Синџирот на парфимерии „Даглас“ ја лансира својата прва јавна понуда

Германскиот малопродажен гигант „Даглас“ (Douglas) има 1.850 продавници на мало во 22 земји и ја проширува својата онлајн продажба низ Европа од 2000 година. Компанијата ќе котира на Франкфуртската берза на 21 март, а акциите ќе бидат понудени на првична јавна понуда, по цена од 26 до 30 евра, објави компанијата, а пренесе „Блумберг“.

Во текстот, Фил Серафино наведува дека претходната побарувачка за акции веќе ја надминува големината на трансакцијата. Се верува дека компанијата може да привлече инвеститори што бараат чиста инвестиција во висококвалитетни и луксузни производи за убавина. Целта на „Даглас“ е среднорочен раст на продажбата од седум отсто годишно, со профитна маржа од 18,5 отсто, се наведува во извештајот. Добропознатиот синџир планира да ги искористи приходите за намалување на долгот.

Врз основа на официјалната изјава на групацијата „Даглас“ од пред еден месец, глобалната нето-продажба се зголеми за осум проценти, на околу 1,56 милијарда евра, во периодот октомври - декември 2023 година (К1 2022/23: 1,44 милијарда евра). Се верува дека растот е поттикнат од силните резултати од двата канала: продажбата во продавниците се зголеми за 6,7 отсто и покрај инфлацијата, додека онлајн продажбата беше зголемена за 10,7 отсто на годишно ниво, продолжувајќи го позитивниот тренд од претходните квартали.

Douglas

Патем, „Даглас“ е основан од шкотскиот имигрант Џон Шарп Даглас во 1821 година, со отворање фабрика за сапун во магацинскиот кварт во Хамбург, Шпајхерштат. Неколку децении подоцна, во 1909 година раководството премина во рацете на жените. Берта Колбе го презема управувањето со „Даглас сонс“ (Douglas Sons) и му дава дозвола на трето лице да го користи името, отворајќи го патот за првите парфимерии „Даглас“.

Една година подоцна, сестрите Ана и Марија Карстенс ја отвораат првата парфимерија „Даглас“ на Нојер Вол стрит во Хамбург. Следните години беа отворени нови парфимерии, а фабриката за сапун сè уште беше активна, која произведуваше сапун, кремови за сончање и пасти за заби до 1990-тите.

Во 1996 година, производителот на слатки „Хусел“ (Hussel AG) го презеде бизнисот со парфимерија. Под водство на извршниот директор д-р Јорн Креке, компанијата продолжува со проширувањето отворајќи парфимерии преку аквизиции и нови филијали. Д-р Јорн Креке остана почесен претседател на Надзорниот одбор на „Даглас“ до неговата смрт, пред нешто повеќе од еден месец, а на функцијата претседател беше заменет од неговиот син, д-р Хенинг Креке.

Во текот на 1980-тите, со стекнувањето на австрискиот синџир на парфимерии „Рутнер“ (Ruttner), „Даглас“ го направи првиот чекор кон проширување на меѓународниот пазар, кој продолжи во Холандија, Франција и Италија, а до 2000-тите тие влегоа и на пазарите во Шпанија, Полска, Унгарија, Романија и Швајцарија.

Од 2012 година семејството Креке и финансискиот инвеститор „Адвент интернешнл“ (Advent International) го презедоа „Даглас холдинг“, во кој во тоа време беа вклучени и компаниите „Талија“, „Крист“, „Апелрат Купер“ и „Хусел“, се наведува на официјалната веб-страница на групацијата „Даглас“. Во 2015 година дел од компанијата му беше делумно продаден на „Капитал партнерс“ (Capital Partners) за околу 2,8 милијарди евра. Потоа седиштето на компанијата се пресели од Хаген во Дизелдорф.

Најголем глобален ривал на „Даглас“ е „Сефора“ (Sephora), во сопственост на францускиот гигант ЛВМХ.

Синџирот на парфимерии, покрај познатите брендови како „Шанел“, „Диор“, „Живанши“, „Ла Мер“ и други познати, нуди и професионални брендови на производи за шминка и нега на кожа: „Бај Тери“, „Бенефит козметикс“, „Д-р Ирена Ерис“, „Д-р Денис Крос“, „Демакозметикс“, „Ритуалс“, „Перинконе МД“, „Елмис“, „Филорга“, како и голем избор на парфеми со назнака ниш (англ. niche) за клиенти што бараат повеќе посебни ноти: „Аква ди фарма“, „Мезон Маргиела“, „Микалеф“, „Зарко“, „Том Факсон“.

„Даглас“ во регионот Адрија не заостанува во понудата и е присутен повеќе од десет години во Хрватска, со 28 продавници, и во Словенија од минатата година, кога беше отворена продавница во центарот на Љубљана.

Според извештајот на „Фина“, вкупните приходи во 2023 година на парфимеријата „Даглас“ во Хрватска изнесувале 28,72 милиони евра, што е зголемување за 25,29 отсто во однос на претходната година. Во 2023 година е остварена нето-добивка од 1,54 милион евра, што е зголемување за 55,07 отсто во однос на претходната година.

Во моментов нема коментари за веста. Биди прв да коментира...

Остави коментар