Иран започна голем напад на Израел со дронови и проектили

Иран вечерва го нападна Израел со беспилотни летала и проектили. Нападот дојде само неколку часа откако корпусот на Исламската револуционерна гарда заплени контејнерски брод на израелска компанија во близина на Ормутскиот теснец помеѓу Персискиот и Оманскиот залив. Иранската револуционерна гарда преку националната телевизија потврди дека почнала опсежна операција со беспилотни летала насочени кон Израел.

Истовремен напад со беспилотни летала и проектили може да го збуни израелскиот воздушно-одбранбен систем, бидејќи тие можат да пристигнат со различни брзини, на различни надморски височини и насоки, според американски официјален претставник, кој побара да остане анонимен.

Најавена е можност да се повикаат на помош американските поморски сили во соборувањето на проектилите. Два разурнувачи на американската морнарица се во регионот и имаат системи за противвоздушна одбрана способни да соборуваат беспилотни летала и проектили.

Непосредно пред веста дека Иран го почнал нападот, на мрежата X беше објавен краток видео говор на Бенјамин Нетанјаху. Таму, премиерот рече дека Израел со години се подготвувал за можен директен напад од Иран и дека неговите одбранбени системи се распоредени и се подготвуваат за секое сценарио.

Иран со денови се закануваше со акција против Израел како одговор на нападот врз иранскиот дипломатски комплекс во Сирија во кој загинаа најмалку 13 лица, вклучително и високи членови на револуционерната гарда. Техеран соопшти дека тоа е еквивалентно на напад на територијата на Иран и го обвини Израел за нападот. Администрацијата на Бенјамин Нетанјаху не презеде одговорност за овој напад.

 

 

Во моментов нема коментари за веста. Биди прв да коментира...

Остави коментар