.webp){kind=icon}
Федералните резерви на САД (ФЕД) ќе продолжат со затегнувањето на монетарната политика до опсегот од 5 до 5,25 процентни поени, смета аналитичкиот тим на „Блумберг Адрија“. На вчерашниот состанок банкарите на ФЕД со едногласна одлука ја зголемија основната каматна стапка за 75 базични поени, а аналитичарите сметаат дека одлуката и особено комуникацијата за одлуката се знак за цврсто задржување на одговорноста на централната банка во борбата против инфлацијата.
„Нашиот став за највисокото ниво на стапките на ФЕД не е променет и сè уште ги гледаме во опсег од 5 до 5,25 процентни поени. На состанокот во првиот квартал следната година затегнувањето ќе продолжи, но со нешто побавно темпо во споредба со претходно претпоставеното. Важната порака за глобалните економски актери, како и за регионот Адрија, е дека капиталот ќе остане ограничен и ќе поскапува. Тоа ќе создаде негативна јамка за земјите од регионот Адрија, со оглед на помалата расположливост на капиталот“, вели Андреј Кнез, главен аналитичар на „Блумберг Адрија“.
Прочитајте повеќе: Американските берзи потонаа по најавите на Пауел
Според него, како што стојат работите во моментов, има шанса ФЕД повторно да почне да ги намалува каматите во 2024 година, но инфлацијата ќе биде значајно помала дури во 2025 година.
Најсилната кампања на ФЕД за покачување на каматните стапки од 1980-тите години почнува да лади некои делови од економијата, особено секторот за недвижности. Но креаторите на политиките допрва треба да видат значаен напредок во поглед на инфлацијата. Уште не дојде ни до значајно попуштање на пазарот на работна сила. Според податоците за тој сектор, во септември беше достигнато најниско ниво на невработеност во последните 50 години, од 3,5 отсто. Побарувачката за работници остана силна, со 1,9 слободно место на секој невработен, покажуваат податоците на американското министерство за труд објавени завчера.
