Поткастери наспроти инфлуенсери: Која е разликата и како заработуваат?

Во денешниот дигитален пејзаж, и поткастерите и инфлуенсерите ги привлекоа вниманието и интересот на публиката низ светот. Но по што се разликуваат и како заработуваат?

Според „Поткастерс јунајтед“ (PodcastersUnited), за волја на вистината, термините „поткастер“ и „инфлуенсер“ често се користат како синоними, но постои суптилна разлика помеѓу двете. Поткастер е едноставно некој што создава и води поткаст. Инфлуенсер, од друга страна, е некој што изградил публика и има моќ да влијае врз неа.
Значи, дали поткастерот може да биде и инфлуенсер? Да, апсолутно. Но не сите поткастери се влијателни. И не сите инфлуенсери се поткастери.

Клучната разлика помеѓу поткастер и инфлуенсер е тоа што поткастерот обично е водач на мислата во своето излагање. Поткастерот ги споделува сопствената експертиза и став со својата публика. Инфлуенсерот, од друга страна, во не баш ретки случаи нема своја стручност. Тој едноставно може да биде некој што е добар во градење врска со публиката и ангажман со неа.

Поткастингот еволуираше од хоби во мејнстрим форма на медиум, со милиони креатори и слушатели што се занимаваат и креираат емисии на секоја тема што може да се замисли. Како што индустријата продолжува да расте, едно од најчесто поставуваните прашања е колку заработуваат поткастерите. Краткиот одговор е - зависи. Заработката може драматично да варира врз основа на низа фактори, вклучувајќи ги големината на публиката, нишата на поткастот, користените методи за монетизација и севкупниот квалитет на производството.

„Сė што е ново нормално е да разбуди интерес и многумина се обидуваат да го работат тоа. Така беше со инфлуенсерството пред неколку години, така е и сега со поткастите“, вели Лила Филиповска, добропознато ТВ-лице на македонската јавност, која самата по себе е бренд, а со тоа и влијателна личност, односно класичен инфлуенсер.

Лила Филиповска Инстаграм/Приватна архива, фото: Спасе Јовановски

 

„И очекувано е да се појават многу поткасти затоа што денес можеш да снимаш поткаст буквално секаде со телефон, што многу го олеснува целиот процес и затоа има хиперпродукција на поткасти, па затоа секогаш останувам на тоа дека телевизијата останува ‘кралица’ на сите медиуми, затоа што знам колку труд, работа и професионализам бара таа и ништо не може да се спореди со тоа“, вели Лила Филиповска.

Според неа, заработувачката од поткастерството и/или инфлуенсерството зависи од индивидуалната способност.

„Во однос на заработувачката сѐе индивидуално и зависи од способноста да пронајдеш спонзори што ќе го платат тоа. Така што нема филозофија - сѐ се сведува на принцип на пазар, едни продаваат, други купуваат, некои се поуспешни во тоа, некои не, но заедничко за сите на крајот им е профитот“, вели Филиповска.

Врвните поткастери заработуваат од шест до седум цифри годишно преку приходи од реклами, спонзорства, продажба на стоки, модели на претплата, настани во живо и премиум содржина. Сепак, огромното мнозинство поткастери започнуваат скромно и честопати генерираат сосема мал или речиси никаков приход во раните фази.  Според тоа, може да се заклучи дека со вистинска стратегија и посветеност, поткастингот апсолутно може да еволуира во профитабилен бизнис или добра дополнителна заработка. 

Долгогодишниот соработник на Лила Филиповска, исто така познато ТВ-лице и актуелен презентер на временска прогноза, Спасе Јовановски, од неодамна е и поткастер. Тој за „Блумберг Адрија“ го споделува своето искуство во однос на креирањето поткаст-содржини и можностите за заработка.

Спасе Јовановски Инстаграм/Приватна архива

 

„Јас ја имав таа среќа да дојдам што се вели ‘на готово’ во поткастот во Сител. Инаку, за да имаш квалитетен поткаст, прво се тргнува од опрема, микрофон, камери, студио, светло. Сето тоа со монтажа или пренос во живо доколку го изнајмиш, би те чинело од 200 до 300 евра по емисија. Зборувам за професионално студио. Инаку, денес може секој да се пикне во некој ќош, да земе два микрафона и еден мобилен телефон и да прави поткаст“, вели Јовановски. „Нашите поткасти повеќе личат на интервјуа бидејќи материјалот брзо се троши, мала земја, малку познати, па луѓето додека ги убедиш за гостување тоа е цел процес“, додава Спасе Јовановски.
Тој посочува дека главниот извор на заработка во случајот со поткастите кај нас секако е спонзорството, а потоа придонесуваат и можностите за донации од страна на публиката.

