Известувања за дваесетина договори за набавка на биолошка терапија за Клиниката за радиотерапија и онкологија дури деновиве биле испратени до Бирото за јавни набавки иако сите се склучени во мај годинава. Оваа клиника е во центарот на вниманието, но и на обвинителска истрага откако излегоа медиумски написи за наводен криминал и тргување со набавената скапа биолошка терапија. Поради тие наводи вчера имаше и протести во Скопје, низ кои граѓаните гласно бараа одговорност од надлежните. Скандалот вклучува обвинувања за тргување со скапа биолошка терапија, лекови што наместо за лекување завршувале на црниот пазар. Во него се вклучени вработени од клиниката, но наводите сè уште се испитуваат.
МИА
На Бирото за јавни набавки деновиве осамнуваат објавени огласи за набавка на оваа биолошка терапија, сите од реализираниот тендер оваа година, но во пролетните месеци. Доставувачи или избрани компании се повеќе, договорите се склучени на 8 мај, а вкупната вредност надминува 19,5 милиони евра. Највредната набавка е над 8,3 милиони евра, а ја добила компанијата „Д-р Пановски“. До Бирото за јавни набавки е пратен на 30 август годинава, кога веќе се зборуваше за аферата. Договорот е едногодишен и потписници се директорите на клиниката Виолета Клисаровска и Халид Матоши.
Клисаровска, Меџити и Матоши на вчерашниот прес/МИА
На тој датум бил склучен договор и со „Алкалоид конс“ - за набавка на биолошка терапија во вредност од 3,3 милиони евра.
Прочитај повеќе
Онколошки криминал ја тресе Македонија, скапи лекови на црниот пазар во Косово?
Додека Јавното обвинителство врши распити, јавноста е згрозена, а надлежните уверуваат дека делото ќе биде истражено докрај.
04.09.2023
Уште неколку договори датираат од тој датум - нешто над милион евра се тие што се склучени со „Царсо пхарм“ ДООЕЛ - Илинден, „Зегин“ ДОО, и „Варус“ ДООЕЛ. Преостанатите се на сума под 500 илјади евра, а некои се и со вредност од по 10.000 евра. Секоја компанија доставува различен лек, а сите договори се овде.
Во текот на вчерашниот ден во Бирото за јавни набавки стигнале и податоци за други меѓународни тендери за набавка на лекови, сите склучени порано или во текот на минатиот месец.
Протестот во Скопје/МИА
Вчера попладне имаше протест за овој скандал, а граѓаните, кои протестираа прво пред Владата, а потоа и пред Јавното обвинителство, бараа одговорност и оставка од тројцата последни министри за здравство.
Како што јави МИА, учесниците во протестот го изразија својот револт со фрлање јајца кон ЈО и извикуваа „убијци“, „мафија“, „оставка“, „нема правда, нема мир“, како и „правда за жртвите“. Тие повикаа на поддршка од сите граѓани, без разлика на етничката припадност или партиската определеност. Граѓаните најавија дека повторно ќе има протести следниот понеделник, во истото време и на истото место.
.webp){kind=icon}