ФЕД ги зголеми каматите на највисоко ниво во 22 години

Банката на Федерални резерви (ФЕД), централната банка на САД не отстапи од планот, па очекувано следеше уште едно зголемување на каматните стапки од 25 базични поени. По денешната одлука на Федералниот комитет за отворен пазар (FOMC), цените на позајмувањето се подигнати на највисоко ниво во последните 22 години, односно на опсег од 5,25 до 5,5 отсто. Ова е, со една пауза, 11-то зголемување на каматните стапки од почетокот на 2022 година, кога стапката беше близу нула.

 

 

„Комитетот ќе продолжи да ги проценува дополнителните информации и нивните импликации врз монетарната политика. При одредувањето на степенот на дополнително заострување на политиката што може да биде потребно за да се врати инфлацијата на два проценти, Комитетот ќе ги земе предвид ефектите од минатите затегнувања на монетарната политика. Заостанатите ефекти од монетарната политика влијаат на економската активност и инфлацијата, како и на економските и финансиските податоци“, се вели во соопштението, кое е главно непроменето во однос на тоа од претходниот состанок.

Стапката на инфлација во САД падна на најниско ниво во повеќе од две години во јуни годинава кога стапката изнесуваше три проценти. Сепак базичната инфлација остана на ниво од 4,8 отсто во јуни, што е доста високо за целите на ФЕД.

Целната инфлација е два проценти, а експертите веќе тврдеа дека последната фаза на нејзино намалување може да испадне најтешка.

„При одредувањето на степенот на дополнително зајакнување на политиката што може да биде соодветно за враќање на инфлацијата на два проценти со текот на времето, Комитетот ќе го земе предвид кумулативното заострување на монетарната политика, заостанувањата со кои монетарната политика влијае на економската активност и инфлацијата, како и економските и финансиските случувања“.

Заедно, овие реченици сугерираат дека функционерите на ФЕД ги држат отворени нивните опции за повторно зголемување на каматите на следниот состанок во септември, или да паузираат од зголемувањето во зависност од дојдовните податоци.

Приносите на државните обврзници паднаа, а индексот S&P 500 ги намали загубите на денот и доларот падна.

Инаку Американците сè уште плаќаат многу повеќе отколку пред пандемијата за низа стоки и услуги - и не се предвидува таа болка да заврши наскоро. Претседателот Џо Бајден, подготвувајќи се за битка за реизбор следната година, најверојатно ќе открие дека високите цени остануваат оружје што неговите републикански ривали можат да го користат против него.

За ФЕД, сè уште има причини за загриженост. Како прво, додека инфлацијата се движи во вистинската насока, математиката направи најновите бројки да изгледаат подобро отколку што навистина се.

Познати како „базни ефекти“, споредбата на индексот на потрошувачките цени со јуни 2022 година - кога руската инвазија на Украина штотуку доведе до брз пораст на цените на енергијата - направи забавувањето да изгледа особено драматично. Всушност, годишниот раст на цените би можел малку да се зголеми во наредните месеци бидејќи споредбите со минатата година стануваат понеповолни.

 

Во моментов нема коментари за веста. Биди прв да коментира...

Остави коментар