Исцрпувачки е да ги исполнувате барањата на општеството за тоа како треба да изгледа една жена, без разлика дали имате 20, 40 или 60 години.
Пред десет години решив да ја оставам косата да ми побели.
Причината беше многу едноставна: повеќе не можев да поминувам многу време на фризер речиси на секои три месеци.
Затоа со фрустрација и со одредено неверување прочитав дека Лиза Лафлам, новинарка и водителка на вести од Канада, која оставила косата да ѝ побели за време на пандемијата, била отпуштена (сопствениците на Си-ти-ви негираа дека „возраста, полот и седата коса“ биле фактори за раскинување на нејзиниот договор). Тоа беше случај на врвна ТВ-новинарка што известувала од воени зони (и се мачела да ја бојадиса косата во женските тоалети на аеродромот во Кандахар и во бункер во Багдад, според „Њујорк тајмс“) и која изгледа била отпуштена поради нејзиниот изглед.
Приказните како оваа ги разоткриваат вкоренетите предрасуди со кои се соочуваат жените во средни години и покажуваат уште колку работа треба да се заврши.
Постојаната фиксација за тоа како старееме (па, дури и за тоа дека старееме) ги намалува добрите работи што може да ги направи половина од населението и ги поткопува достигнувањата, придонесите и стручноста на жените. Никој не би осудил средовечен маж со седа коса (побарајте фотографија на која се наоѓа Лојд Робертсон, кого го замени Лафлам (58) кога тој отиде во пензија на 77 години).
Дискриминацијата на основа на изгледот повеќе е насочена кон жените, особено жените во втората половина од кариерата. Иако се јавува во голем број професии, на телевизија се чини попродорна и поотворена. Либи Первс, радиоводителка, концизно зборуваше за притисокот врз жените во Би-би-си да изгледаат привлечно и младолико, додека на мажите им е дозволено да стареат достоинствено.
Вестите на телевизија изгледаат сѐ понетипично. Од вестите за банкарството (Кристин Лагард, Џенет Јелен), па дури и за модата, на влијателни позиции се наоѓаат жени со сребрени гриви (Сара Харис, заменик-уредничка и модна директорка на британското списание „Вог“, го открила своето прво бело влакно кога имала околу 16 години и никогаш не ја бојадисувала својата коса).
Движењето на зрели модели цвета. Каролин Доелинг, поранешна американска директорка во областа на телекомуникациите и банкарството, стана моделка на седумдесет години и сега е сензација на Инстаграм. Тука е и Маје Маск, мајка што не е во сенка на својот славен син Илон, а кој стана бренд-амбасадорка на „Ковер грл“ (CoverGirl) на 69 години. Таа листа станува сѐ подолга.
Последната сезона на награди ги слави и актерките во педесеттите и шеесеттите години: Мишел Јео, Кејт Бланшет, Џејми Ли Кертис.
Ова се мали но важни победи во борбата против дискриминацијата на основа на годините во животот. Жените живеат и работат подолго – а нивните кариери се проследени со значителни разлики во платите и пензиите – и мора да престанеме да ги казнуваме за нешто што е надвор од нивната контрола. Наместо тоа, ајде да се обидеме да ги препознаеме нивните достигнувања и соодветно на тоа да добиваат надоместоци. Жените сè уште заработуваат во просек по 83 центи за секој долар што го заработуваат мажите, како што се наведува во извештајот на Банката на Америка.
Сепак, има одреден напредок. Сè поинтензивната дискусија за менопаузата претставува чекор напред во демистификацијата на тоа што значи да се биде жена во средни години. Сепак, постои опасност да ги дефинира жените во втората половина од нивната кариера и може да создаде чувство на значаен гест, со прекумерен надомест за годините молчење.
Жените сакаат да бидат вклучени и прифатени, без разлика во која фаза од животот или кариерата се наоѓаат. Нема потреба овде да го наведам она што е очигледно. Тоа е видливоста што ја бараат кога зборуваат за тоа дека стануваат невидливи во средните години. Без привлекување внимание на знаците на стареење. Без чувство дека постои рок на употреба. За да се постигне тоа, мора да се променат ставовите и мора да му пристапиме на ејџизмот (кој ги погодува и мажите и жените) како на која било друга тема за различност и инклузија, како што се полот, културата, расата и попреченоста.
Седокосиот маж се смета за достоинствен. Седокосата жена е изложена на критики. Сите старееме. Едноставно помирете се со тоа.
Текстот го преведе Сузана Митревска
.webp){kind=icon}
