Модната сцена се простува од Армани, последните ревии на маестрото во Милано

Џорџо Армани изгради империја вредна милијарди, но овој моден могул најмногу беше „свој“ во улогата на дизајнер, опсесивно усовршувајќи ги креациите пред да ги претстави на пистата.

Уште во јули, кога болеста го спречи да присуствува на сопствената ревија во Париз, Армани ги надгледуваше подготовките преку видеоврска. Подоцна се сретна со персоналот во живо и продолжи да работи на идните колекции сè до само неколку дена пред смртта, на 4 септември, во 91-та година од животот.

Резултатите од таа работа модниот свет можеше да ги види минатата недела на музејската изложба во Милано по повод 50 години од компанијата „Џорџо Армани“ (Giorgio Armani SpA) и на ревијата на „Емпорио Армани“ (Emporio Armani) за време на Модната недела, како и во последната колекција на неговата главна линија „Џорџо Армани“ (Giorgio Armani), создадена под раката на самиот Маестро.

Совршенство и посветеност до самиот крај – Џорџо Армани/Блумберг

„Тој навистина дизајнираше и скицираше онака како што сакаше да изгледаат моделите и работеше со тимот до самиот крај“, изјави Аношка Боргези, директорка за глобални комуникации во групацијата „Армани“.

На ревијата на „Емпорио Армани“ (Emporio Armani), моделите му оддадоа почит со аплауз на самата писта, додека Ана Винтур во саботата постхумно му врачи награда на неговото семејство, потсетувајќи дека неговите костуми ја ослободија модата од формалноста на 1980-тите години.

За време на модната недела беше прикажана класична колекција „Армани“: елегантни лесни ткаенини во дворот на Палацо ди Брера (Palazza di Brera,), пред публика во која беа Ричард Гир, Кејт Бланшет и Спајк Ли.

 

Кејт Бланшет во фустан потпишан од маестрото/Депозитфотос

Семејството и најблиските соработници сега ја преземаат контролата врз модната куќа, но пред нив стојат клучни одлуки: изборот на нов извршен директор и стратешки партнер. Според тестаментот, компанијата во наредните 18 месеци треба да продаде 15 отсто од уделот, а до 70 отсто во рок од пет години, со три предложени купувачи – ЛВМХ (LVMH), „Лореал“ (L’Oréal) и „Есилорлуксотика“ (EssilorLuxottica).

Роберта Армани, Андреа Камерана и Силвана Армани. Наследниците што ќе одлучат што следува со компанијата./Блумберг

Аналитичарите предупредуваат дека компанијата се соочува со предизвици: линии како „Армани ексчејнџ“ (Armani Exchange) и „Армани џинс“ (Armani Jeans) се насочени кон помасовниот пазар, додека луксузниот сегмент на кожа и модни додатоци не е доволно силен. Од друга страна, „Армани“ останува бренд со огромно наследство, што го прави привлечен партнер.

Како што вели Карло Капаса, претседател на Италијанската национална модна комора: „На крајот на краиштата, важно е купувачот да ги зачува ДНК и наследството на брендот. ‘Гучи’ (Gucci) и ‘Фенди’ (Fendi) се во француски раце, но нивните корени останаа во Италија.“