.webp){kind=icon}
Иновативни хулахопки со алое вера се извезуваат во Европа и во САД. Освен што штитат од студ, тие ја штитат и животната средина. Се разградуваат десетпати побрзо од стандардните и се комплетно македонски производ.
Идејата за создавање на овој еколошки моден додаток е на Сања Лазаревска. Нејзината фамилија, која три децении е дел од трикотажната индустрија, до пред шест години била комплетно насочена кон производство на традиционални хулахопки, доколенки и кратки чорапи. Во 2018 година сфатила дека треба да го оптимизира семејниот капитал, па го создала брендот „Април 22“. Името е симболично, на овој датум се одбележува Меѓународниот ден на планетата Земја.
Идејата да инвестира во зелени иновации ѝ се наметнала како одговор на страшниот импакт што текстилната индустрија го има како втор најголем загадувач на околината, но и како револт кон „брзата мода“, која, според неа, нуди низок квалитет на облека и предизвикува долгорочни проблеми со кожата.
За Лазаревска било поразително сознанието дека трикотажната индустрија креира над 190 милиони тони отпад на годишно ниво, кој останува во природата од 50 до 100 години. Тоа ја инспирирало да најде соодветни материјали со кои ќе може да произведе еколошки производ што истовремено ќе задоволува и со цената и со квалитетот.
Со финансиска помош од Фондот за иновации и технолошки развој, за две години успеала да создаде нешто што го нема на ниедно друго место во светот - биоразградливи хулахопки со алое вера.
„Користиме предиво што се разградува за три до пет години. Во процесот на производство е вклучена посебна доработка, со додаток базиран на алое вера, со што овој производ не само што е еколошко решение туку нуди и поголема удобност при носењето, не предизвикува чешање, ниту, пак, непријатна миризба како класичните хулахопки“, вели Лазаревска.
Сања Лазаревска
Производството се одвива во четири фази. Прво се дефинираат предивото и начинот на плетење, па се преминува на шиењето. Нареден чекор се хемиската обработка и термофиксирањето и на крајот следува пакувањето. Целиот процес е автоматизиран на машини што се енергетски ефикасни. Во процесот на фарбање и доработка водата се пречистува и се користи циркуларно во производствениот процес, а пакувањето на финалниот производ е од рециклирана хартија.
„Имаме соработка со големи компании што ни го откупуваат отпадот и го користат како биомаса за производство на енергија, со што придонесуваме во циркуларната економија“, вели Лазаревска.
Следна инвестиција што компанијата сака да ја реализира е инсталација на соларни панели за електрична енергија за производството да биде 100 отсто еколошко.
Биоразградливите хулахопки на „Април 22“ во Македонија чинат од пет до седум евра. Тие се продаваат во дел од домашните синџири на маркети и аптеки, како „Космо Тинекс“ и „Зегин“, а можат да се купат и во концептуалната онлајн продавница УРМА (URMA), како и во првата скопска винтиџ продавница „Игралиште“. На странските пазари, хулахопките се достапни преку е-продавниците на брендот (www.apriltwentytwo.com, www.apriltwentytwo.de, www.apripltwentytwo.se и www.fourtwentytwo.us) и во големопродажба.
Свесни за куповната моќ на пазарот во регионот, Лазаревска и нејзиниот тим напорно работеле на целокупниот производствен процес за да понудат фер пазарни цени за, како што вели, секој да може да си дозволи еколошки избор при купувањето.
Во соработка со професори од Технолошкиот факултет од Скопје, компанијата работи на уште една иновација - производство на детски хулахопки и чорапи со комплетно еколошки бои, од органско потекло од овошје, зеленчук и други растителни извори.
