Договорот за горната граница на американскиот долг е сè поизвесен

Преговарачките тимови од Републиканската партија и Белата куќа се сè поблиску до договор за зголемување на границата на долгот и ограничување на сојузните трошоци за две години, велат познавачи на развојот на преговорите, бидејќи останува уште кратко време за да се избегне катастрофално сценарио на неисплаќање на обврските од страна на американската влада.

Во преговорите одржани претходните денови двете страни се обиделе да ги надминат разликите, велат изворите, но деталите за кои се согласиле се прелиминарни и конечен договор сè уште не е постигнат. Двете страни и натаму не се договориле за висината на лимитот.

Според точките на договорот што се подготвува, следната година би било одобрено зголемување на воените трошоци за три отсто, во согласност со буџетското барање на претседателот Џо Бајден.

Договорот исто така ќе вклучува мерка за модернизација на државната електрична мрежа за да се приспособи на обновливите извори на енергија, што е клучна климатска цел, а истовремено ќе се забрза издавањето дозволи за нафтоводи и други проекти за фосилни горива поддржани од Републиканската партија, нагласуваат упатените.

Со договорот се снижува зголемувањето од 80 милијарди долари на буџетот на Даночната управа, што Бајден го доби како дел од законот за намалување на инфлацијата, за 10 милијарди долари. Републиканците предупредија на бран инспекции и ревизии, додека демократите велат дека зголемувањето ќе се плати преку намалување на даночното затајување.

Договорот што се разгледува ќе биде многу поограничен од првичната понуда на републиканците, кои побараа лимитот на долгот да се зголеми до март следната година во замена за 10-годишно ограничување на трошоците. Конзервативците во Претставничкиот дом веќе се спротивставија на идејата за помал договор, додека група независни во Претставничкиот дом испратија писмо до Мекарти барајќи тој да биде одлучен.

Советник на демократското раководство во Претставничкиот дом соопшти дека Белата куќа не споделила никакви информации за договорите за ограничувањата на трошоците или за финансирањето на Даночната управа.

„Њујорк тајмс“ претходно објави дека преговарачите се поблиску до договор за лимитот на долгот.

„Знаеме кои се нашите разлики“, изјави претседателот на Претставничкиот дом, Кевин Мекарти, пред новинарите во Капитол, додавајќи дека планира да работи за време на празничниот викенд.

„Сè уште немаме договор. Знаевме дека нема да биде лесно. Тешко е, но работиме на тоа и ќе продолжиме да работиме додека не завршиме“, истакна тој.

Приносите на американските државни обврзници пораснаа. Акциите отворија со мали добивки во Јапонија и Јужна Кореја, додека нивните референтни вредност во Австралија останаа непроменети. Берзата во Хонгконг е затворена поради државен празник.

Кевин Мекарти и Џо Бајден во Белата куќа Bloomberg

Јан Хациус и Алек Филипс од групацијата „Голдман Сакс“ во белешка до инвеститорите посочија дека најдобрата шанса за постигнување договор е в петок. „Се чини дека преговарачите се сè поблиску до договор“.

Доколку договорот наскоро биде постигнат, гласањето во Претставничкиот дом најверојатно ќе се одржи во вторник. Тогаш Сенатот ќе мора брзо да дејствува и да го испрати до работната маса на Бајден пред 1 јуни, датумот до кој, според министерката за финансии Џенет Јелен, нејзиниот сектор може да остане без готовина.

Следниот ден би биле извршени плаќања на милиони корисници на социјална помош, со што ќе се изврши притисок врз политичарите да го решат ќор-сокакот.

Во средата „Фич“ го оцени кредитниот рејтинг на САД како ААА со можно намалување. САД го загубија својот рејтинг ААА кај „Ес енд пи глобал“ за време на сличен политички ќор-сокак околу лимитот на долгот во 2011 година.

Белата куќа и Министерството за финансии соопштија дека потегот на „Фич“ укажува на важноста од решавање на спорот за долгот што е можно поскоро. Сепак, Мекарти изјави дека не е загрижен од најавите на „Фич“ и дека на преговарачите не им треба агенција за рејтинг за да ги потсетува на важноста од постигнување договор.

Во моментов нема коментари за веста. Биди прв да коментира...

Остави коментар