text size
Луксузот е прашање на вкус. За еден ист производ некој е подготвен да плати вистинско мало богатство, но некој друг не е. Поради својата висока цена, луксузните производи се интересни за фалсификување, бидејќи и народот сака да го има она што можат да си го дозволат богатите - но за пониска цена. Измамниците често го користат тоа и од плагијатите создаваат вносна споредна работа.
Овој текст е дел од трилогијата:
1. Од Истанбул до Башчаршија – фејк-економијата врти милиони
2. 10 најчесто фалсификувани луксузни предмети
3. Разговор со препродавачка на фалсификати: Целта е да се удвои влогот!
Ако некогаш сте купувале од улични продавачи во големите градови како Њујорк, Лос Анџелес или Сан Франциско, веројатно сте налетале на такви фалсификати. Ви ги пренесуваме заклучоците од истражувањето на „Јаху фајненс“ за тоа кои предмети најчесто се фалсификуваат.
Паричници и чанти „гучи“
Bloomberg Businessweek Adria
„Гучи“ е луксузен бренд од Италија, познат по паричници, чанти и облека. Според „Хај снобаети“, глобален медиумски бренд за мода и стил на живот, логото со двојната буква GG е меѓу најпрепознатливите икони на модните брендови и неверојатно барано меѓу фалсификаторите. Според американскиот медиум Си-ен-би-си, „Гучи“ во 2020 година спречил онлајн продажба на четири милиони производи и барал поврат на 4,1 милиони плагијати. Но тоа веројатно не ги обесхрабри измамниците да прават нови обиди.
Парфем „шанел“
Bloomberg Businessweek Adria
Францускиот луксузен бренд „Шанел“, познат меѓу другото по парфемот дизајниран од основачката Коко Шанел, па и по облека, паричници и чанти, е следната лесна цел за фалсификаторите. Плагијаторите на овие производи се толку чести што во 2021 година царината на САД објави извештај во кој посебно ги предупреди трговците на мало да ги проверат двапати производите на „Шанел“ бидејќи заплениле многу фалсификати.
Чанти „луј витон“
Bloomberg Businessweek Adria
Следен меѓу најкопираните брендови е оној на францускиот моден бренд „Луј Витон“, пишува „Лав мани“. Во август 2020 г., кинеската полиција завршила голема операција насочена кон фалсификувани чанти „луј витон“, според податоците на „Лексолоџи“. Тие откриле 62 криминални групи и ги уапсиле за дела поврзани со фалсификување. Заплениле повеќе од две илјади лажни чанти и друга опрема, со вкупна вредност од 14,6 милиони долари (13,5 милиони евра).
Облека „барбери“
Bloomberg Businessweek Adria
„Барбери“ е британски моден бренд основан во 1856 година од Томас Барбери. Познат е по своите препознатливи карирани и едноставни дизајни и производи, како што се шалови, шешири и капути. „Барбери“ всушност беше еден од првите што направија палто од уникатен издржлив материјал, еластична волна габардин, со што го смени начинот на носење на капутите. Сепак, како и другите познати модни брендови, и овој британски бренд има тешкотии со фалсификатите. Во 2019 година тие се обидоа да затворат илјадници онлајн продавници што продаваа фалсификувани производи. Но проблемите со плагијатите сè уште постојат. Компанијата отиде дотаму што ја уништи сопствената стока и го зголеми надзорот над својата интелектуална сопственост за да го олесни откривањето копии, пренесува „Гардијан“.
Очила за сонце „рејбан“
Bloomberg Businessweek Adria
Матичната компанија на брендот „Рејбан“, „Луксотика“, постојано се бори со фалсификати, пренесува „Санглас фикс“. Тие се обидуваат да ги убедат потрошувачите дека фалсификатите немаат значителна заштита од ултравиолетово зрачење по која се познати нивните очила, така што може да им ги повредат очите. И покрај тоа, плагијаторите не се откажуваат.
