секоја сезона.
Нијансата „синемон слејт“ е секако многу примамлива есенска боја, која лесно се вклопува во постојниот мебел во домот, без разлика каква боја е. Исто така, доколку не сакате да ги обоите ѕидовите со неа, секогаш можете да се одлучите за детали во таа нијанса: рамка за слика, вазна, тапацир за софа или фотелја, масичка за кафе...
Зошто „Бенџамин Мур“ го избира необичното?
Професионалците што работат во оваа компанија секоја година имаат тешка задача - да одговорат на барањата и очекувањата на клиентите, патем исполнувајќи ги сопствените стандарди, односно преминување на границите на успехот. Иако изгледа едноставно, изборот на бојата на годината не е лесен процес. Сепак, едно е сигурно: „Бенџамин Мур“ секогаш избира бои што тешко се дефинираат.
Покрај двете доминантни бои, кои се виолетова и кафена, дел од „синемон слејт“ е и црвената, која дава чувство на топлина. Затоа, без сомнение е подобар избор од „блу нова 825“ ако сакате вашиот дом да зрачи со потопла, домашна атмосфера. Во зависност од осветлувањето, пигментот варира од земјена, слаткокафена до нијанса на боја на јоргован.
Она што ѝ дава неутралност на бојата на годината за 2025 година и го олеснува спојувањето се нијанси на кафена боја. Токму овој „естетски момент“ треба да се долови, за бојата да биде истовремено безвременска, приспособлива, смирувачка, но не и досадна.
Данијела Рабреновиќ, генерална директорка на „Контент консалтинг тим“ (Content Consulting Team), изјави за „Блумберг Адрија“ дека во последните неколку години дизајнерите на ентериер често се потпираат на популарните бои што ги одразуваат актуелните трендови, расположенија и емоции.
„’Бенџамин Мур’, како еден од водечките брендови во индустријата за бои, често избира нијанси што се невообичаени и имаат длабока, богата естетика. Изборот на бои како ’синемон слејт’ покажува тенденција кон придушени, топли тонови што можат да создадат чувство на удобност и софистицираност. Овие бои често се користат за да се создаде средина што е смирувачка, но и инспиративна.
На пример, „синемон слејт“ може да се комбинира со посветли тонови или природни материјали како дрво и камен, создавајќи контраст што му додава длабочина на просторот. Исто така, овие бои може да бидат совршени за акцентни ѕидови, мебел или украси, со што се постигнува визуелен интерес без преоптоварување на просторот“, додава таа.
Темното дрво ја врати популарноста
Стилскиот мебел изработен од масивно дрво никогаш не излегува од мода, а во 2024 година темното дрво го слави своето големо враќање, како миленик на многу дизајнери на ентериер. Има одредена доза на елеганција и софистицираност, која совршено се вклопува со кафените нијанси, вклучувајќи ја и „синемон слејт“.
Во последниве години темното дрво е засенето од скандинавскиот минималистички дизајн, во кој преовладуваат светли бои како беж, бела и сива, а наспроти тоа – остава впечаток на тежина и мрачност. Меѓутоа, сега кога дизајнерите повторно имаат слух за т.н. тивок луксуз, темното дрво повторно е добредојден материјал.
Ако се прашувате што би било точно тивок луксуз, експертите го опишуваат како недооценета елеганција што почнува да добива на интензитет од крајот на 2023 година.
Овој стил на внатрешен дизајн е релативно нов концепт на пазарот, а карактеристично е што си поигрува со темата на софистицираност, безвременска привлечност и висококвалитетни парчиња мебел. Во исто време ги слави фините материјали, беспрекорната изработка и класиката и е исклучително компатибилен со античкото осветлување и старинските деталите. Токму тука доаѓа во игра темното дрво.
Пример за такво парче мебел може да се најде во „Александар енд Џејмс Хадсон“, по цена од 999 фунти.
Некои би рекле дека тивкиот луксуз е одраз на викторијанската ера, но и на модерните куќи надвор од градот, кои често се комбинација од темни и неутрални бои, дрво и стакло, квалитетно осветлување, месинг и други префинети материјали.
Според Данијела Рабреновиќ, враќањето на темното дрво и стилизираниот мебел е еден од клучните трендови за 2025 година.
„Тоа може да се поврзе со желбата да се создаде топол и удобен простор, како и со акцент на квалитетот и природните материјали. Темното дрво носи елеганција и софистицираност, додека стилскиот мебел може да додаде карактер и личност во ентериерот. Во комбинација со модерни елементи, овој пристап може да создаде совршена рамнотежа помеѓу традиционалниот и современиот дизајн“.
