Дали „Зара“ станува луксузна? Да, ако е тоа камел палто од 699 долари

Со години брендот и синџир на бутици „Зара“ (Zara) на познатата компанија „Индитекс“ (Inditex SA) беше чекор зад луксузните брендови, односно практично ги следеше. Како што врвните имиња во модата промовираа нови стилови на пистата, така набрзо „Зара“, како трговец на мало, нив ќе ги вклопеше во парчиња за многу пониска цена.

Но, бидејќи дизајнерските компании ги зголемија цените и премиум модниот сектор беше притиснат од пандемијата, мејнстрим продавниците побрзаа да ја пополнат празнината од средниот ред, а „Зара“ предводи со  цената. Сега таму се продава луксузна облека за забави и вистински јакни од велур, со кои им парира на оние во поскапите бутици.

Водечкиот бренд на „Индитекс“, инаку, одамна е познат по својот евтин шик. Неговиот обем, во комбинација со фактот што произведува околу 60 отсто од производите блиску до своето седиште во северна Шпанија, вклучувајќи ги и фабриките во Португалија, Мароко и во Турција, значеше дека може да испорача облека и модни додатоци за мал дел од цената што ја држат повисоките стилови на модната писта.

Меѓутоа, во последно време, „Зара“ сè помалку го користи таканаречениот аспиративен пазар на луксуз. Брендовите, вклучувајќи ги „Луј Витон“ на ЛВМХ (LVMH), „Гучи“ на „Керинг“ (Kering SA), независниот британски ривал „Бурбери“ (Burberry Group Plc) и американски „Ралф Лорен“ (Ralph Lauren Corp.), дополнително напредуваат, со цени што пазарот ги апсорбира. Во меѓувреме, пандемијата изврши огромен притисок врз премиум трговците на мало, како што се американските „Џеј Кру“ (J. Crew) и „Банана рипаблик“ (Banana Republic) на „Геп“ (Gap Inc.), како и европските имиња како „Хобс“, во сопственост на јужноафриканската „Фоскини“ (Foschini Group Ltd). Тоа го зголеми јазот помеѓу ултрависоката и ултраниската мода, а „Зара“ веднаш скокна таму.

Иако просечните цени на машката и женската облека на „Зара“ онлајн во САД се зголемени само за 1 отсто во споредба со пред една година, тие се за 20 проценти повисоки отколку во 2022 година, објави компанијата „Едитед“ (EDITED). Тоа може да се објасни со инфлацијата на материјалите и транспортните трошоци што ги погодува сите трговци на мало. На пример, просечните цени на „Ејч енд ем“ (H&M) се за 12 отсто повисоки отколку во 2022 година.

Но, тоа го одразува и фактот дека „Зара“ ја шири својата понуда. Ограниченото издание на колекцијата од вистинска кожа, достапна на нејзината веб-страница и на некои физички локации, може да се пофали со камел капут што чини 699 долари и фустан од 489 долари. Тоа е далеку од цените од 30 долари по кои брендот е познат. Секако, сè уште можете да ги најдете нивните популарни фармерки од 50 долари на пример - но сега тие ќе бидат изложени во комбинација со кашмирски џемпери и свилени фустани.

Bloomberg Mercury

Модата исто така може да игра улога. Последната година или нешто повеќе се забележува пораст на тивкиот луксуз, вклучувајќи костуми и горна облека од врвни материјали, кои имаат тенденција да бидат поскапи. Ваквите облеки, кои бараат фокусирање на ткаенината, е познато дека тешко се наоѓаа кај трговците со брза мода. Но, вештините за дизајн и производство на „Зара“ ги надминуваат оние на ривалите како што се „Ејч енд ем“ (H&M), „Примарк“ (Primark) и „Шејн груп“ (Shein Group Ltd). 

„Зара“ не е единствената што го премостува јазот 

„Кос“ (Cos), минималистичкиот бренд во сопственост на конкурентот „Ејч енд ем“ (H&M Hennes & Mauritz AB), има луксузна колекција, како и премиум трговецот „Рејс“ (Reiss), кој е во мнозинска сопственост на „Британс некст“ (Britain’s Next Plc). Дури и поевтините синџири се вклучуваат во акцијата, со линијата „Студио“ на „Ејч енд ем“ и „Едит“ на „Примарк“. 

Но, меѓу традиционалната група за брза мода, „Зара“ е една од ретките со авторитет да понуди алтернатива на поскапите продавници, благодарение на можностите за дизајн и производство во рамките на нејзиното огромно седиште во Артеиксо.

Bloomberg Mercury

За „Индитекс“, кој генерира повеќе од 70 отсто од продажбата и профитот од „Зара“, ова ја одразува континуираната еволуција на бизнисот. Но не е случајно што подемот дојде откако Марта Ортега Перез, 40-годишната ќерка на основачот на „Индитекс“, милијардерот Амансио Ортега Гаона, ја презеде функцијата претседател во април 2022 година.

Пристапот се исплатеше. За разлика од супербогатите, купувачите од средната класа во САД и во Европа се под притисок. Бидејќи големите луксузни групи гледаат дека тие клиенти се намалуваат, се чини дека тие можеби ја избираат „Зара“ - заедно со сестринската марка и омилениот тивок луксузен фаворит „Масимо Дути“.

Bloomberg Mercury

Компанијата, која за годишната заработка известува подоцна во март, во декември соопшти дека продажбата во претходните шест недели се зголемила за 14 отсто, додека нејзината бруто-маржа за цела година ќе се зголеми за 0,75 процентни поени во споредба со претходните очекувања дека ќе остане стабилна. Акциите достигнаа нов рекорд претходно неделава.

Но преземањето на луксузните брендови не е без ризик. 

„Индитекс“ е посветен на одржување на историската достапност на „Зара“. Навистина, во „Чи Чи“ во лондонски Челзи претходно неделава имаше изложба на рамни чевли по цена од 22,99 фунти. Но брендот не може да си дозволи да го изгуби фокусот на вредноста, ниту пак неговиот имиџ мора да стане толку популарен што ќе ги одвраќа клиентите со ограничени пари - дури и ако има производи за да ги задоволи. 

Bloomberg Mercury