Епл ерподс
Bloomberg Businessweek Adria
„Епл“ е најфалсификуваниот технолошки бренд во светот. Како и фалсификуваните лекови, познато е дека копиите на „Епл“ се потенцијално опасни по животот. Во 2013 година, Ма Ајлун, 23-годишна стјуардеса од Кина, почина од струен удар предизвикан од лажен полнач за ајфон.
Според пишувањата на новинската куќа ВПСД, која е дел од Си-би-ес, фалсификуваните производи на „Епл“ стануваат сѐ поголем проблем. Ако сте нарачале производ на „Епл“ преку интернет, а не преку официјалната страница на „Епл“, постои голема веројатност дека сте купиле фалсификат, што особено важи за слушалките „ерподс“.
Во 2021 година американската царина запленила фалсификувани слушалки „ерподс“ и „ерподс про“, со вкупна вредност од повеќе од 1,3 милион долари (1,2 милион евра). Тогаш заплениле и повеќе фалсификувани тампони за уши за слушалки испратени од Кина. Како да го препознаете плагијатот? Знак за предупредување е веќе неразумно ниската цена во споредба со редовната цена.
Часовници „ролекс“
Bloomberg Businessweek Adria
Швајцарскиот производител на часовници „Ролекс“, кој е синоним за луксузни часовници, веројатно не е виновен за фактот што на пазарот во 2019 година имало повеќе лажни отколку вистински часовници „ролекс“, објави онлајн медиумот „Фешн лоу“. „Ролекс“ има толку високи стандарди што како фалсификати може да се вбројат и часовници произведени во нивните дуќани за часовници, наведува „Хај снобаети“. Според нивните спецификации, копија е секој часовник составен од неоригинални или неодобрени делови.
Накит и часовници „картие“
Bloomberg Businessweek Adria
Француската компанија за производство на накит и часовници исто така се бори со фалсификаторите. Минатата година заедно со компаниите „Луј Витон“, ЛВМХ и „Прада“ ја основа непрофитната организација „Аура блокчејн конзорциум“, која би требало да ги заштити оригиналните производи, пренесува „Форбс“. Со користење технологија што ги поткрепува криптовалутите и незаменливите токени (NFT), на потрошувачите треба да им се помогне да ја осигурат автентичноста на производите. Системот е развиен од „Мајкрософт“, така што при купување производ ќе им овозможи на потрошувачите увид во целата негова историја и ќе им обезбеди доказ за потеклото.
Чанти „хермес“
Bloomberg Businessweek Adria
„Хермес“, францускиот бренд познат по брендот „Биркин“ и свилените шалови што ги носат богатите и славните, е познат и по скандалите со фалсификатите. Дури и некои нивни вработени биле вклучени во тоа. На крајот се фатени, но на фалсификувањето не му се гледа крајот. Различни производи на „Хермес“ - од ремени до паричници - сѐ уште се запленуваат на границите, додека компанијата троши милиони во борбата против плагијаторите.
Накит „тифани енд ко“
Bloomberg Businessweek Adria
Продажбата преку интернет многу им олесни на фалсификаторите да продаваат лажни производи, бидејќи тие можат да користат вистински фотографии од производите, а потоа да испраќаат фалсификати до потрошувачите, според „Лав мани“. „Тифани енд Ко“ во 2010 година го тужеше иБеј, бидејќи истрагата покажала дека речиси три четвртини од производите на брендот „Тифани“ што се достапни на иБеј се лажни. Тие исто така го тужеа „Костко“ за продажба на лажни дијамантски прстени „тифани“.
Законот за безбедно купување (анг. The Safe Shop Act), кој е усвоен од Конгресот во март 2020 година, беше обид на американските власти со кој онлајн трговците би одговарале за фалсификуваната стока, но борбата очигледно ќе продолжи.
Текстот го преведе Сузана Митревска
.webp){kind=icon}