„Инаку, кога уредувате дом, препорачувам да инвестирате во клучни парчиња мебел или декор што ќе траат долго, додека можете да си дозволите да штедите на помалку неопходни работи како украсни перници или дреболии. Наместо да купувате многу евтини работи, фокусирајте се на неколку квалитетни парчиња мебел што ќе траат и ќе изгледаат елегантно На пример, инвестирајте во добар тросед или стол“, вели Рабреновиќ.
Придушени бои и екотрендови
Сега кога ги утврдивме трендовите на бои за оваа и следната година, потпирајќи се на експертизата на американскиот трендовски производител во индустријата, можеме да посочиме уште една забележлива врска: земјени, придушени бои компатибилни со еколошки материјали што се користат за внатрешноста и надворешноста, т.е. со „земјен“ мебел.
Тоа би било мебел „во договор со Земјата“; оној што ги почитува принципите на природата, заради зачувување на планетата и рафинирање на домот за да изгледа поелегантно и попрефинето во споредба со пластиката (на пр. ПВЦ-столарија). Забележливо е и тоа што моментално не доминираат светли или неонски бои, туку нијанси што ги среќаваме во природата наесен.
Всушност, некои светли бои, како што е „посилната“ окер-жолта, сè уште красат многу домови, но посуптилно. Акцентот е на деталите (перници и прекривки). Ако зборуваме за ѕидови или поголеми парчиња мебел, тогаш примарен избор се посуптилните нијанси. Ваквите нијанси, можеби, најмногу би одговарале на стилот бохо, а интересно е како дизајнерите на ентериер, но и производителите на бои, ги следат желбите на луѓето што стануваат еколошки сѐ посвесни.
„Сѐ повеќе дизајнери на ентериер и архитекти почнуваат да ги следат принципите на ЕСГ-еколошки материјали, енергетска ефикасност и дизајн што го намалува создавањето отпад „Исто така, клиентите стануваат сè повеќе свесни за овие прашања, што дополнително ги охрабрува дизајнерите и архитектите да спроведуваат одржливи практики“, вели соговорничката на „Блумберг Адрија“.
Од модерни трпезариски столчиња и фотелји од рециклирано дрво до софи направени од еколошки материјали, одржливите суровини се во првите редови на трендовите за мебел за 2025 година. Во тоа име е измислен терминот паметен мебел, со цел да се понудат удобни, естетски привлечни парчиња, но направени со минимална штета на околината. Покрај тоа, разновидноста е клучна.
Дене, просторите за живеење се развиваат за да служат за повеќе намени, особено таму каде што станарите создадоа канцеларии во своите домови, поттикнати од работата оддома. Мултифункционалниот мебел станува неопходен - кревет со вграден склад или трпезариска маса што служи како работен простор. Овие парчиња не се само практични туку се и стилски и привлечни, а пожелно е да бидат во неутрални бои за да се зачува мултифункционалноста.
Биофилниот дизајн, кој ја подразбира биолошката потреба на луѓето да се поврзат со природата на физичко, ментално и социјално ниво, е нагласен и често се применува со години. Овој тренд не го избегна светот на мебелот, па дури ни компании како „Бенџамин Мур“.
Во биофилниот дизајн преовладуваат три категории на бои и сите тие се одраз на природата: сина, зелена и кафена. Придружните бои се нијанси на жолта и портокалова, а сите заедно зрачат со смиреност, свежина, топлина и виталност, во зависност од нијансата, интензитетот и вредноста на самата боја.
„Биофилниот дизајн, кој се потпира на поврзување на луѓето со природата преку архитектурата и внатрешните простори, навистина добива на популарност, особено во последниве години. Овој пристап се фокусира на користење природни материјали, светлина, растенија и отворени простори за подобрување на целокупната благосостојба и квалитетот на живот. Во секојдневниот живот овој тип на дизајн може да биде многу применлив: во станбени простори преку додавање растенија, природна светлина и отворени прозорци, додека во деловните простори таквите елементи може да ја зголемат продуктивноста и да го намалат стресот кај вработените“, вели Рабреновиќ.
„Тоа особено се рефлектира во модерните архитектонски проекти и ентериери. Иако сè уште може да се смета за тренд, сѐ повеќе дизајнери и архитекти ја препознаваат неговата важност и го користат во своите проекти. Со зголемената свест за прашањата поврзани со животната средина и здравјето, овој пристап се очекува да се развива повеќе во иднина“.
.webp){kind=icon}
Во моментов нема коментари за веста. Биди прв да коментира...