Судскиот совет на итната седница на полноќ му го одзеде имунитетот на врховниот судија Наќе Георгиев. Со тоа го одобри неговиот притвор, а го оддалечи и од вршење на судиската функција.
„Судскиот совет го одзема имунитетот на судија на Врховниот суд на РСМ заради непречено водење на кривичната постапка. Го одобри барањето за одобрување притвор на судија на Врховниот суд на РСМ поднесено од судија на претходна постапка на Основниот кривичен суд Скопје и времено го оддалечи од вршење на судиската функција судијата на Врховниот суд на РСМ, до правосилно завршување на кривичната постапка“, се наведува во соопштението од Судскиот совет.
Георгиев вчера беше уапсен за примање мито. Тој бил лишен од слобода додека го вршел кривичното дело, информира МВР вчера.
„На 20.5.2024 лишен од слобода е судија од Врховниот суд поради постоење на основи на сомнение за сторено кривично дело примање награда за противзаконско влијание. Судијата е лишен од слобода на самото место при извршувањето на кривичното дело. Се чекаат понатамошни насоки од надлежен јавен обвинител“, информираа вчера од МВР.
Според достапните информации, за судијата Георгиев постои сомнение дека ветувал олеснителни мерки во судската постапка што се води против поранешниот градоначалник на Ново Село, Боро Стојчев, кој беше повторно уапсен, овој пат за шверц на марихуана. За возврат наводно побарал 10.000 евра. Пријавата дошла од синот на Стојчев.
Според соопштението на Јавното обвинителство објавено утрово, истрага за овој случај се води против две лица.
„Собраните докази и извршените претреси до овој момент му даваат законски основ на предметниот јавен обвинител да предложи притвор само за првоосомничениот, кој е затекнат при извршување на кривичното дело, додека во однос на второосомничениот до овој момент доказите не даваат основи за да се предложи најстрога мерка за обезбедување. Истрагата продолжува до целосна проверка на сите околности и наводи“, се наведува во соопштението.
Медиумите јавуваат дека второто лице опфатено со истрагата е член на Советот на јавни обвинители, но сѐ уште се чека потврда за тоа.
Георгиев пред да стане судија на Врховниот суд, беше претседател на Апелацискиот суд во Штип. Во времето додека ја извршувал функцијата таму, против него и против уште двајца судии имало претставка до Судскиот совет за нивното работење. Двајцата судии биле разрешени, а претставката за Георгиев не била ставана на дневен ред цели шест месеци.
.webp){kind=icon}
