Дали парфемот може да ви помогне да добиете унапредување?

И покрај глобалното забавување што се случува во индустријата на луксузот, категоријата парфеми бележи стабилен раст и дава оптимистичка слика. Најголемиот светски производител и дистрибутер на луксузни парфеми, „Коти“ (Coty), предвидува зголемување на продажбата од 25 отсто за првиот квартал од 2024 година.

Според извештајот на „Блумберг“, продажбата на ексклузивни парфеми во „Живодан“ (Givaudan), кој произведува популарни мириси за брендови како „Диор“ (Dior), „Диптик“ (Diptyque) и „Том Форд“ (Tom Ford), пораснала за 14 отсто во 2023 година во споредба со претходната година, додека продажбата во „Интерпарфјумс“ (InterParfums), компанија што создава мириси за брендовите „Ферагамо“ (Ferragamo), „Оскар де ла Рента“ (Oscar de la Renta) и „Ван Клиф и Арпл“ (Van Cleef & Arpels), порасна за 21 отсто на годишно ниво и достигна 1,318 милијарди долари во 2023 година.

За тоа е најзаслужна генерацијата зед (Z), тврди извештајот на „Сиркана“ (Circana) што се однесува за потрошувачите на парфеми за 2023 година, бидејќи употребата меѓу членовите на таа целна група значително порасна, зголемувајќи се за 5 проценти минатата година, на 83 отсто. Генерацијата зед ја надминува просечната употреба поради неколку фактори. Потрошувачите на возраст од 13 до 26 години најмногу се истакнуваат кога станува збор за интензивна употреба, односно користење парфем најмалку трипати неделно, а сега се повеќе ангажирани во оваа категорија во споредба со милениумците. Генерацијата зед исто така е генерација со најголема веројатност да купува парфем за себе повеќепати годишно, но и онаа што има значително влијание врз одлуките за купување парфем преку социјалните мрежи. Тикток (TikTok) се искачи на второто место меѓу потрошувачите што ги наведуваат социјалните мрежи како влијание врз нивните одлуки за купување парфеми, поттикнати од зголемениот интерес на генерацијата зед и милениумците. Процентот на мажи што го наведоа Тикток како мрежа со влијание на купувањето исто така значително се зголеми оваа година во споредба со 2022 година, покажува извештајот на „Сиркана“.

Хаштагот #perfumetok има 2,3 милијарди прегледи, а на Тикток има посебна еуфорија за парфемите со феромони. Феромоните се хемикалии што сите ги произведуваме, а зборот е изведен од грчките зборови што заедно значат „носител на возбуда“. Се верува дека, како и во животинскиот свет, тоа има влијание врз тоа како нè доживуваат другите, односно дека влијае на однесувањето. Иако овој ефект кај луѓето и ефектот на синтетичките верзии врз однесувањето не се научно утврдени, се чини дека за љубителите на парфеми само верувањето е доволно, се разбира, на задоволство на компаниите што ги произведуваат. Според регулативата на Европската Унија за козметички производи, до август минатата година имаше само 24 алергени што морале да бидат наведени на пакувањето во списокот на состојки кога овие супстанции се присутни во концентрации повисоки од 0,001 отсто во производите што не се плакнат, а потоа се додадени уште 56. Дозволено е додавање состојки што не се на оваа листа на потенцијални алергени под колективното име „парфем“ или „мирис“ (Parfum/Fragrance). Тоа значи дека е тешко да се одреди дали производите навистина имаат присуство на феромони, какви видови и дали дејствуваат или не.

Но задоволната сопственичка на парфемот „ликвид лондон феромон“ (Liquid London Pheromone) отишла толку далеку во својата рецензија што тврди дека не само што функционира, туку и дека употребата на тој парфем ѝ донела унапредување на работа.

„Првпат го пробав утрото пред мојата годишна евалуација и никогаш во животот не сум била похаризматична, немаше прашање на кое не можев да одговорам, мојот шеф изгледаше како да го впива секој мој збор. Сè уште можев да го мирисам на мене откако излегов по работа за да го прославам унапредувањето“, рече таа.

Парфемот со феромони обично содржи животински или растителни феромони како основни состојки, па затоа експертите за парфеми препорачуваат да ја проверите листата на состојки што производителите, покрај задолжителните состојки што мора да бидат наведени, ја наведуваат на страниците за онлајн продажба за да го опишат парфемот. Меѓу состојките, на пример, можете да најдете килибар, мошус, кастореум, хирацеум, лаванда, цимет, се наведува на веб-страницата „Франгранс ворлд“.

И додека за повеќето производители на парфеми најважната карактеристика се состојките што го прават парфемот да мириса добро, за компанијата „Ер компани“ најважниот дел од процесот на правење парфеми е всушност да нема никаков мирис.

„Ер компани“ со седиште во Њујорк користи технологија што го претвора јаглерод диоксидот во етанол, кој потоа се меша со есенцијални масла и вода за да се произведе парфем. Овде доаѓаме до уште еден важен мотиватор за купување на генерацијата зед, а тоа се одржливоста и еколошката свест. Како што напишавме претходно, тие се повеќе склони да инвестираат во брендови чија филозофија се совпаѓа со нивните вредности.

„Од врвот на периодот на пандемијата, пазарот на парфеми продолжува да ужива во слаткиот мирис на успехот во продажбата поради неговата многу лична и емотивна природа“, рече Лариса Јенсен, советничка за индустрија за убавина во „Сиркана“.

Овие позитивни чувства на потрошувачите очигледно се рефлектираат во реалните податоци за продажбата. Иако „ер о де перфјум“ (Air Eau de Parfum) е околу 50 отсто поскап од, да речеме, „шанел бр. 5“ (Chanel No. 5), компанијата тврди дека нивниот производ е уникатен, вреден и баран. Имено, секое шише од 50 милилитри (кое чини 220 долари) користи 3,6 грама CO2, кој инаку би се испуштал во атмосферата. Кампањата ја носи пораката: „Го претвораме CO2 во нешто убаво“.