ПОЛИТИКА
Америка го ограничува извозот на чипови?
Американските власти, наводно, ја разгледуваат можноста за ограничување на извозот на напредни чипови во одредени земји, наведувајќи ја заштитата на националната безбедност како причина. Споменатите ограничувања би важеле за продажба на чипови за вештачка интелигенција од „Енвидија“ (Nvidia), но и од други американски компании. Официјалните лица, наводно, се фокусирани на земјите од Персискиот Залив, кои имаат зголемен апетит за центри за податоци за вештачка интелигенција, но и „длабоки џебови“ за нивно финансирање.
Политиката ќе се заснова на нова рамка за олеснување на процесот на лиценцирање за снабдување со чипови за вештачка интелигенција до центрите за податоци во земји како Обединетите Арапски Емирати и Саудиска Арабија. Претставниците на Одделот за трговија минатиот месец ги открија регулативите и рекоа дека повеќето прописи се во изработка. Бирото за индустрија и безбедност, кое ги надгледува извозните контроли, одби да коментира. „Енвидија“, лидер на пазарот за чипови со вештачка интелигенција, исто така одби да коментира, како и АМД (Advanced Micro Devices Inc.) и „Интел“.
Администрацијата на Бајден веќе ги ограничи испораките на чипови за вештачка интелигенција од компании како „Енвидија“ и АМД во повеќе од 40 земји низ Блискиот Исток, Африка и Азија поради стравувањата дека нивните производи би можеле да бидат пренасочени во Кина.
Израел: Цел на нападите само воени објекти
Израелскиот премиер Бенјамин Нетанјаху се согласи да ја ограничи одмаздата на неговата земја против Иран на воени цели. Тоа се наведува во извештајот на „Вашингтон пост“. Нетанјаху ветил кај администрацијата на Бајден дека ќе нишани на тие цели, а не на иранската нафтена инфраструктура или нуклеарни постројки, пишува весникот, цитирајќи две неименувани официјални лица. „Го слушаме мислењето на САД, но конечните одлуки ќе ги донесеме врз основа на нашите национални интереси“, соопшти кабинетот на израелскиот премиер. Таквата одлука би била еден вид олеснување за американскиот претседател Џозеф Бајден, чија администрација претходно го повика Израел да не ги гаѓа иранските нуклеарни или енергетски постројки, со оглед на ескалацијата на конфликтот на Блискиот Исток.
Bloomberg
БИЗНИС
Роботите на „Тесла“ контролирани од луѓе?
Компанијата „Тесла“ неодамна ги претстави своите роботи „оптимус“ (Optimus) во голем стил на настанот за промоција на „сајберкеб“ (Cybercab), за кои сега излезе дека биле под „далечинска контрола“ од луѓе. Вработените стационирани на друго место ги следеле интеракциите помеѓу хуманоидните машини и присутните на минатонеделната изложба „Ние, робот“ (We, Robot) во близина на Лос Анџелес, велат извори запознаени со ситуацијата. Инженерите, наводно, потврдиле дека роботите користеле вештачка интелигенција само за одење, додека луѓе од далечина ги контролирале повеќето нивни активности. Претставниците на „Тесла“, сепак, не одговорија на последните тврдења.
„Енвидија“ прави чипови со „полн капацитет“
Акциите на „Енвидија“ поскапеа повеќе од два отсто откако компанијата ја намали загриженоста на инвеститорите поради наводното доцнење на производството. Имено, извршниот директор на компанијата Џенсен Хуанг изјави дека производството на чипот „блеквел“ (Blackwell) на компанијата е „со полн капацитет“ и дека побарувачката за него е „неверојатна“. Тој го објави тоа откако неодамна се појавија шпекулации дека производството на чипот е одложено поради инженерски проблеми.
БЕРЗА
Европа
Во продолжение следува преглед на состојбата на глобалните пазари на капитал. Фјучерсите на европските акции утрово се тргуваат во зелено, пред објавувањето на податоците за индустриското производство во еврозоната. Европските берзи го затворија вчерашното тргување со добивки, иако последните прогнози покажаа дека Германија моментално е во блага рецесија и дека нема да забележи раст до крајот на годинава.
САД
Фјучерсите на американските индекси исто така се тргуваат во зелено, по серијата квартални извештаи од водечките американски компании. Почетниот круг на финансиските резултати во третиот квартал покажа дека таканаречената корпоративна Америка веќе има корист од намалувањето на каматните стапки на Федералните резерви на САД. Во фокусот на инвеститорите денеска се деловните резултати на „Банка на Америка“ (Bank of America), „Ситигруп“ (Citigroup) и „Голдман Сакс“ (Goldman Sachs).
Азија
Кога станува збор за индексите во азиско-пацифичкиот регион, тие се тргуваат мешано. Индексот MSCI порасна за цели 0,7 отсто „на крилата“ на растот на акциите во секторот чипови. Истовремено, јапонскиот берзански индекс Nikkei го достигна највисокото ниво од јули, а со добивки се тргуваат и индексите во Австралија и Тајван. Од друга страна, акциите во Кина и Хонгконг се во пад, бидејќи инвеститорите внимателно ја следат можноста за воведување дополнителни стимулации за економијата.
НАФТА
Цената на нафтата падна откако извештајот дека Израел може да го изостави нападот врз иранската инфраструктура за сурова нафта ја намали загриженоста за големото нарушување на снабдувањето.
Брентот падна за речиси три отсто, на околу 75 долари, по два отсто загуба во понеделникот, додека ВТИ (West Texas Intermediate) падна на помалку од 72 долара за барел. Цените на суровата нафта беа на високо ниво во последниве недели додека трговците ја следеа ескалацијата на конфликтот на Блискиот Исток - дом на околу една третина од глобалната понуда - откако Израел вети дека ќе се одмазди за нападот на Иран од 1 октомври. Овие случувања ја засенија загриженоста за забавување на растот на клучните пазари, вклучувајќи ја и Кина.
Bloomberg Mercury
.webp){kind=icon}