„Поткастерите, како и сите, заработуваат од спонзори и нешто ситно од јутјуб-реклами. Некои имаат и отворено донации каде што гледачот самоволно, доколку му се допаѓа емисијата, го ‘чести’ водителот. Доколку знаеш да работиш, можеш и да заработиш“, вели Спасе Јовановски, кој признава дека не е лесно и на двете полиња (поткастерство и инфлуенсерство), но дека со склучени годишни договори со неколку спонзори може пристојно да се живее. „Но не и луксузно, како што некој сака да го протне тоа, а не знам зошто... Мала држава сме, уште помал град, секој со секого се знае и нема потреба од глума и преправање“, вели Јовановски. 

Лила Филиповска и Спасе Јовановски Инстаграм/Приватна архива

 

Според него, кај нас зборот инфлуенсер (англ. influence - влијание) малку се извади од контекст. „Мене ми се налутија неколку инфлуенсерки кога во едно интервју кажав дека се интернет-продавачки, а не инфлуенсерки, но работите треба да ги кажуваме со правите имиња, како што јас не сум метеоролог туку сум презентер“, вели Спасе Јовановски.

И нашата соговорничка Лила Филиповска го дели истото мислење во однос на сфаќањето на зборот инфлуенсер.

„Инфлуенсер, како што веќе добро знаете, значи некој што влијае на јавното мнение и публиката. Изразот инфлуенсер е од пред неколку години, со експанзијата на социјалните мрежи, особено Инстаграм, и некако луѓето го поврзуваат тоа исклучиво со нив. Но најдобрите инфлуенсери многу често немаат социјални мрежи, како многу врвни спортисти, успешни бизнисмени… Гледано така, без лажна скромност, јас сум водителка-инфлуенсерка веќе 30 години на ТВ Сител“, вели Лила, која гордо посочува дека е меѓу првенците во Македонија што започнале со инстаграм-инфлуенсерство и нејзиниот профил има над 234.000 следбеници.

Лила Филиповска Инстаграм/Приватна архива, фото: Спасе Јовановски

 

„Во однос на моето инстаграм-инфлуенсерство ќе го кажам и тоа дека меѓу првите почнав своите телевизиски спонзори да ги објавувам на Фејсбук и на Инстаграм без намера да заработувам, но кога веќе ми е дадена таква можност секако дека ќе ја искористам“, вели Филиповска. За неа социјалните мрежи пред сѐ се хоби и, како што вели, ужива да споделува со своите пријатели размислувања, слики, видеа од нејзините патувања и модни комбинации. „Се трудам сето тоа да биде забавно и тој што одлучил да ми биде пријател тука да ужива во убави нешта, а не во токсична содржина. Јас имам мој тим со кој ги смислувам и работам содржините, без разлика дали се реклама или не, и среќна сум што секогаш испорачуваме професионална и културна содржина сите овие години“, вели Филиповска. „А дали може да се живее само од инфлуенсерство, не знам, затоа што јас имам примарна одлично платена професија, која 30 години ми овозможува лагоден живот“, вели Лила Филиповска.

Како поткастерите го монетизираат својот ангажман?

Поткастерите заработуваат пари на повеќе начини. Ги одвојуваме најчестите можности за заработка:

1. Спонзорства и рекламирање

Спонзорствата се примарен извор на приход за повеќето поткастери. Брендовите им плаќаат на поткастерите да ги промовираат нивните производи во епизодите. Стандардната стапка се заснова на ЦПМ (англ. CPM - Cost Per Mille). Тоа претставува модел на пресметка на цената за рекламирање според кој огласувачот плаќа одредена претходно дефинирана сума за секои 1.000 импресии.                

Според „Инфлуенсер маркетинг хаб“ (Influencer Marketing Hub), вообичаените цени за реклами се: • Реклами пред почеток на емисијата (15-25 секунди): 15-25 долари по ЦПМ • Реклами за време на снимањето (30-60 секунди): 25-50 долари по ЦПМ • Реклами по објавувањето на емисијата (15-25 секунди): 10-20 долари по ЦПМ На пример, ако поткастот има 20.000 импресии по епизода, а цената по ЦПМ е 25 долари, тогаш заработката може да достигне 500 долари по реклама. Со повеќе реклами по епизода, заработката брзо се зголемува.

  

2. Донации од слушатели/гледачи

Многу поткастери користат платформи како „Патреон“ (Patreon), „Бај ми а кофи“ (Buy Me a Coffee) или „Кикстартер“ (Kickstarter) за да добијат директна финансиска поддршка од обожавателите. Слушателите можат да придонесуваат месечно во замена за бонус содржина, ран пристап или директно заблагодарување за време на емисијата.

