.webp){kind=icon}
Во исчекување на одлуката на НБРМ за движењето на основната камата во земјава, од САД доаѓаат неповолни вести. Инфлацијата во февруари, втор месец по ред, била над прогнозите. Ваквите податоци ги засилуваат намерите на ФЕД да почека со олабавувањето на монетарната политика. Уште пред да бидат објавени бројките за инфлацијата, економистите на „Блумберг“ анализираа дека тие нема да ги натераат креаторите на политиките во ФЕД да ги намалат каматите на следниот состанок.
Добро утро, ова се петте вести важни за почетокот на денот
И Македонците влегоа во крипто-треска: Дали и кога биткоинот ќе пробие 100.000 долари
По „криптозимата“ во која се случија низа скандали, банкроти и пад на цената од скоро 77 отсто, изворната криптовалута конечно достигна нов врв на 5. март, надминувајќи ја волшебната граница од 69.000 долари (тогаш достигна вредност од 69.191,95 долари, а претходниот рекорд беше 68.991,85 долари на 10 ноември 2021 година).
Во вторникот токенот за првпат скокна и над 72.000 долари, поточно на 72.165 долари. Зголемен интерес за купување биткоини во последниот период има и во Македонија.
Дали е момент македонските инвеститори да ќарат од акциите во Кина?
Доаѓа ли период на будење на кинескиот пазар на капитал, кој подолг период е подзаспан и е далеку од перформансите на западните пазари на кои главните берзански индекси во изминатиов период уриваа рекорди е прашање што добива на значење меѓу инвеститорите во светот. Главните дилеми се дали сега е правиот момент и во кои кинески компании да се инвестира за да се оствари добивка од евентуален раст на нивната вредност во иднина.
Со оглед на тоа што станува збор за економија која е во тесна зависност од државните политики многумина го очекуваа завршувањето на годинешното заседание на кинескиот Народен конгрес, но освен целта за економски раст од пет проценти во 2024 година и издавањето на ултра долги државни обврзници од овој настан не произлегоа конкретни чекори кои би ја вратиле довербата на инвеститорите во кинеската економија, која е втора по големина во светот.
Треба ли промена на моделот на привлекување странски инвестиции?
Подобрување на квалитетот на животот преку забрзување на економскиот раст е основната цел на реформскиот план „Визија за забрзан раст“ што го предлага организацијата „Македонија 2025“.
„Ние досега во нашата економија сме ги почувствувале тие високи стапки на економски раст на пет отсто, што значи дека можеме. Меѓутоа, предуслов е економијата да ни биде приоритет наместо политиката и секако дека треба да разбереме дека реформите се маратон, а не спринт“, вели Никица Мојсоска Блажевски, главна извршна директорка на „Македонија 2025“.
Инфлацијата во САД повторно е над очекувањата
Базичната инфлација на САД ги надмина прогнозите втор месец во февруари, засилувајќи го внимателниот пристап на Федералните резерви кон намалувањето на каматните стапки.
Таканаречениот основен индекс на потрошувачки цени (CPI), кој ги исклучува трошоците за храна и енергија, се зголеми за 0,4 отсто во однос на јануари, според владините податоци објавени во вторникот. Во однос на пред една година е зголемен за 3,8 отсто.
Растат испораките на сурова нафта од Русија
Извозот на руска сурова нафта преку море се искачи на највисокото ниво од почетокот на годината, при што пратките од клучното пристаниште на Пацификот закрепнаа по невремето што ги отежна операциите на товарење минатата недела.
Скокот од 590.000 барели дневно во неделата до 10 март дојде веднаш откако Москва ја обнови својата посветеност на напорите на ОПЕК + да ја спречи глобалната презаситеност и да ги поддржи цените со ограничување на производството. Неделните текови изнесуваа 420.000 барели дневно пред ветувањето на Русија кон нејзините партнери за првиот квартал, при што четиринеделниот просек ја надминува целта за 80.000 барели дневно.
