.webp){kind=icon}
На земјите-членки на ЕУ им било кажано дека блокот има законско овластување привремено да користи најмалку 33,8 милијарди евра (36,8 милијарди долари) од средствата на руската централна банка за да помогне во плаќањето за обновата на Украина, според извори запознаени со ова прашање.
Правната служба на Советот на блокот им укажала на дипломатите дека таков план е правно изводлив, сè додека имотот не е експроприран и се исполнети одредени услови, посочуваат изворите. Тие вклучуваат датум на укинување, фокус на ликвидни средства и јасност дека главнината и каматата ќе бидат вратени во Русија во одреден момент, наведуваат упатените.
ЕУ истражуваше опции за користење замрзнати руски средства по инвазијата од Москва на Украина, но предлогот е контроверзен и дискусиите се во рана почетна фаза. Претставници на ЕУ и некои земји-членки се загрижени за правните оправдувања за таквиот потег и за преседанот што може да се направи, особено преку користење на замрзнатите средства на руската централна банка.
Претседателката на Европската комисија, Урсула фон дер Лајен, изјави дека сака да ја натера Русија да плати за уништувањата предизвикани од нејзината инвазија „со замрзнатите средства на олигарсите и средствата на нејзината централна банка“.
Групата седум и претставници на ЕУ посочија дека се чини оти нема јасни правни основи за едноставно запленување средства на руската банка и нивно пренасочување во Украина.
Наместо тоа, како прв чекор, ЕУ размислува да ги здружи средствата на ниво на ЕУ или на меѓународно ниво, со цел да генерира принос што би можел да се искористи за финансирање на реконструкцијата на Украина - задача што Светската банка процени дека може да чини најмалку 350 милијарди долари.
Додека некои правници на ЕУ гледаат начин за придвижување на иницијативите, извршната власт на Унијата е повнимателна во врска со правната изводливост за користење замрзнати средства, како и за целокупната сложеност на процедурата, велат познавачите на дискусијата. Официјалните лица, исто така, веруваат дека секој план ќе треба да се спроведе во соработка со Г7.
Извршното тело на ЕУ, исто така, предупреди дека ќе биде тешко да се донесе одлука додека не се добие поголема јасност за обемот на средства што би можеле да се користат и дека првиот чекор ќе биде нивно лоцирање. Некои процени сугерираат дека средствата на руската централна банка замрзнати во странство изнесуваат 300 милијарди долари. Официјални претставници на ЕУ проценуваат дека околу 33,8 милијарди евра од тоа се наоѓаат во депозити во рамките на ЕУ, иако бројката сè уште се проценува.
Управувањето со руските средства би дошло со одредени ризици. За време на дискусијата со амбасадорите на ЕУ во средата, адвокатите на ЕУ објасниле дека доколку има загуба додека блокот управува со руските средства, компензацијата ќе треба да се обезбеди преку буџетот на ЕУ или од земјите-членки.
Некои земји-членки ќе продолжат да се залагаат сојузниците да ги запленат средствата во врска со посебната желба да побараат одговорност од Москва за воените злосторства преку специјален трибунал.