Пример: Поткастот „Крајм џанки“ (Crime Junkie) наводно заработува над 200.000 долари месечно преку „Патреон“ од своите обожаватели.

3. Платени претплати и ексклузивна содржина

Платформите за објава како „Епл поткастс“ (Apple Podcasts) и „Спотифај“ (Spotify) нудат платени претплати каде што слушателите плаќаат за пристап до ексклузивна содржина, епизоди без реклами или рани изданија. Ова е слично на моделот на членство.

Пример: Според „Фајнанс баз“ (Finance Buzz), „Поткастот на Џо Баден“ (The Joe Budden Podcast) им нуди ексклузивни епизоди на претплатниците на „Патреон“, генерирајќи на тој начин илјадници долари месечно од премиум членовите.

4. Партнерски (афилиејт) маркетинг

Афилиејт маркетинг (англ. affiliate) претставува модел на рекламирање преку кој компанијата им дава процент од продажбата на трети лица за да рекламираат и генерираат сообраќај што води до производите и услугите на самата компанија. Ваквиот тип маркетинг им овозможува на поткастерите да заработат провизија преку промовирање производи. Тие добиваат единствена врска за пренасочување и секогаш кога слушателот/гледачот купува преку тоа линковско пренасочување, поткастерот заработува процент.

5. Продажба на брендирани производи

Популарните поткастери продаваат брендирана стока (маици, чаши, налепници, беџови) или дигитални производи како е-книги, курсеви и планери.

Пример: Поткастот „Дејли стоик“ (The Daily Stoic) од Рајан Холидеј продава книги, планери и курсеви, генерирајќи на тој начин значителен дел од своите приходи.

6. Емисии во живо и говорни ангажмани

Откако поткастот ќе добие популарност, домаќините можат да заработуваат преку настани во живо, работилници и говорни ангажмани.

Пример: Според „Фајнанс баз“, водителот на поткастот „Моето омилено убиство“ (My Favorite Murder) ги продава емисиите во живо низ светот, генерирајќи шестцифрена заработка по настан. 

Колку заработуваат различните типови поткастери?

Заработката варира од случај до случај и во голема мера зависи од фактори како што се нишата, ангажираноста на публиката, конзистентноста и стратегиите за монетизација. Примерите што се дадени подолу во текстот се само некоја рамка врз основа на спроведени истражувања во светот и на нив воопшто не треба да се гледа како на конкретни бројки за заработка  што загарантирано би се генерирала доколку имате желба да се занимавате со поткастерство.

 

На пример, „Фајнанс баз“ проценува дека „Крајм џанки“ заработува околу шест милиони долари годишно преку различни канали на приливи на приходи. 

Колку време е потребно за да заработите пари од поткаст?

Повеќето поткастери почнуваат да заработуваат во рок од шест до 12 месеци, но тоа зависи од тоа колку брзо можете да ја зголемите вашата публика и да изградите ангажман. Доследноста е клучна - редовното објавување епизоди помага да се воспостави доверба кај слушателите.

Исто така, потребно е време за да се промовира поткастот, да се привлечат следбеници и да се истражат различните опции за монетизација, како спонзорства, партнерски маркетинг, премиум содржина или донации од слушатели. Неопходен е фокус на квалитетна содржина, маркетинг и градење заедница, за со текот на времето приходот да стане навистина видлив.

Дали поткастингот е профитабилен?

Да, поткастирањето може да биде многу профитабилно, но успехот не се случува прекуноќ. Многу поткастери  првично се водат од страста кон овој тип на креирање содржини достапни за јавноста. Советот од професионалците од „Хело студиос“ (Hello Studios) за тие што размислуваат да лансираат поткаст е да се фокусираат на висококвалитетна содржина и растење на ангажирана активна публика – и монетизацијата загарантирано ќе следува со текот на времето!

Глобалното истражување на „Адобе“ (Adobe) откри дека речиси секој четврти човек може да се смета за влијателен, односно инфлуенсер на социјалните мрежи. Сепак, „Неорич“ (NeoReach) објави дека приближно половина (48 проценти) од креаторите на содржини на социјалните медиуми заработуваат најмногу 15.000 долари годишно, а само 15 проценти заработуваат над 100.000 долари годишно. Па, како денешните ѕвезди на социјалните мрежи со најголема заработка стигнаа таму каде што се? Експертите велат дека комбинацијата на среќа, постојаност и шарм им помага на ѕвездите на социјалните мрежи да ги развијат своите платформи.

