Соединетите Американски Држави за влакно избегнаа целосна и скапа блокада на федералните агенции откако Конгресот усвои компромисен нацрт-закон со кој Владата ќе продолжи да работи до 17 ноември.
Регулативата, која што беше усвоена синоќа, само неколку часа пред крајниот рок на полноќ, им купува време на демократите и републиканците да преговараат за подолгорочно федерално финансирање. Законот не вклучува нови средства за Украина.
Претседателот Џо Бајден го потпиша законот доцна навечер во Вашингтон, ставајќи му крај на денот кој започна со приближување на земјата до она што изгледаше како неизбежно и долго замрзнување на федералното финансирање.
„Вечерва, двопартиските мнозинства во Домот и Сенатот гласаа да се задржи отворена Владата, спречувајќи непотребна криза што би предизвикала непотребна болка на милиони вредни Американци“, рече Бајден во изјавата.
Конечното усвојување во Сенатот беше активирано претходно истиот ден од претседателот на Претставничкиот дом Кевин Мекарти, кој ги прозва екстремно десничарските републиканци дека блефираат и успеа да направи компромис во последен момент. Тие се заканија дека ќе го соборат од функцијата ако не го спроведе затворањето на Владата, потег што повеќето во Конгресот го сметаат за многу непопуларен кај гласачите.
„Ако некој сака да ме исели од ова место затоа што сакам да бидам возрасна личност, пробајте“, им рече Мекарти на новинарите.
Со невообичаено брза акција, во типично бавниот Капитол, предлог-законот ги помина двата совети за помалку од 12 часа.
Чак Шумер ја поздрави новата регулатива/Фото: Anna Rose Layden/Bloomberg
Американците и инеститорите ширум светот, внимателно го следеа Вашингтон во последните денови додека растеше ризикот од затворање. Дури и краткорочното нарушување во финансирањето би запрело многу федерални функции и плати, додека економистите предвидуваа дека подолгорочното затворање може да ги попречи напорите на Федералните резерви да ја смири инфлацијата без широко распространето губење на работни места. Пазарите, исто така, анализираа како ќор-сокакот може дополнително да ги оштети перцепциите за американското владеење.
Регулативата, која е лишена од длабоките кратења на трошоците и граничните политики што ги бараат некои порадикални републиканци, означува ретка двопартиска победа во горко поделениот Вашингтон.
„Откако се обидоа да ја земат нашата Влада како заложник, републиканците од МАГА (MAGA - Make America Great Again) не добија ништо“, рече водачот на мнозинството во Сенатот Чак Шумер.
Но, прекинот на помошта за Украина, барем засега, е удар за претседателот Володимир Зеленски, кој се состана со Бајден и законодавците минатата недела и лично се заложи за нови системи за оружје, вклучувајќи борбени авиони Ф-16 и ракети АТАКМС со поголем дострел.
Бајден и другите пратеници се обидоа да ја уверат Украина дека САД остануваат посветени на воените напори. САД испратија 44 милијарди долари во Украина од руската инвазија минатата година, а Бајден побара дополнителни 24 милијарди долари за да го надополни буџетот за кој Пентагон вели дека е речиси исцрпен.
„Во никој случај не можеме да дозволиме да престане американската поддршка за Украина“, рече Бајден, додавајќи дека Мекарти се обврзал на специјален пакет помош за Украина.
Предлог-законот помина во Сенатот со 88 гласа „за“ и 9 гласа против. Нацрт-законот вклучува 16 милијарди долари за помош при катастрофи, но нема помош за Украина. Претставниците на двете партии кои го поддржуваат финансирањето за Украина рекоа дека за тоа ќе се постапува посебно.
.webp){kind=icon}
