.webp){kind=icon}
Одзивот на првиот круг од претседателските избори до 17 часот попладнево изнесува 44,18 проценти, според податоците на Државната изборна комисија (ДИК) за обработени 1.788 избирачки места.
Од вкупно запишани 899.977 гласачи на овие избирачки места гласале 397.612 избирачи, односно 44,18 отсто, информира на прес-конференција претседателот на ДИК, Александар Даштевски.
Најголем одзив, 67,19 проценти, има во Новаци, а најмал во Пласница, 15,5 отсто.
„Гласањето досега се одвива мирно во сите избирачки места“, рече Даштевски.
Во споредба со првиот круг од претседателските избори во 2019 година, до 17 часот на овие избори има поголем одзив за околу девет процентни поени.
До ДИК досега се доставени 308 приговори за заштита на личното избирачко право, од кои 75 се усвоени и на избирачите им е овозможено да го остварат правото на глас, 25 се отфрлени како неуредни, 38 се одбиени, а другите се во обработка.
Гласањето завршува во 19 часот, а следната прес-конференција на ДИК е најавена за 19.30 часот.