Какви типови инфлуенсери постојат на социјалните мрежи?

Според „Импакт“ (impact.com), врз основа на бројот на следбеници постојат неколку нивоа на инфлуенсери.

• Наноинфлуенсери:   помалку од 15.000 следбеници • Микроинфлуенсери:        15.000-75.000 следбеници • Средни инфлуенсери:      75.000-250.000 следбеници • Макроинфлуенсери:       250.000-еден милион следбеници • Мегаинфлуенсери и познати личности:   над еден милион следбеници

  

Истражувањата покажуваат дека микро и наноинфлуенсерите имаат највисоки стапки на ангажирање. Според експерт за социјални медиуми и маркетинг во „Маркетинг миксолоџи“ (Marketing Mixology), микроинфлуенсерите и наноинфлуенсерите (оние со помала, но суперангажирана публика) добиваат повеќе внимание затоа што го имаат тој фактор на доверба што на големите познати личности честопати им недостасува“.

Колку се платени инфлуенсерите?

Со оглед на тоа што брендовите сѐ повеќе се свртуваат кон различни начини за маркетинг на социјалните медиуми, тие откриваат дека влијателните создавачи на содржина добиваат одличен поврат на инвестицијата.
Инфлуенсерите можат лесно да допрат до целната публика, односно посакуваната група на потрошувачи на одредена компанија, но колку ќе заработат зависи од тоа кои се, од нивната демографија, стапките на ангажман, платформата што ја користат и бројот на следбеници.

Просечна заработка на инфлуенсери по објава

Маркетинг-платформата „Импакт“ спроведе студија во соработка со „Адвик“ (Adweek), водечки извор на вести и сервис на екосистемот за маркетинг на брендот, а целта беше да се идентификуваат тековните трендови во индустријата меѓу инфлуенсерите на социјалните медиуми.

 

 

Студијата откри дека Инстаграм (Instagram) е најпопуларна платформа за инфлуенсери (92 проценти), по што следуваат Тикток (TikTok) - 43 проценти, Фејсбук (Facebook) - 41 отсто, Пинтерест (Pinterest) - 20 проценти, Јутјуб (YouTube) - 15 проценти и Снепчет (Snapchat) – четири отсто.

Извештајот ги дели приходите за секое ниво на инфлуенсери врз основа на различната популарност на платформите.

Што влијае на заработката на инфлуенсерите на социјалните мрежи?

Се разбира дека горенаведените бројки се просечни, а конкретната заработка на инфлуенсерите зависи од следните неколку фактори:

• Број на следбеници: Големината на публиката на инфлуенсерите е клучен фактор за нивната заработка. Инфлуенсерите со екстремно голем број следбеници може да заработат значително повеќе по објава. На пример, „Инфлуенсер маркетинг хаб“ (Influencer Marketing Hub) објави дека Селена Гомез има 422 милиони следбеници на Инстаграм и наплаќа приближно 2,5 милиони долари по објава. Сепак, бројот на следбеници е само еден дел од мозаикот.

• Тип на промоција: Колку повеќе е вклучен инфлуенсерот во промовирањето на производот толку е поголема стапката на заработка. Значи, спонзорираната објава во која инфлуенсерот ги охрабрува следбениците да го пробаат производот може да се наплати по пониска цена, додека видеодемонстрацијата на производот би имала поголема стапка.

• Ангажирање на публиката: Можеби еден од најголемите фактори што влијаат на заработката на инфлуенсерот е ангажираноста на публиката. Инфлуенсерите со високоангажирана публика можат да наплатат повеќе, а тоа особено важи за долгорочните договори со брендовите. Според „Брим“ (Brim), брендовите сакаат да работат со инфлуенсери што можат да поттикнат дискусија на мрежите, да ги натераат луѓето да кликнат и да ја убедат својата публика да ги купи работите што ги продаваат. Суперангажирани следбеници може да значат поголема профитабилност во споредба со огромна толпа тивки следбеници.

На кој начин заработуваат инфлуенсерите?

Инфлуенсерите им помагаат на бизнисите да растат, така што брендовите се подготвени да платат за нивна поддршка. Според „Бизнис.ком“ (www.business.com), ѕвездите на социјалните мрежи имаат неколку начини на располагање за да заработат пари онлајн.

• Инфлуенсерите заработуваат пари од спонзорирани промоции

Спонзорирани промоции се кога брендот ѝ плаќа на една влијателна личност на социјалните мрежи да креира содржина во негово име и да ја сподели со своите следбеници. Спонзорираните промоции вклучуваат пласмани на производи, приказни за брендови, покривање настани, коментирање производи и многу повеќе. Некои инфлуенсери добиваат мали исплати и/или бесплатни примероци од производите што ги пласираат во спонзорирана содржина, што може да значи огромна плата како компензација.

