.webp){kind=icon}
Македонски автори и режисери продолжуваат да редат меѓународни успеси во 2024 година. Горан Столевски пред десет дена ја освои главната награда на филмски фестивал во Норвешка, а минатата недела убава вест соопштија и продуцентите на серијата „Сказните на Биби“, која отсега може да се гледа во Велика Британија и во САД.
Волшебен универзум за деца, сурова планета за возрасни
„Домаќинство за почетници“ ја освои главната награда „Аурора“ на Меѓународниот филмски фестивал во Тромсе, кој се одржа од 15 до 21 јануари. На режисерот Горан Столевски му беа доделени 5.000 евра.
Ова е трет филм на македонско-австралискиот автор, кој на отворањето на фестивалот за филмска камера „Браќа Манаки“ кажа дека е негова емотивна биографија.
„Домаќинство за почетници“ лани имаше светска премиера на 80-от Филмски фестивал во Венеција, во програмата Хоризонти. Тој доби одлични рецензии и освои една од паралелните награди „Квир лав“.
„’Квир лав’ со гордост го наградува филмот за невообичаеното и храбро прикажување на етникумите, различностите, родовиот идентитет, љубовта, пријателството и емотивните афинитети“, беше наведено во образложението за наградата.
„Домаќинство за почетници“ беше и македонскиот кандидат за „оскар“, но не влезе во потесната листа за номинација.
Приказната се занимава со универзалните вредности на семејството, она во кое сме родени и она што самите го избираме. Главните улоги ги играат Анамариа Маринка и Алина Сербан од Романија, Самсон Селим, Миа Мустафа и Џада Селим од Македонија и Владимир Тинтор од Хрватска.
На 26 јануари филмот имаше кинопремиера во САД.
Во САД, но и во Велика Британија, отсега може да се гледа и македонската анимирана серија „Сказните на Биби“. Десет епизоди од серијалот за Биби и Боби на англиски јазик се достапни на „Амазон прајм видео“.
На популарната платформа за стримување проектот е најавен како волшебен универзум за деца од предучилишна возраст преку кој најмалите учат вредни лекции за добрина, храброст и лидерство.
„Тајната на пештерата“, „Малата вештерка“, „Роботчето Р1“, „Вредниот мрзливец“ и „Жирафата Жижи“ се дел од епизодите што сега се достапни за американскиот и за британскиот пазар.
bibi.mk
Првата епизода беше емитувана во октомври 2018 на Јутјуб. Подоцна серијалот почна да се прикажува на националниот сервис, а пред две години стана првиот македонски анимиран производ дистрибуиран во странство, откако правата за емитување во Хрватска ги откупи телевизијата „Нова“.
Главна сценаристка на серијата е Билјана Црвенковска, Михајло Димитриевски-Тхе Мичо е уметнички директор, а како режисери се менуваа Гоце Цветановски и Никола Чикос.
Рекорден број наслови со светски премиери
Во 2023 година рекорден број филмови во македонска продукција беа прикажани на светски фестивали. Некои се закитија и со признанија.
Македонскиот филм „М“ пред два месеца доби награда на њујоршкото издание на фестивалот на независен филм „Денсес вит филмс“ (Dances with films), кој „Ју-ес-еј тудеј“ го вброи меѓу десетте најзначајни филмски настани надвор од Холивуд.
Лична архива (Филм М на Вардан Тозија)/Фејсбук
Ова остварување на режисерот Вардан Тозија е дистописка приказна за осамено момче од шума, кое наидува на низа предизвици и авантури, барајќи ја својата самовила.
Филмот лани имаше премиера на отворањето на фестивалот „Синедејс“ во Скопје, а играше и на фестивали во Германија, Италија и во Србија.
„Преекспонирано“, дебитантскиот филм на Елеонора Венинова, во јуни доби специјална награда на фестивалот „Кинест фест“ во Катанија, Италија.
Меѓународното жири на фестивалот го пофали филмот како „интелигентна и актуелна камерна претстава“.
Во фокусот на приказната е проблематична тинејџерка што ја нарушува рамнотежата на една брачна двојка, откако оди кај нив на гости на неколку дена.
Светската премиера на „Преекспонирано“ беше во Каиро на фестивалот од А-категорија, а азиската во Пуне, Индија. Филмот се прикажа и на фестивалот „Евроазија“ во Варшава.
Уште еден дебитантски филм на македонски режисер лани предизвика интерес надвор од границите. Политичкиот трилер „Бизнисот на задоволството“ на режисерот Гоце Цветановски беше прогласен за најдобар долгометражен филм на фестивалот „Во палатата“ во Софија, каде што ја имаше и светската премиера.
Приказната следи новинарка, која, опседната со исчезнувањето на нејзината најдобра пријателка, подготвува тајна операција за да разоткрие мрежа на трговија со жени. Но, како што нејзините соучесници се приближуваат до шефот, ситуацијата излегува од контрола.
Директор на фотографијата е Фејми Даут, еден од двајцата кинематографери на „Медена земја“, македонскиот документарец што доби две номинации за „оскар“.
