Тие што вчера беа дел од конференцијата на „Блумберг Адрија“ во Скопје знаат колку плодни дискусии се развија од експертите и претставниците на бизнис секторот и тоа на повеќе теми. За тие што не беа во можност да присуствуваат во детали ги пренесуваме клучните поенти.
Со вицегувернерката Ана Митреска зборувавме за инфлацијата, за која Народната банка веројатно ќе направи нагорна корекција во рамки на своите прогнози во следниот извештај, а враќање на историскиот просек се очекува на среден рок, како и за стабилноста на банкарскиот сектор.
Нашиот тим лидер за аналитика Михаел Блажековиќ понуди сèопфатна анализа за конкурентноста на Македонија и на кој начин може да се постигне европскиот стандард.
Се дискутираше и за проблемот кој долго го тишти бизнис секторот – недостиг на квалификуван кадар, па на панелот се понудија доста конкретни решенија кои може да доведат до конкретно решение и излез од кризата.
Стана збор и за даночните политики, фискалната дисциплина, улогата на банките и финансирањето проекти, како и за тоа дека јавно-приватно партнерство е модел кој не само што ќе овозможи квалитетни услуги, туку ќе придонесе за одржлив раст.
Затоа, не ги пропуштајте настаните во организација на „Блумберг Адрија“ – секогаш нудиме едукативни и продуктивни дискусии на сцената.
Секако дека покрај нашата успешна конференција имаме и други важни вести. Добро утро!
Фед ја намали основната каматна стапка за четвртина процентен поен
Претставниците на Федералните резерви (Фед) на САД вчера одлучија да ги намалат каматните стапки по втор пат оваа година. Федералниот комитет за отворен пазар (FOMC) гласаше со 10 наспроти два гласа за намалување на референтната каматна стапка за четвртина процентен поен, со што ги доведе каматите во опсег од 3,75 до четири проценти.
Одлуката е донесена без една од најважните алатки за проценка на економијата: официјалните владини податоци, објави „Блумберг“. Федералните статистички агенции во голема мера не ги објавуваат своите вообичаени економски извештаи поради затворањето на владата. Иако претседателот на Фед, Џером Пауел, претходно изјави дека службениците сè уште ги анализираат јавните и приватните податоци што се достапни, тој предупреди дека ситуацијата може да стане попредизвикувачка ако затворањето трае подолго.
Европска автоиндустрија: Како да не се доволна грижа кинеските конкуренти, сега фалат и чипови!
Ескалацијата на трговската војна помеѓу САД и тандемот Русија–Кина по сѐ изгледа ја затекна Европската Унија (ЕУ) недоволно подготвена, при што најголемиот удар го претрпува европската автомобилска индустрија, веќе начната од помалата побарувачка, високите трошоци и поевтината кинеска конкуренција.
Тоа што Кина го ограничи извозот на ретки метали, чипови и суровини за батерии, по воведувањето на американските царини и откако Холандија одлучи да ја заплени компанијата за чипови „Нексперија“ (Nexperia), која е во сопственост на кинеската фирма „Вингтеч технолоџи“ (Wingtech Technology), доведе до нарушување во понудата на чипови на европскиот пазар и големите автомобилски компании веќе ги чувствуваат последиците.
Скриени дијаманти на берзите во регионот Адрија
За да се најдат дијаманти во природата, понекогаш е потребно низ рацете на трагачите да поминат стотици тони земја за да се дојде до грутката или каменот под кои се крие посакуваното скапоцено парче, кое во зависност од големината и квалитетот може да донесе вредно богатство. При ваквите потфати секогаш е присутен ризикот да се остане со празни раце. Слична е приказната и на пазарите на капитал. Не е лесно да се изберат компаниите чии акции на инвеститорите би им донеле приноси на краток или на долг рок. При носењето на одлуките за инвестирање, тие се распнати меѓу брзо променливи трендови, геополитички тензии и шокови што влијаат врз резултатите на компаниите. Сепак, со добро истражување базирано на издржани критериуми и показатели за вреднување, на секој пазар на капитал може да се најдат компании што сѐ уште не го достигнале својот потенцијал односно имаат перспектива за развој, а на некој начин се занемарени од пошироката инвеститорска јавност.
„Енвидија“ ќе стане највредната компанија во историјата, се приближува до 5 билиони долари
„Енвидија“ е на пат да стане првата компанија со пазарна вредност од пет билиони долари, откако серијата зделки што ги склучи извршниот директор Џенсен Хуанг ја издигнаа еуфоријата околу вештачката интелигенција (ВИ) на ново ниво.
Акциите на компанијата пораснаа за 3,5 отсто, достигнувајќи 208,05 долари во преттргувањето, што укажува дека „Енвидија“ ќе го премине историскиот праг со почетокот на редовната берзанска сесија. Инаку, поминаа само четири месеци откако компанијата го надмина нивото од четири билиони долари.
„Опен еј-ај“ му додели на „Мајкрософт“ удел од 27 отсто, целосно преминува во профитна компанија
„Опен еј-ај“ (OpenAI) му додели на „Мајкрософт“ (Microsoft Corp.) удел од 27 отсто како дел од планот за реструктурирање за кој се преговараше речиси една година, со што се отстрани голема неизвесност за двете компании и се отвори патот производителот на ЧетГПТ (ChatGPT) да стане профитна компанија.
Освен удел во „Опен еј-ај“ вреден околу 135 милијарди долари, „Мајкрософт“ ќе има пристап до технологијата на стартапот за ВИ до 2032 година, вклучувајќи ги и моделите што го достигнале прагот на т.н. генеративна вештачка интелигенција – понапредна форма на ВИ што повеќето експерти сè уште сметаат дека не постои.
.webp){kind=icon}
