Предвидувањето на екстремните временски настани станува тешко

Климатските промени го отежнуваат прецизното предвидување на екстремните временски настани, изјави австралискиот министер за земјоделство Мареј Ват, поради критиките дека метеоролошката служба на земјата не предупредила за смртоносните бури оваа недела.

„Климатските промени имаат влијание“, изјави Ват за австралиското радио во сабота. „Моделите што традиционално ги користиме мора да се променат бидејќи климата се менува. Ова е нешто на што Канцеларијата работи напорно, но за жал, реалноста е дека климатските промени значат дека ќе живееме низ уште понепредвидливо време“.

Метеоролошката канцеларија е на удар на критики затоа што не ги известила жителите на време за смртоносните грмотевици оваа недела, откако тропскиот циклон Џаспер стигна до копното во Квинсленд.

Ват, кој е и министер за управување со вонредни состојби, одговори на критиките што ги доби Бирото за метеорологија, велејќи дека „метеорологијата не е совршена наука“.

„Јас сум многу отворен за идејата дека можеме подобро со Бирото за метеорологија и сигурен сум дека ќе има работа таму“, рече тој.

Претходно оваа недела, бури го погодија источниот брег на земјата, при што загинаа најмалку девет лица. Предупредувањата за силни грмотевици остануваат во сила за југоисточен Квинсленд, се предупредува и на многу силен ветар, многу град и поројни дождови кои можат да предизвикаат поплави. Чистењето од овонеделното невреме продолжува, а илјадници домаќинства ширум регионот сè уште се без струја, според австралиското радио.

Во меѓувреме, силни топлотни бранови се предвидуваат за северозападните предели од земјата.

Во моментов нема коментари за веста. Биди прв да коментира...

Остави коментар