Во февруари 2024 година Скопје повторно се најде меѓу десетте најзагадени градови во светот, а просечните нивоа на ПМ10 или ПМ2,5 честички ги надминуваат дозволените граници повеќе од сто дена во годината, се наведува во извештајот на УНИЦЕФ објавен на Меѓународниот ден на чистиот воздух во септември годинава. Покрај Скопје, на оваа листа редовно е и Тетово, како што „Блумберг Адрија“ информираше претходно.
Познато е дека модната индустрија е трет најголем загадувач на планетата. Според некои податоци, се проценува дека само во Германија годишно се уништува непродадена облека во вредност од седум милијарди евра. Дополнителен предизвик претставува тоа што брзата мода најчесто користи материјали што тешко се рециклираат. Сето ова заедно со климатските промени придонесе последниве години вниманието да се насочи кон одржливоста на луксузната индустрија низ светот, а токму тоа е во фокусот и на 29-то издание на „Моден викенд Скопје“ (Fashion Weekend Skopje).
Најавени се повеќе креативни работилници и панел-дискусии, во кои посетителите ќе можат директно да се вклучат и да дебатираат за одговорноста на модната индустрија кон животната средина.
Под мотото „Fashion forever“, програмата опфаќа настани инспирирани од зелени теми, од кои особено се истакнуваат креативната повторна употреба (англ. upcycling) и трендот на половна облека.
„Овој пат нашата цел е да ги нагласиме циркуларната економија и еволуцијата на модната и текстилната индустрија, прикажувајќи ги најновите трендови, канали, иновативни алатки и бизнис-модели. Настанот го осмисливме како платформа, која на уникатен начин ги обединува традицијата и уметнoста“, вели организаторката Света Богова-Јовановска за „Блумберг Адрија“.
„Моден викенд Скопје“ ќе се одржи од 25 до 28 октомври во културниот центар „Лабораториум“, а ние направивме листа од пет настани што на креативен начин се занимаваат со овие теми.
Мода. Засекогаш. (Fashion. Forever.)
Специјална изложба курирана од Амбасадата на Шведска, со која ќе биде отворено претстојното 29-то издание. Гостите ќе имаат можност да уживаат во мултимедијално шоу, но и да се информираат за иновативните решенија со кои оваа скандинавска земја се справува со брзата мода.
„Суштината на развојот е преминот од линеарна економија кон остварување профит од рециклирање ресурси. Станува збор за ефикасност на ресурсите, продолжување на вредноста на постојните ресурси на пазарот и наоѓање нови начини за капитализација во вредносниот синџир“, вели Кајса Гутерстам, менаџерка на проектот.
Depositphotos
Здрава облека, Здрава околина
Мултимедијален проект инспириран од идејата за креирање преку рециклирање. Шанса и вие да ја прикажете својата визија за одржлива мода. Посетителите ќе имаат можност да разменат практични идеи за тоа како најефикасно да ја поправат и да ја вратат во живот својата стара облека.
„Донесете ги вашите износени парчиња, споделете вештини и да ја направиме нашата планета поздрава“, порачуваат креаторите на овој настан, кој ќе се одржи во културниот центар „Лабораториум“, на 26 октомври, од 15 до 17 часот.
Размена на облека (Clothing swap)
Истиот ден, на истото место, од 12 до 14 часот е закажан уште еден практичен настан за освежување на вашата гардероба, овој пат преку размена на облека.
Стручни модератори ќе ве советуваат како да направите одржлив моден избор преку корисни практики за реискористување. Темата на која ќе се дебатира е зошто подобрениот циклус и модата од втора рака се најголеми трендови во моментов.
Depositphotos
Маскас (Maskas)
Заеднички проект на Теодора Митровска и Хуго Виндер Линд. Настанот е најавен како иновативна изложба што ја истражува културната интерпретација на македонското и на британското наследство.
Линд (32) е британски сликар, скулптор, фотограф и автор што ги спојува пејзажот, фолклорот и традицијата во еден современ концепт. Митровска (28) е македонска модна дизајнерка и уметница, основачка на модниот бренд „Варм метал“ (Warm Metal) со седиште во Лондон.
Изложбата ќе биде отворена за јавноста само два дена, на 26 и на 27 октомври.
Модна аукција (Fashion auction)
Во рамките на „Моден викенд Скопје“ гостите ќе можат и да наддаваат за нивното омилено парче во специјално поставениот изложбен салон. За аукцијата свои креации отстапија реномирани македонски дизајнери и модни куќи, а во овој хуманитарен проект се вклучија и студентите од академијата за моден дизајн „Скала“.
Собраните средства ќе бидат уплатени во донаторскиот фонд на „Конект“, организација што им помага на лица од ранливи категории.
.webp){kind=icon}
