Пресметката изгледа вака: приближно четири тони рози или 1.600.000 цветови се потребни за да се добие еден килограм масло од роза. Купувачите се подготвени да платат 15.000 долари за еден килограм бугарско масло од роза, кое се смета за највредно. За да се произведе таа количина, според „Бизнис инсајдер“ (Business Insider), производителите мора да поминат една година обработувајќи полиња кои цветаат само неколку недели. Ливчињата се дестилираат веднаш откако ќе се соберат, што производителите ги чини 8.000 долари по килограм само за работна сила.
Но, покрај високите цени на суровините, она што ги става најскапите парфеми во светот на таа листа се и други фактори, пред сè самото шише и презентацијата, односно достапноста. Некои од овие примероци се направени, на пример, во соработка со познати златари и користат најскапоцени и полускапоцени камења и благородни метали.
Шишето за парфемот „Голден делишес“ (DKNY Golden Delicious) е создадено од американскиот златар Мартин Кац. Содржи 2.909 парчиња скапоцени и полускапоцени камења: 183 жолти сафири, 2.700 бели дијаманти, 15 исклучителни розови дијаманти од Австралија, 1,65 карати тиркизен Параиба турмалин од Бразил, 7,18 карати кабошон сафири од Шри Ланка, 2,43 карати жолти дијаманти и четири дијаманти во форма на бисер.
Секој камен е внимателно рачно поставен за да се создаде пејзажот на Њујорк, а целиот процес на производство одзема 1.500 часа. Парфемот беше продаден на аукција за милион долари, а приходите беа наменети за фондацијата Action Against Hunger. Инаку, доколку ве интересира самиот мирис, обичната верзија на овој парфем можете да ја набавите за околу 50 евра за 100 милилитри.
Се случува и самите златари да одлучат да создадат парфем со имплементирање на своето знаење во дизајнот на шишето. Парфемот „Болд оф лајтнинг“ (Bold of Lightning) го создаде компанијата ЏАР (JAR), со седиште во Париз, односно познатиот американски златар Џоел Артур Розентал, чии креации потсетуваат на Фаберже (Fabergé).
Bloomberg
„Болд оф лајтнинг“ е цветен мирис сместен во рачно изработено шише кое ја отсликува естетиката на неговата работа.
„Бакарат“ (Baccarat) е компанија која првично беше производител на кристални производи, создадена пред 260 години благодарение на кралскиот декрет на кралот Луј 15. Денес е во сопственост на приватна компанија предводена од хонгконгшката „Тор инвестмент“ (Tor Investment Management), која го презеде „Бакарат“ од инвестициската компанија „Форчн фаунтајн“ (Fortune Fountain Capital Ltd.) во 2020 година и во текот на 2022 година размислуваше за продажба на компанијата, продавајќи ги своите луксузни производи од кристали во хотели, ресторани, приватни резиденции, јахти и приватни авиони. Тука спаѓаат лустери кои чинат околу 155.000 долари по парче, како и луксузни парфеми со чие производство почнале да се занимаваат во деведесеттите години на минатиот век.
Кристален „Бакарат“ лустер во палата во Истанбул
Depositphotos
Дизајниран од Кристина Нагел, парфемот „Бакарат“ (Baccarat Les Larmes Sacree de Thebes), со цена од 6.800 долари, е дел од ексклузивна ограничена серија. Доаѓа во шише во облик на пирамида, направено од рачно изработен кристал од експерти на компанијата и капак од аметист.
Но, долго пред да создаде свои парфеми, оваа куќа произведуваше шишиња за парфеми и за други големи куќи. Така, шишето за четвртиот најскап парфем во светот, „Клајв Крисчан“ (Clive Christian No 1 Majesté impériale) вреден 215 илјади долари, е рачно изработено од кристал од „Бакарат“. Украсено е со златна навртка од 18 карати во која е поставен петкаратен бел дијамант.
Bloomberg
Основана во 1904 година, „Парфам Карон“ (Parfums Caron) е најстарата компанија за парфеми во Франција. По завршувањето на Втората светска војна, беше претставен „Карон повр“ (Caron Poivre), на листата на најскапите. Првите шишиња беа дизајнирани од Ернест Далтроф, деловен партнер на основачот, а денес „Карон повр“ доаѓа во шишиња направени од „Бакарат“.
Парфемот „Опера прима“ (Opera Prima), со кој „Булгари“ (Bvlgari) прослави 130 години постоење, е создаден во соработка со куќата „Венини“ (Venini), која е лидер во традицијата и вештината на изработка на украсни предмети од Мурано стакло. Колекционерскиот примерок на овој парфем е омаж кон познатата италијанска изработка и неговата форма потсетува на античка римска амфора направена од стакло прошарано со слоеви од вистинско злато, со 250 карати цитрин, 4,45 карати аметист и 25 каратни дијаманти.
Уште еден парфем од листата на најскапи има висока цена бидејќи се правел годишно во само 50 ограничени шишиња. Истакнатиот моден дизајнер и парфимер од Франција, Жан Пату, го создал парфемот „Џој“ (Joy) во 1926 година. Парфемот, кој во основа има бугарска роза во неговото јадро, како и масло од 10.000 јасмини собрани во период од само две недели на лето во Франција, се рекламирал под слоганот дека може да ја ублажи депресијата и да ги направи корисниците повесели. Подоцна, компанијата ја презеде „Проктер енд Гембл“ (Procter & Gamble), но брендот остана познат по создавањето на луксузни мириси. Фановите веројатно нема да бидат задоволни од веста дека брендот престана да произведува парфеми. Сепак, со упорност и буџет од околу 850 долари, сè уште може да се најдат винтиџ верзии од 70-тите.
И за крај, што се добива, односно колку чини кога ќе се спојат сите фактори кои го прават парфемот скап? Изложено пред јавноста во салата „Армани“ на Бурџ Калифа, шишето на парфемот „Шумук“ (Shumukh) е направено со 3.500 дијаманти и бисери, 2,5 килограми 18-каратно злато и 5,9 килограми сребро.
Шишето, кое три години го правеле занаетчии од Италија, Франција и Швајцарија, го држи Гинисовиот светски рекорд за најголем број сетови на дијаманти. Парфемот, чие име во превод значи „да се заслужи најдоброто“, поради квалитетот на состојките, може да трае над дванаесет часа на човечка кожа и околу триесет дена на ткаенини. Денес, постои само едно шише од овој парфем, што дефинитивно значи дека уште долго ќе ја задржи титулата најскап мирис на светот.
.webp){kind=icon}