Еднорозите владееја со деценијата, на технолошкиот свет му треба новa ѕверка

Помина една деценија откако инвеститорката во ризичен капитал од Силициумската Долина, Ајлин Ли, го измисли терминот „еднорог“ за да ги опише стартапите чија проценета вредност достигнува милијарда долари. Овој термин наскоро стана популарен. Сепак, денес еднорозите не се толку ретки. По достигнувањето на врвот во возбудливите денови во 2021 година, кога беше лесно да се дојде до капитал, бројот на стартап-еднорози на глобално ниво сега е во опаѓање, од 621 во 2021 година на 95 во минатата година, според податоците на фирмата за истражување на пазарот „ЦБ инсајтс“ (CB Insights). Тоа делумно се должи на повисоките каматни стапки и построгата контрола од страна на инвеститорите.

На некој начин тоа беше здрава промена. Со оглед на тоа што генеративната вештачка интелигенција се заканува повторно да го запали неоснованиот раст на цените на пазарот, инвеститорите треба да го насочат вниманието кон стартапи што имаат силни основи и кои ветуваат на долг рок. Еве нов термин за компаниите што се вклопуваат тука: „чистокрвни“ стартапи.

Тоа се компании што носат најмалку 100 милиони долари годишен приход, вели Саул Клајн, основач на фирмата за ризичен капитал „Локалглоб“ (Localglobe), која се залага за промени во инвестицискиот речник. Стартапите чии годишни приходи изнесуваат најмалку 25 милиони долари се „ждребиња“, додава тој.

Тој не е првиот што се обидува да го врати разговорот на порационални инвестиции користејќи метафори од суштествата. Други предлагаа змејови и кентаури, но Клајн сака да избегне митски суштества. „Не станува збор само за надежи и ветувања туку за надежи и ветувања на цврсти темели“, вели тој. Изминатите неколку децении покажаа дека новите технологии можат да ги преобликуваат индустриите и да обезбедат експоненцијален раст, правејќи го ризичниот капитал една од класите на средства со најдобри перформанси во изминатата деценија, според „Морган Стенли“.

Доминација на американските еднорози

Иако е речиси невозможно да се дознаат бројките за приходите на американските компании како „Скејл.аи“ (Scale.ai) со седиште во Сан Франциско (која штотуку собра милијарда долари врз основа на проценетата вредност од 14 милијарди долари) или нејзиниот сосед „Антрофик“ (за која се вели дека вреди помеѓу 15 милијарди долари и 20 милијарди долари), можете лесно да ги добиете за која било приватна компанија со двајца вработени во Велика Британија, бидејќи сите регистрирани компании мора да поднесат годишни финансиски извештаи до британската агенција за стопански регистри (Companies House).

Досега европските институционални инвеститори претераа со овој пристап, избегнувајќи да инвестираат во ветувачки нови технологии. Кога компанијата за вештачка интелигенција „Дип мајнд“ (DeepMind) започна со работа, нејзините основачи се мачеа да најдат инвеститори за да вложат повеќе од 30.000 фунти (38.000 долари) во фирмата и мораа да отпатуваат во Силициумската Долина за да ги соберат потребните милиони од луѓе како Питер Тиел и Илон Маск. („Дип мајнд“ на крајот беше купена од „Гугл“ за 650 милиони долари.)

Не помогна тоа што европските инвеститори беа повикани да ја исполнат патриотската должност со поддршка на локалните технолошки екосистеми - да се потсетиме на целта на францускиот претседател Емануел Макрон од 25 еднорози до 2025 година. „Инвеститорите разумно прашуваа за што“, вели Клајн. „Во овие научни проекти? Тоа се средства што луѓето ги штедат за пензионирање. Ние не сме добротворни организации“. За да се промени тоа може да помогне доколку институционалните инвеститори видат голем број „чистокрвни“ стартапи низ земјата и во поширокиот европски регион.

Европски „чистокрвни“ стартапи

Британските инвеститори, меѓу другите, се подготвени да инвестираат повеќе средства имајќи предвид дека домашните пензиски фондови, кои управуваат со средства во вредност од три илјади милијарди долари, ветија дека ќе доделат пет проценти од нивните инвестициски фондови на „некотирани акции“ до 2030 година, давајќи му поттик на технолошкиот сектор во земјата. Би било мудро да обрнат внимание на 118-те стартапи во Велика Британија што носат приходи од повеќе од 100 милиони долари, според фирмата за истражување на пазарот „Дилрум“ (Dealroom.io).

Стартапите исто така треба да се воздржат од завист кон еднорозите. На долг рок, успехот може да биде мит како и името.

 

Во моментов нема коментари за веста. Биди прв да коментира...

Остави коментар