Мотивирани да го обезбедат своето семејство или да постигнат лична финансиска и економска независност, претприемаштвото им станува на жените сè попривлечна опција, иако во практика бројките и понатаму се поразувачки. Од самовработените лица во Европската Унија, само една третина се дами.
Жените што влегуваат во приватниот сектор најчесто го прават тоа постепено, помалку ризикуваат, па и помалку трпат штета, но постојат и такви што храбро чекорат напред, слободни и независни жени што не се плашат да ги земат работите комплетно во свои раце, претприемачки со интересни и возбудливи идеи.
Една таква моќна комплетно женска приказна е „Бестет ноар“ (Bastet Noir). Пред една деценија брендот започнал како прва онлајн продавница што ги поддржува балканските дизајнери што практикуваат еколошки начин на производство во време кога одржливата мода и онлајн трговијата се речиси непознати поими на овие простори.
„Бестет ноар“ (Bastet Noir) е одржлив моден бренд чии дизајни се направени по нарачка специјално по мерките на клиентите. Секое парче е направено од дедсток (deadstock) материјали и произведено локално од заедница на жени самохрани родители во Македонија.
Bastet Noir
„Целиот профит што го остваруваме се реинвестира во развојот на бизнисите што се во сопственост на овие жени или е во функција да го поддржи образованието на нивните деца“, нагласува Даниела Милошеска, oсновачка и извршна директорка.
Женски фонд за подобро општество
Таканаречениот Женски фонд го формирала во јули 2020 година и тој функционира преку напојница. Кога ќе го одберете посакуваното модно парче и ќе стигнете до наплата, ќе ви биде понудена опција да оставите „бакшиш“. На крајот на месецот, целата сума што ја донирате оди директно за студиото што е во сопственост на жената што го изработила моделот што сте го одбрале.
„Целта на оваа иницијатива е да им се даде шанса на овие жени да се борат во земја каде што нивната просечна месечна плата е помала од 300 долари. Износот што ќе го заработат како бакшиш ќе им помогне на нивните бизниси да останат во живот со покривање дел од нивните месечни трошоци, како греење, вода и струја. Ова ќе им овозможи да инвестираат во растот на нивниот бизнис и да го подобрат квалитетот на облеката“, се наведува на официјалниот сајт на брендот.
Bastet Noir
Гордана Жежова е една од жените што произведуваат за „Бестет ноар“ (Bastet Noir). Самохрана родителка, љубителка на природата и екологистка. По потекло е од Штип, градот на текстилот. Љубовта кон шиењето ја наследила од мајка си. Со текстилна работа се занимава 26 години, а имала соработки со многу клиенти, маркетинг-агенции, фирми, изработени колекции за македонски дизајнери. Вели дека во последно време со развојот на модата во поинаква насока се сменил и начинот на работа.
„Она што најмногу ме привлече кај ’Бестет ноар’ е приказната. Можноста за заработка на ранливите категории, употребата на рециклирани материјали, како и можноста во овој процес да вклучам жени самохрани мајки и како мои соработници“, вели Жежова.
Стандардните величини се мит
Овој бренд нуди уникатен пристап кон онлајн купувањето, како и купувањето облека во целина. Брендот нуди асортиман на фустани, комбинезони, костуми и капути што може да бидат изработени по точни мерки што им ги доставува клиентот, наспроти стандардните бројки, кои, според нив, не одговараат на сечија градба и форма на тело.
Bastet Noir
„Користиме материјали што се продаваат во лимитирана метража бидејќи се ’фрлени’ од страна на поголеми модни куќи. Тоа значи дека бројот на парчиња по модел што го нудиме е исто така лимитиран“, појаснуваат оттаму.
„Бестет ноар“ е актуелен со колекцијата „Д филдс оф голд“ (од англиски: The Fields of Gold, во превод полињата од злато). Капутите и троделните женските костуми се најскапи, па некои модели се продаваат и по 400 долари.
„Нашиот бренд е проверен и има оценка 4 од 5 на светски познатиот систем за проверка на транспарентност и одржливост на брендови, Гуд он ју (Good on You). Покрај тоа, нудиме бесплатни корекции доколку клиентот смета дека се потребни и секогаш сме на располагање за какви било прашања во однос на нашите производи“, велат тие.
Фустаните варираат од 100 до 290 долари. Техниките на изработка играат најголем удел во тоа која ќе биде крајната цена на производот. Колку се покомплицирани техниките, кои бараат поголемо ниво на експертиза, и колку повеќе е потребно време за изработка, толку е повисока цената. Други фактори што играат улога се квалитетот на материјалот на производот и комплексноста на деталите.
Bastet Noir
Фустанот „Морган дрес“ (Morgan Dress), на пример, е направен од 100 отсто чист лен, кој е изработен со француски штеп, има двојна постава и невидлив патент YKK, како и сложени детали на горниот дел. Чини 249 долари.
Освен на нивниот официјален сајт, дизајните може да се најдат и во следните онлајн продавници: „Култ Миа“ (Cult Mia), „Д рефлектив“ (The Reflective), „Аур комон плејс“ (Our Common Place), „Шоп зиро“ (Shop Zero), „Лон дизајн клаб“ (Lone Design Club), „Ларк и Бери“ (Lark&Berry) и „Грин литл харт“ (Green Little Heart).
„Најголем број продажби бележиме од Соединетите Американски Држави, Велика Британија, Австралија и од скандинавските земји како Норвешка и Данска“, откриваат тие за крај.
.webp){kind=icon}
