Запленувањето руски средства носи ризик од несакани исходи

Извршната директорка на „Еуроклир“ (Euroclear Ltd.), Валери Урбен, предупреди на непредвидени последици доколку Европската Унија конфискува замрзнати средства од централната банка на Русија.

Претседателот на САД, Доналд Трамп, врши притисок врз Украина да преговара со Русија, а одредени опции за мир ќе носат ризици, изјави Урбен за телевизијата „Блумберг“ на Светскиот економски форум во Давос во петокот. Замрзнатите средства на Русија би можеле да бидат елемент во преговорите, додаде таа, признавајќи дека некои официјални лица се заинтересирани да продолжат со конфискацијата.

„Секогаш може да има и контрамерки од Русија, кои дополнително би ги дестабилизирале финансиските пазари“, рече Урбен.

Бриселската клириншка куќа ги држи најголемите средства на руската централна банка што се замрзнати под санкции од ЕУ и земјите од Групата седум (Г7). Урбен ја истакна важноста од пренос не само на средствата туку и на обврските, во случај на конфискација од страна на земјите членки на ЕУ за да се заштити „Еуроклир“ од подоцнежни побарувања од Русија.

„Го видовме случајот со иранските средства повеќе од 20 години подоцна“, рече Урбен. „Затоа мислам дека ова не е нешто што е теоретско“.

Еврокомесарот за економија Валдис Домбровскис во декември изјави дека блокот треба да размисли за преземање чекори надвор од замрзнувањето на средствата, вклучувајќи и нивно запленување за да ѝ се компензира на Украина за штетата од инвазијата на Русија.

Досега ЕУ ги користеше само профитите генерирани од санкционираните руски средства за да обезбеди помош за Украина, бидејќи целосната конфискација останува многу поконтроверзна според меѓународното право. Според планот на Г7, сојузниците на Киев одобрија механизам во кој профитите се користат за поддршка на пакетот заеми од 50 милијарди евра за Киев.