„Компаниите плаќаат инфлуенсери за да ги промовираат своите производи затоа што, да бидеме искрени, луѓето повеќе им веруваат на своите омилени инфлуенсери отколку на традиционалните реклами“, посочуваат од „Брим“. „Без разлика дали станува збор за гуру за нега на кожа, кој лудува по најдобриот хидратантен крем досега, или за фитнес инфлуенсер што промовира протеински шејкови, овие објави може да заработат сериозни пари. Колку публиката е поголема и поангажирана толку е поголема платата“.

• Инфлуенсерите заработуваат пари и со управување со профили на мрежите

Од паметните инфлуенсери се бара и да дејствуваат како менаџери на профилите на социјалните мрежи на брендот. Познатите личности, новите брендови и трендовските компании профитираат од привлечноста и обучените очи на ѕвездите на социјалните мрежи што управуваат со нивните профили и ги пласираат нивните производи. Честопати има вкрстување помеѓу социјалните сметки на инфлуенсерот и социјалните платформи на брендот. Успехот на инфлуенсерот се мери со бројот на посетители и одговорите на прашањата на клиентите.

• Инфлуенсерите заработуваат преку реклами на Јутјуб

Инфлуенсерите често заработуваат преку платени реклами на Јутјуб. Следбениците ги гледаат овие реклами кога го посетуваат јутјуб-каналот на влијателната личност. Дополнително, инфлуенсерите можат да заработат пари преку спонзорирани видеа од брендови на содржини што ги прикажуваат на својот јутјуб-канал.

• Инфлуенсерите заработуваат пари преку партнерски (афилиејт) врски

Партнерските (афилиејт) врски се пасивен извор на приход за ѕвездите на социјалните мрежи. Следбениците можат да купуваат истакнати производи, да посетуваат одредени страници или да се регистрираат на истакнати страници преку линковска врска што води од профилот на инфлуенсерот до компанијата чиј производ или услуга се рекламира. Брендовите и продавачите ги користат овие врски за да следат од каде доаѓа и кој го води сообраќајот, а потоа лесно може да се одреди заработената плата.

„Придружниот маркетинг е двојна победа - следбениците добиваат попуст, брендовите прават продажба, а инфлуенсерите земаат процент“, посочува „Брим“. „Да напоменеме дека инфлуенсерите и познатите личности мора да ги објават партнерските врски за на публиката да ѝ биде јасно дека добиваат поврат од нивните купувања“.

• Инфлуенсерите заработуваат пари со тоа што стануваат амбасадори на брендови

Амбасадори на бренд се инфлуенсери што  потпишале ексклузивен договор со брендот. Тие во суштина стануваат портпарол на брендот. Договорите за амбасадори на брендот генерално покриваат одреден период кога инфлуенсерот го промовира брендот на различни платформи и преку различни онлајн и офлајн методи. На инфлуенсерите обично им се плаќа паушал однапред.

„Очекувајте да видите повеќе долгорочни партнерства наместо еднократни рекламни објави“, велат од „Брим“. „Брендовите сакаат постојани односи каде што влијателните личности стануваат вистински амбасадори“.

• Инфлуенсерите заработуваат преку продажба на сопствени производи

Инфлуенсерите исто така во одредени случаи продаваат сопствена стока преку интернет, која најчесто може да биде нешто по што се познати.

„Многу инфлуенсери ги развиваат своите бизниси со лансирање производи или компании, движејќи се надвор од ѕидовите и границите на онлајн просторот“, вели Џенифер Глен, експертка за маркетинг на инфлуенсери и генерална менаџерка на платформата за маркетинг на инфлуенсери во САД „Скуадап“ (Squad.App). „Ова им овозможува да ги прикачат своето име и лик на опипливи производи од реалниот свет со кои потрошувачите можат да комуницираат, да ги купуваат и да ги гледаат во нивната локална продавница“.

На пример, уметниците можат да ги продаваат своите уметнички дела, а дизајнерите на ентериер може да продаваат е-книги со совети за дизајн. И инфлуенсерите, како и поткастерите, често креираат производи брендирани со нивното име (во овој случај најчесто маици).

• Инфлуенсерите заработуваат од претплати, бакшиш и донации

Инфлуенсерите понекогаш имаат премиум содржини што се нудат како ексклузивни за нивните претплатници. Следбениците исто така понекогаш даваат и донации. Тие гестови често се наградуваат со јавно заблагодарување или со подарок брендиран производ.