Фондот на НАТО ангажира шпански стартап за прва инвестиција во сателит

Инвестицискиот фонд на НАТО, НИФ (NIF), избра шпански стартап за својата прва инвестиција во сателитска технологија, што е нов чекор во напорите на Европа да ја развие таа индустрија на континентот.

Фондот за иновации на НАТО и „Џоин капитал“ (Join Capital) ќе станат инвеститори во „Крејос спејс“ (Kreios Space), кој се стреми да создаде сателити што можат да работат во таканаречени многу ниски орбити, според соопштението на НИФ. Фондовите се дел од групата инвеститори што инјектираат осум милиони евра во почетната рунда.

Многу ниските орбити се движат помеѓу 150 и 400 километри надморска височина. Сопствената технологија на „Крејос“ ќе им овозможи на сателитите да работат на „надморска височина што некогаш се сметаше за невозможна поради атмосферскиот отпор“, се наведува во соопштението на НИФ.

Работата во многу низок орбитен опсег е предизвикувачка бидејќи таканареченото влечење, односно отпор, води до проблеми како што е високата потрошувачка на гориво, а сателитите можат да работат само со денови, а не со години како што прават во повисоките орбити. Од „Крејос“, чие седиште е во северозападниот шпански град Виго, велат дека технологија на фирмата им овозможува на сателитите да се напојуваат од самата атмосфера наместо да мора да носат големи товари.

Сателитите се тестирани во контролирани средини, а „Крејос“ има цел да го постави својот прв сателит во орбитата во 2027 година, според главниот извршен директор Адријан Сенар, кој инаку е еден од шесте соосновачи.

Владите и компаниите низ цела Европа се стремат да развијат сателитски капацитети како дел од поширокиот пораст на трошоците за одбрана. Сателитите се една од областите на фокусот со оглед на зависноста на регионот од неевропски доставувачи, како што е „Спејс икс“ (SpaceX Technologies Corp). Европската Унија во декември објави планови за изградба на мултиорбитална мрежа од 290 сателити до 2030 година.

Шпанскиот сателитски сектор се преобликуваше откако „Индра системас“ (Indra Sistemas SA), најголемата одбранбена компанија во земјата, објави дека планира да создаде сателитска единица. „Индра“, која ја има владата како најголем акционер, со удел од околу 28 проценти, е во процес на преземање на „Хиспасат“ (Hispasat), најголемата сателитска фирма во Шпанија, друга компанија поддржана од владата.

Од друга страна, „Ербас“ (Airbus SE), „Тејлс“ (Thales SA) и „Леонардо“ (Leonardo SpA) планираат да изградат европски вселенски шампион. Во меѓувреме француската и британската влада, меѓу другите, годинава се обврзаа на нови инвестиции во „Јутелсат комуникејшнс“ (Eutelsat Communications SA) за да ѝ помогнат да изгради флота сателити.

НИФ е фонд за ризичен капитал од една милијарда евра поддржан од група сојузници на Северноатлантскиот сојуз за развој на технологија во одбраната и безбедноста.

„Крејос“ е основан во 2021 година и сега има 17 вработени. Други инвеститори во тековната рунда на финансирање се фирмата за ризичен капитал „Гроу венчр фондс“ (Grow Venture Funds), семејната канцеларија „Тасивиа глобал“ (Tasivia Global), како и „Шесгалиција“ (Xesgalicia), разгранокот за ризичен капитал на владата на Галиција, регионот во кој се наоѓа „Крејос“.

Во моментов нема коментари за веста. Биди прв да коментира...

Остави коментар