Инфлуенсери од Тикток му помагаат на НАТО да се поврзе со генерацијата зед

Како и на повеќето 75-годишници, на НАТО му е потребна помош за да допре до помладата генерација.

Воената алијанса неделава се бори со главоболки како што се евентуалниот пристап на Украина и лошата здравствена состојба на 81-годишниот американски претседател. За да остане релевантен во модерната ера, сојузот се сврте кон група од 20-тина инфлуенсери за да ја рашират неговоата порака.

Североатланската алијанса покани 16 креатори на содржини од земји вклучувајќи ги Британија, Германија и Франција со следбеници на Тикток (TikTok), Инстаграм (Instagram) и други платформи за социјално вмрежување да присуствуваат на нејзиниот самит во Вашингтон од 9 до 11 јули. Уште 10 инфлуенсери од САД ќе дојдат на покана на Министерството за одбрана и Стејт департментот на САД.

Овој потег е признание дека традиционалните медиуми и нивниот начин на покривање на самитот, можеби нема да стигнат до генерацијата зед.

Исто така, покажува колку долгогодишните институции како НАТО сè повеќе треба да размислуваат надвор од рамката за да ја зајакнат јавната поддршка - особено во време кога поранешниот претседател Доналд Трамп и другите републиканци се залагаат САД да ги намалат трошоците во поглед на европската одбрана.

Алијансата ги платила патните трошоци нa инфлуенсерите, но не врши никаква уредувачка контрола врз нивните објави и нема да им плаќа надомест, според портпаролот Том Пејре-Коста.

Тој не ги потврди имињата на поканетите инфлуенсери, но официјалните профили на социјалните мрежи на НАТО содржат објаснувачко видео за потеклото на алијансата, раскажано од 25-годишниот инфлуенсер, Ентони Полцари.

„Креаторите ќе добијат можност да присуствуваат на Јавниот форум на НАТО и да се поврзат со бројни експерти и високи претставници на НАТО и сојузниците“, посочи Пејре-Коста во е-пошта. Ова не е прв пат  - група креатори на содржини го посетија седиштето на НАТО во Брисел во април, за да ја одбележат 75-годишнината. Слична програма беше организирана и во 2022 година.

Полцари во интервју рече дека бил поканет да помогне во воведното видео, но не можел да се приклучи на програмата за инфлуенсери за време на самитот поради зафатениот распоредот. Тој верува дека креаторите на содржини како него можат да помогнат да се пренесе пораката на НАТО до генерацијата која е на работ да ја преземе власта.

„Нашата генерација ќе ги преземе уздите на власта многу брзо. Многу луѓе, многу попаметни од мене, ќе ја водат оваа земја“, рече тој. „Мислам дека е обврска на овие организации да се погрижат помладите генерации да знаат што прават“.

Неопходна организација

Во канадската амбасада во Вашингтон во вторникот, 22-годишната Аманда Раунд седеше во медиумскиот дел и го слушаше говорот на премиерот Џастин Трудо за безбедносните импликации од климатските промени. Таа внимателно слушаше, размислувајќи како да ги пренесе настаните од денот на нејзините 161.700 следбеници на Тикток.

Раунд рече дека припаниците на нејзината генерација навистина не следат традиционални медиуми, особено ако тие се зад „платежен ѕид“. Наместо тоа, тие имаат тенденција да ги добиваат своите информации од социјалните медиуми, рече таа.

Таа смета дека дезинформациите и лажните вести се шират како шумски пожар и смета дека поканата од НАТО е важна можност да ѝ помогне на својата публика  - главно девојки и млади жени на возраст од 16 до 24 години  - да ја разберат важноста на НАТО.

„Верувам дека тоа е неопходна организација, очигледно во нашата политичка клима во моментов во однос на одбраната, но и во однос на други закани како што се климатските промени“, рече таа во интервју. „Би ги охрабрила младите луѓе повеќе да се ангажираат околу тоа“.

Групата од речиси 30 инфлуенсери во Вашингтон оваа недела има публика од околу 40 милиони преку платформите за социјално вмрежување, посочи портпаролот на Стејт департментот преку е-пошта.

„Знаеме дека сè повеќе луѓе добиваат вести преку каналите на социјалните медиуми, вклучително и преку креаторите на содржина“, рече портпаролот. „За време на Самитот на НАТО, ги вклучуваме и овие гласови за да допреме до нова публика и да ја објасниме важноста на алијансата и нејзината 75-годишнина“.

Во моментов нема коментари за веста. Биди прв да коментира...

Остави коментар