САД и Велика Британија извршија воздушни напади врз повеќе од 60 цели на Хутите во Јемен, што предизвика закани за одмазда и пораст на цената на суровата нафта, по нападите во Црвено Море, кои го прекинаа транспортот неколку недели.
Во нападите во текот на ноќта, американските и британските сили погодија 16 локации, вклучувајќи и радарски системи, магацини и лансирни рампи за беспилотни летала, крстосувачки и балистички ракети, соопштија американските воздухопловни сили.
Овој потег е „јасен сигнал дека Соединетите Американски Држави и нашите партнери нема да толерираат напади врз нашиот персонал или да дозволат непријателските сили да ја попречат слободната пловидба во една од најкритичните поморски маршрути во светот“, се наведува во изјавата на американскиот претседател Џо Бајден, кој не исклучува и понатамошни напади.
Британскиот премиер Риши Сунак ги опиша нападите како „ограничен, неопходен и пропорционален одговор“ по неколкунеделни „опасни и дестабилизирачки напади“ на Хутите врз бродовите во Црвено Море.
Иако е премногу рано да се процени влијанието на нападот, кој започна во 2 часот по полноќ по локално време во Јемен, тој имаше цел да ги спречи Хутите да ги напаѓаат трговските бродови. Акцијата донесе и нов ризик за ширење на конфликтот, кој започна откако силите на Хамас го нападнаа Израел на 7 октомври.
Милитантите Хути соопштија дека веќе извршиле првичен одговор на нападите на САД и Велика Британија и се заканија дека ќе ги прошират „многу наскоро“.
Тоа го изјави портпаролот на групата Мохамед Абдулсалам без да даде дополнителни детали за реакцијата. Тој рече дека имало 68 напади врз Јемен, со загинати и повредени, и дека групата не цели на ниту една земја освен на Израел.
Хутите потврдија и дека ќе продолжат да ги напаѓаат израелските бродови во Црвено Море и сите други бродови што се упатуваат кон таа земја или се поврзани со неа.
.webp){kind=icon}